“Mwen te eseye li Bib la, men mwen te santi m pè pou jan l anpil!” — Briana, 15 an.

 Èske w konn santi w konsa tou? Atik sa a kapab ede w.

•  Poukisa l enpòtan pou w li Bib la?

•  Ki jan m kapab li Bib la?

•  Sa lòt jèn di

 Èske ide pou w li Bib la parèt pa twò atiran pou ou? Si se konsa, nou konprann ou. Petèt ou kapab wè Bib la kòm yon liv ki gen plis pase 1 000 paj ki ekri ak ti lèt piti e ki pa gen okenn desen ladan l — sa pa parèt enteresan ditou devan pwogram televizyon ak videyo.

 Men, eseye wè bagay yo yon lòt jan: Si w ta tonbe sou yon gwo bwat ki la lontan ki gen trezò, èske w pa t ap anvi konnen ki sa l gen anndan l?

 Bib la tankou yon bwat trezò konsa. Li gen sajès, ki se yon pakèt trezò, ki kapab ede w:

•   Pran bon desizyon

•   Byen boule avèk paran w

•   Ede w jwenn pi bon zanmi

•   Fè fas ak strès

 Ki jan yon liv ansyen konsa kapab itil nou nan pwen sa a jodi a? Se paske “tout sa ki nan Ekriti yo se Bondye ki enspire yo”. (2 Timote 3:16.) Sa vle di konsèy ki nan Bib la soti nan pi bon Sous ki genyen an.

 Yon premye fason w kapab li Bib la se soti depi nan kòmansman pou rive nan fen. Sa ap ba w yon ide jeneral sou mesaj ki nan Bib la. Gen plizyè fason w kapab li Bib la. Ann pran de egzanp:

•    Ou ta kapab li 66 liv ki nan Bib la nan lòd yo parèt la, soti nan Jenèz pou rive nan Revelasyon.

•    Ou ta kapab li Bib la nan lòd kwonolojik, sa vle di nan lòd evènman yo te pase toutbon.

 Ide: Apendis A7 nan Tradiksyon monn nouvo a bay yon lis gwo evènman nan lòd yo te pase nan lavi Jezi lè l te sou tè a.

 Yon dezyèm fason w kapab li Bib la se chwazi istwa ki gen rapò ak sitiyasyon w ap viv. Egzanp:

•   Èske w ta renmen jwenn bonjan zanmi ou kapab fè konfyans? Li istwa Jonatan ak David (1 Samyèl chapit 18-20). Apre sa, sèvi ak fich aktivite ki gen tit “Fason pou m jwenn zanmi m ka fè konfyans” lan pou w wè leson pratik ou kapab aprann nan istwa sa a.

•   Èske w ta renmen gen plis kapasite pou w reziste anba tantasyon? Li istwa sou fason Jozèf te reziste anba tantasyon (Jenèz chapit 39). Apre sa, sèvi ak fich aktivite ki gen tit “Fason pou nou reziste devan tantasyon [...] Jozèf — 1^ye pati” ak “Yo lage fo akizasyon sou do l! Jozèf — 2^yèm pati” pou w wè leson pratik ou kapab aprann nan istwa sa a.

•   Èske w ta renmen konnen fason lapriyè kapab ede w? Li eksperyans Neyemi te fè (Neyemi chapit 2). Apre sa, sèvi ak fich aktivite ki gen tit “Bondye te reponn priyè l yo” pou w wè leson pratik ou kapab aprann nan istwa sa a.

 Ide: Lè w ap li Bib la, asire w kote w ap li a kalm yon fason pou w ka konsantre w.

 Yon twazyèm fason w kapab li Bib la se lè w chwazi yon istwa oswa yon sòm, epi w li l. E apre sa, ou gade fason w ka aplike l nan ka pa w. Apre w fin li l, poze tèt ou kesyon sa yo:

•    Poukisa Jewova te fè yo ekri sa nan Bib la?

•    Ki sa sa aprann mwen sou pèsonalite Jewova oswa sou jan li fè bagay yo?

•    Ki jan m ka aplike enfòmasyon sa a nan lavi m?

 Ide: Sèvi ak vèsyon etid Tradiksyon monn nouvo a pou w jwenn videyo, kat ak lòt bagay k ap ede w pi byen pwofite lekti Labib w ap fè.