യുവജനങ്ങൾ ചോദിക്കുന്നു
എനിക്ക് എങ്ങനെ കൂടുതൽ ഉറങ്ങാം?
കണക്ക് ബുദ്ധിമുട്ടാണെങ്കിൽ കുറച്ചുകൂടി നന്നായി പഠിക്കണമെന്നു നിങ്ങൾ വിചാരിച്ചേക്കാം. ഇനി സ്പോർട്സിലെ പ്രകടനം മോശമാണെങ്കിൽ കുറച്ചുകൂടി പരിശീലിക്കണമെന്നു വിചാരിച്ചേക്കാം. പക്ഷേ ഈ രണ്ടു കാര്യത്തിലും നിങ്ങൾക്കു ശരിക്കും വേണ്ടതു കൂടുതൽ ഉറക്കമായിരിക്കാം. എന്തുകൊണ്ടാണെന്നു നോക്കൂ.
നിങ്ങൾ ഉറങ്ങേണ്ടത് എന്തുകൊണ്ടാണ്?
കൗമാരത്തിലുള്ള മിക്കവർക്കും എട്ടു മുതൽ പത്തു മണിക്കൂർ വരെ രാത്രിയിൽ ഉറക്കം ആവശ്യമാണെന്നു വിദഗ്ധർ പറയുന്നു. ആവശ്യത്തിന് ഉറങ്ങേണ്ടത് ഇത്ര പ്രധാനമായിരിക്കുന്നത് എന്തുകൊണ്ടാണ്?
ഉറക്കം നിങ്ങളുടെ മാനസികപ്രാപ്തികൾ മെച്ചപ്പെടുത്തും. ഉറക്കത്തെ “തലച്ചോറിന്റെ ഭക്ഷണം” എന്നു വിളിക്കാം. സ്കൂളിലും സ്പോർട്സിലും മികച്ചുനിൽക്കാനും പ്രശ്നങ്ങൾ പരിഹരിക്കാനുള്ള കഴിവ് മെച്ചപ്പെടുത്താനും ഉറക്കം സഹായിക്കും.
ഉറക്കം നിങ്ങളുടെ മൂഡ് മെച്ചപ്പെടുത്തും. ഉറക്കക്കുറവുള്ളവരുടെ വികാരങ്ങൾ പെട്ടെന്നു മാറിമറിയും, വിഷമമോ വിഷാദമോ തോന്നും. മറ്റുള്ളവരുമായി ഇണങ്ങിപ്പോകാനും അവർക്കു പാടായിരിക്കും.
ഉറക്കം നിങ്ങളെ നല്ല ഡ്രൈവറാക്കും. ഐക്യനാടുകളിലെ ഒരു പഠനം കാണിക്കുന്നത്, വണ്ടി ഓടിക്കുന്ന സമയത്ത് ഉറങ്ങിപ്പോകുന്നതു കാരണം, 40 വയസ്സിനും 59 വയസ്സിനും ഇടയിൽ പ്രായമുള്ള ഡ്രൈവർമാർക്കു സംഭവിക്കുന്നതിനെക്കാൾ ഏകദേശം ഇരട്ടിയോളം അപകടങ്ങൾ 16 വയസ്സിനും 24 വയസ്സിനും ഇടയിൽ പ്രായമുള്ളവർക്കു സംഭവിക്കുന്നുണ്ട് എന്നാണ്.
ഉറക്കം ആരോഗ്യം മെച്ചപ്പെടുത്തും. ഉറക്കം നിങ്ങളുടെ ശരീരത്തിലെ കോശങ്ങളും കലകളും രക്തക്കുഴലുകളും പരിപാലിക്കാനും കേടുപോക്കാനും സഹായിക്കും. നന്നായി ഉറങ്ങുന്നത്, പൊണ്ണത്തടി, പ്രമേഹം, മസ്തിഷ്കാഘാതം എന്നിവ ഉണ്ടാകാനുള്ള സാധ്യത കുറയ്ക്കാനും സഹായിക്കും.
നിങ്ങളുടെ ഉറക്കം കളയുന്നത് എന്താണ്?
ഉറങ്ങുന്നതുകൊണ്ട് ഇങ്ങനെ പല ഗുണങ്ങളുണ്ടെങ്കിലും കൗമാരത്തിലുള്ള പലരും ആവശ്യത്തിന് ഉറങ്ങുന്നില്ല. ഉദാഹരണത്തിന് 16 വയസ്സുള്ള എലൈൻ പറയുന്നത് ഇങ്ങനെയാണ്:
“എല്ലാവരും രാത്രി എപ്പോഴാണ് കിടക്കുന്നതെന്നു ടീച്ചർ ക്ലാസ്സിലുള്ളവരോടു ചോദിച്ചു. മിക്കവരും പറഞ്ഞത് രണ്ടു മണിയെന്നാണ്, ബാക്കിയുള്ളവർ അഞ്ചു മണിയെന്നും. ഒരാൾ മാത്രം ഒൻപതരയെന്നു പറഞ്ഞു.”
