• Fane dodo nyɛ a ɛfa ɛya a?

  • ɔnda ɔnzi

  • ɔyɛ a

  • dahuu biala

• Ɛfa ɛya a kɛzi ɔde ɛ?

  • ɔnyɛ ɛzulolɛ

  • ɔyɛ ɛzulolɛ

  • me ahonle futu

• Nwane a maa ɛfa ɛya kpalɛ a?

  • me awovolɛ

  • me diema

  • me gɔnwo

Saa ɛnwu ye kɛ ɔwɔ kɛ ɛkomo wɔ ɛyavalɛ ne azo a, edwɛkɛ ɛhye baboa wɔ! Mɔɔ limoa la, suzu deɛmɔti nwolɛ hyia kɛ ɛnyia abotane wɔ mekɛ mɔɔ awie bamaa wɔava ɛya la.

Wɔ kpɔkɛdelɛ. Mrɛlɛbulɛ 14:30 ka kɛ: “Anzonudwolɛ maa nwonane ba bɛ nwo.” Mɔɔ nee ɛhye le ngakyile la, Journal of Medicine and Life buluku ne ka kɛ, “ɛyavalɛ kola maa bɛnyia ahonle ewule.”

Ɛ gɔnwo mɔ. Baebolo ne ka kɛ: “Mmafa sonla mɔɔ ye ahonle bikye ye la agɔnwolɛ, yɛɛ ɛ nee sonla mɔɔ fa ɛya mgbane mgbane la mmatu.” (Mrɛlɛbulɛ 22:24) Yemɔti saa ɛngyɛ na wɔava ɛya a, mmamaa ɔyɛ wɔ ɛzulolɛ kɛ menli ɛmbikye wɔ. Kakula bɛlɛra bie mɔɔ bɛfɛlɛ ye Jasmine la ka kɛ, “saa ɛngyɛ na wɔava ɛya a, ɛnrɛnyia agɔnwolɛma mɔ baboa wɔ a.”

Wɔ duma kpalɛ. Kpavolɛ bie mɔɔ bɛfɛlɛ ye Ethan mɔɔ ɛnyia ɛvolɛ 17 la ka kɛ, “saa ɛfa ɛya a, menli nwu ye na ɔka adwenle mɔɔ bɛlɛ ye wɔ ɛ nwo la.” Biza ɛ nwo kɛ, ‘Kɛzi mekulo kɛ menli nwu me ɛ​—kɛ mele awie mɔɔ kpondɛ anzodwolɛ anzɛɛ mele kɛ bɔmbo mɔɔ ɔnrɛhyɛ na yeade la ɔ?’ Baebolo ne ka kɛ: “Sonla mɔɔ ɔkyɛ na yeava ɛya la ndelebɛbo le kpole, na mɔɔ ɛngyɛ na ye ahonle afutu la maa ye koaseayɛlɛ yɛ kpole.”​—Mrɛlɛbulɛ 14:29.

Suzu ngɛlɛlera nee awie mɔ edwɛkɛ mɔɔ doa zo la anwo na biza kpuya mɔɔ boka nwo la.

• Mrɛlɛbulɛ 29:22: “Sonla mɔɔ ɛngyɛ na yeava ɛya la twehwe mgbonde nee konle, yɛɛ mɔɔ ɛya wɔ ye ahonle zo la fa mɛladonlɛ dɔɔnwo ba.”

  “Mekɛ mɔɔ ɛnee mele kakula la, ɛnee ɔyɛ se kɛ mebali me ɛyavalɛ zo. Me papa mbusuafoɔ lɛ ngyegyelɛ ko ne ala bie. Yemɔti yɛfɛlɛ ye abusua ewule. Ɔyɛ se kɛ yɛbali yɛ ɛyavalɛ zo!”​—Kerri.

  Asoo mengyɛ na meava ɛya ɔ? Saa mekola meda subane kpalɛ bie ali a, asoo nrɛlɛbɛ wɔ nu kɛ mebaha kɛ subane ɛtane mɔɔ melɛ la vi me abusua nu ɔ?

• Mrɛlɛbulɛ 15:1: “Nyelebɛnloa bɛtɛɛ maa ɛya dwo, na ɛdendɛlɛ katekate ka ɛya.”

  “Adenle kpalɛ ne a le kɛ ɛbali wɔ nganeɛdelɛ zo. Saa ɛnyia bɛtɛɛyɛlɛ subane na ɛfa wɔ adwenle ɛsie ninyɛne mgbalɛ zo a, ɔnrɛyɛ se kɛ ɛbaye ɛyavalɛ wɔavi ɛkɛ.”​—Daryl.

  Saa bɛka me ɛya a, nzɔne ati a mualɛ mɔɔ mebava meamaa la anwo hyia ɛ?

• Mrɛlɛbulɛ 26:20: “Ɛyɛne ɛnle senle nu a ɔnu.”

  “Saa mefa mualɛ bɛtɛɛ memaa a, ɔmaa ahenle ne ahonle tɔ ye azule nu na yɛ mu nwiɔ yɛbɔ adawu mɔɔ yɛnva ɛya a.”​—Jasmine.

  Kɛzi me ɛdendɛlɛ anzɛɛ me nyɛleɛ bamaa senle ne azɔ kpole ɛ?

• Mrɛlɛbulɛ 22:3: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea, na mɔɔ ɛnlɛ adwenle la kɔtɔ nu na ɔnwu amaneɛ.”

  “Ɔdwu mekɛ ne bie a, ɔwɔ kɛ mefi ɛkɛ na medwenle mɔɔ ɛ zi la anwo amaa meahola meali nwolɛ gyima mekɛ kpalɛ nu.”​—Gary.

  Mekɛ boni a ɔbayɛ kpalɛ kɛ ɛbavi ɛkɛ mɔɔ ɛnrɛmaa ahenle ɛnrɛde nganeɛ kɛ wɔkpo ye ɛ?

• Gyemise 3:2: “Yɛ muala yɛfo fane dɔɔnwo.”

  “Ɔwɔ kɛ yɛnu yɛ nwo wɔ yɛ nvonleɛ nwo, noko ɔwɔ kɛ yɛsukoa debie yɛfi nu. Saa yɛtɔ aze a, ɔwɔ kɛ yɛdwazo ndɛndɛ na yɛbɔ kpɔkɛ kɛ yɛbabɔ mɔdenle kenle fofolɛ.”​—Kerri.

Mɔɔ baboa: Fa bodane sie ɛ nye zo. Fa sie ɛ nye zo kɛ ɛbanyia abotane wɔ mekɛ bie anu​—bie a siane ko. Kɛlɛ anyuhɔlɛ mɔɔ wɔnyia ye la na nea.