ഏതൊക്കെ കാര്യങ്ങൾ നിങ്ങളുടെ ഉറക്കം തടസ്സപ്പെടുത്തിയേക്കാം?
കൂട്ടുകാർ. “ഉറങ്ങാതെ നേരം കളയാൻ നല്ല എളുപ്പമാണ്. പ്രത്യേകിച്ച് കൂട്ടുകാരുടെ കൂടെ കറങ്ങാൻ പോകുന്ന രാത്രികളിൽ.”—പമേല.
ഉത്തരവാദിത്വങ്ങൾ. “എനിക്ക് ഉറങ്ങാൻ ഇഷ്ടമാണ്. പക്ഷേ ഈ തിരക്കിനിടയ്ക്ക് ആവശ്യത്തിന് ഉറങ്ങാൻ വലിയ ബുദ്ധിമുട്ടാണ്.”—അന.
സാങ്കേതികവിദ്യ. “എന്റെ ഉറക്കം കളയുന്ന ഏറ്റവും വലിയ സാധനം ഫോണാണ്. കിടക്കുമ്പോൾ അതിൽ നോക്കാതിരിക്കാൻ വലിയ പാടാണ്.”—അനിസ.
നിങ്ങൾക്ക് എങ്ങനെ കൂടുതൽ ഉറങ്ങാം?
ഉറക്കത്തിന്റെ പ്രാധാന്യം തിരിച്ചറിയുക. “ഇരുകൈ നിറയെ അധ്വാനത്തെക്കാളും കാറ്റിനെ പിടിക്കാനുള്ള ഓട്ടത്തെക്കാളും ഏറെ നല്ലത് ഒരുപിടി വിശ്രമമാണ്” എന്നു ബൈബിൾ പറയുന്നു. (സഭാപ്രസംഗകൻ 4:6) ഉറക്കം ഒരു ആവശ്യമാണ്, ആഡംബരമല്ല. അതില്ലെങ്കിൽ നിങ്ങൾക്കു കാര്യങ്ങൾ ശരിക്കു ചെയ്യാൻ പറ്റില്ലെന്നു മാത്രമല്ല, ചിലപ്പോൾ നേരേ ചൊവ്വേ വിനോദം ആസ്വദിക്കാൻപോലും പറ്റില്ല.
ഉറക്കം കെടുത്തുന്ന പ്രധാനവില്ലനെ കണ്ടുപിടിക്കുക. ഉദാഹരണത്തിന്, നിങ്ങൾ രാത്രി വൈകിയും കൂട്ടുകാരോടൊപ്പം കറങ്ങിനടക്കാറുണ്ടോ? ഹോംവർക്കോ മറ്റു ചെറിയചെറിയ പണികളോ നിങ്ങളെ പൊറുതിമുട്ടിക്കുന്നുണ്ടോ? ഫോൺ കാരണം സമയത്ത് ഉറങ്ങാൻ പറ്റാതെവരുകയോ ഇടയ്ക്ക് ഉണരേണ്ടിവരുകയോ ചെയ്യുന്നുണ്ടോ?
ചിന്തിക്കാനായി: നിങ്ങൾക്കുള്ള ഏറ്റവും വലിയ തടസ്സം മറികടക്കാൻ കുറച്ച് ബുദ്ധിമുട്ടേണ്ടിവന്നാലും അതിനു തക്ക പ്രയോജനമുണ്ട്. “പരിശ്രമശാലിയുടെ പദ്ധതികൾ വിജയിക്കും” എന്നാണു സുഭാഷിതങ്ങൾ 21:5 പറയുന്നത്.
ഒരാൾക്കു ഗുണം ചെയ്ത പരിഹാരം മറ്റൊരാൾക്കു ഗുണം ചെയ്യണമെന്നില്ല. പകൽ സമയത്ത് ചെറുതായൊന്നു മയങ്ങുന്നതു രാത്രി നന്നായി ഉറങ്ങാൻ സഹായിക്കുമെന്നു ചിലർ പറയുന്നു. പക്ഷേ മറ്റു ചിലർ പറയുന്നത് അത് ഉള്ള ഉറക്കം കൂടെ കളയുന്നെന്നാണ്. അതുകൊണ്ട് നിങ്ങൾക്കു ഗുണം ചെയ്യുന്നത് എന്താണെന്നു കണ്ടുപിടിക്കുക. താഴെ കൊടുത്തിരിക്കുന്ന നിർദേശങ്ങൾ ശ്രദ്ധിക്കൂ:
വിശ്രമിക്കാൻ സമയം കണ്ടെത്തുക. കിടക്കാൻ പോകുന്നതിനു മുമ്പ് വിശ്രമിക്കുന്നെങ്കിൽ നിങ്ങൾക്കു പെട്ടെന്ന് ഉറങ്ങാൻ പറ്റിയേക്കും.
“നിങ്ങൾ, ചെയ്യാനുള്ളതൊക്കെ നേരത്തേ തീർത്തിട്ടാണു കിടക്കുന്നതെങ്കിൽ പിന്നെ കിടക്കുമ്പോൾ അതെക്കുറിച്ച് ഓർത്ത് ടെൻഷനടിക്കേണ്ടിവരില്ല.”—മരിയ.
കാര്യങ്ങൾ മുൻകൂട്ടിക്കണ്ട് പ്രവർത്തിക്കുക. സാഹചര്യങ്ങൾ നിങ്ങളെ നിയന്ത്രിക്കാൻ അനുവദിക്കാതെ, ആവശ്യത്തിന് ഉറങ്ങാൻ സമയം കിട്ടുന്ന വിധത്തിൽ ഒരു പട്ടിക ഉണ്ടാക്കുക.
“എനിക്ക് എട്ടു മണിക്കൂറെങ്കിലും ഉറങ്ങണം. അതുകൊണ്ട് എപ്പോഴെങ്കിലും നേരത്തേ എഴുന്നേൽക്കേണ്ടിവരുമെങ്കിൽ എപ്പോൾ കിടക്കണമെന്നു ഞാൻ കണക്കു കൂട്ടും.”—വിൻസെന്റ്.
ചിട്ടയുള്ളവരായിരിക്കുക. ചിട്ടയുള്ളവരായിരിക്കാൻ നിങ്ങളുടെ ഉള്ളിലെ ക്ലോക്ക് നിങ്ങളെ സഹായിക്കും, പക്ഷേ നിങ്ങൾ അതിനെ പരിശീലിപ്പിക്കണമെന്നു മാത്രം. എല്ലാ ദിവസവും ഒരേ സമയത്ത് കിടക്കാനും എഴുന്നേൽക്കാനും ആണ് വിദഗ്ധർ പറയുന്നത്. ഒരു മാസം ഇതു പരീക്ഷിച്ചിട്ട് എങ്ങനെയുണ്ടെന്നു നോക്കൂ.
“നിങ്ങൾ എല്ലാ ദിവസവും ഒരേ സമയത്ത് ഉറങ്ങാൻ പോയാൽ അടുത്ത ദിവസം മനസ്സിനു നല്ല ഉണർവുണ്ടായിരിക്കും. കാര്യങ്ങളെല്ലാം നന്നായി ചെയ്യാൻ അതു നിങ്ങളെ സഹായിക്കും.”—ജാറെഡ്.
കൂട്ടുകാരുമൊത്തുള്ള പരിപാടികൾക്കു പരിധി വെക്കുക. ‘ശീലങ്ങളിൽ മിതത്വം പാലിക്കാൻ’ ബൈബിൾ പറയുന്നു. ഒഴിവുസമയങ്ങളിൽ നിങ്ങൾ ചെയ്യുന്ന കാര്യങ്ങൾ ഇതിൽ ഉൾപ്പെടുന്നു.—1 തിമൊഥെയൊസ് 3:2, 11.
“കൂട്ടുകാരുമൊത്ത് വൈകിട്ടുള്ള പരിപാടികളിൽ പരിധി വെക്കാൻ ഞാൻ പഠിക്കണമായിരുന്നു. വിനോദത്തിന് ഒരു സമയപരിധി വെച്ചില്ലെങ്കിൽ വേറെ എന്തെങ്കിലും കുളമാകും, മിക്കപ്പോഴും എന്റെ ഉറക്കം!”—റിബേക്ക.
നിങ്ങളുടെ ഫോണിനെയും “ഉറക്കുക!” ഫോണിൽനിന്നും ടാബിൽനിന്നും ടിവി-യിൽനിന്നും വരുന്ന പ്രകാശം ഉറങ്ങാൻ ബുദ്ധിമുട്ടുണ്ടാക്കുമെന്നാണു വിദഗ്ധരുടെ മുന്നറിയിപ്പ്. അതുകൊണ്ട് കിടക്കുന്നതിന് ഒരു മണിക്കൂർ മുമ്പെങ്കിലും ഇന്റർനെറ്റ് ഉപയോഗിക്കുന്നതും നേരം വൈകി കൂട്ടുകാർക്കു മെസ്സേജ് അയക്കുന്നതും നിറുത്തുക.
“നിങ്ങളെ 24 മണിക്കൂറും കിട്ടണമെന്നാണു മറ്റുള്ളവരുടെ ആഗ്രഹം. പക്ഷേ നന്നായിട്ട് വിശ്രമിക്കണമെങ്കിൽ നിങ്ങൾ ഫോൺ മാറ്റിവെക്കണം.”—ജുലിസ്സ.