अध्याय १
परिवार सुखी बनाउन मदत खोज्नुहोस्
“जसले मानिस सृष्टि गर्नुभयो, उहाँले सुरुदेखि नै नर र नारी बनाउनुभयो।”—मत्ती १९:४
यहोवा a परमेश्वरले पहिलो पुरुष र स्त्रीको विवाह गराइदिनुभयो। यसबारे बाइबल यसो भन्छ, उहाँले स्त्रीलाई “मानिसकहाँ ल्याउनुभयो।” ती स्त्रीलाई देखेर पहिलो मानिस आदम असाध्यै खुसी भए। तिनले आफ्नो खुसी यसरी व्यक्त गरे, “यो त मेरै हाडको हाड र मासुको मासु हो।” (उत्पत्ति २:२२, २३) हो, यहोवा परमेश्वर विवाहित दम्पतीहरू यसरी नै सुखी भएको चाहनुहुन्छ।
तपाईंलाई लाग्ला, विवाह गरेपछि जीवन सुखैसुखमा बित्नेछ। तर वास्तविकता के हो भने श्रीमान्-श्रीमतीबीच जति नै माया भए तापनि समस्या त आउँछ नै। (१ कोरिन्थी ७:२८) तपाईंले यस पुस्तिकामा बाइबलका थुप्रै व्यावहारिक सल्लाह पाउनुहुनेछ। ती सल्लाह पालन गर्नुभयो भने तपाईंको पारिवारिक जीवन सुखी हुनेछ।—भजन १९:८-११.
१ आफ्नो भूमिका पूरा गर्नुहोस्
बाइबल के भन्छ? परिवारको शिर पति हो।—एफिसी ५:२३.
तपाईं श्रीमान् हुनुहुन्छ भने तपाईंले श्रीमतीको ख्याल राखेको यहोवा परमेश्वर चाहनुहुन्छ। (१ पत्रुस ३:७) उहाँले स्त्रीलाई पुरुषको सहयोगीको रूपमा बनाउनुभयो। (उत्पत्ति २:१८) त्यसैले तपाईंले श्रीमतीलाई माया अनि आदर गरेको उहाँ चाहनुहुन्छ। तपाईं कसरी यसो गर्न सक्नुहुन्छ? आफ्नो भन्दा उनको इच्छालाई प्राथमिकता दिएर।—एफिसी ५:२५-२९.
तपाईं श्रीमती हुनुहुन्छ भने तपाईंले श्रीमान्को आदर गरेको यहोवा चाहनुहुन्छ। अनि तपाईंले श्रीमान्लाई तिनको भूमिका पूरा गर्न पनि मदत गर्नुपर्छ। (१ कोरिन्थी ११:३; एफिसी ५:३३) तिनले गरेको निर्णयमा सहमत हुनुहोस् अनि तिनको हरेक काममा साथ दिनुहोस्। (कलस्सी ३:१८) यसो गर्नुभयो भने तपाईं श्रीमान् र यहोवाको नजरमा बहुमूल्य हुनुहुनेछ।—१ पत्रुस ३:१-६.
यसो गरेर हेर्नुहोस्:
-
आफूमा सुधार्नुपर्ने केही कुरा छ कि भनेर जीवनसाथीलाई सोध्नुहोस्। तिनको कुरा ध्यान दिएर सुन्नुहोस् अनि त्यसैअनुसार गर्नुहोस्।
-
धैर्य गर्नुहोस् किनभने एकअर्कालाई कसरी खुसी बनाउने भनेर सिक्न समय लाग्छ।
२ जीवनसाथीको भावना बुझ्नुहोस्
बाइबल के भन्छ? जीवनसाथीलाई मन पर्ने कुराहरूमा ध्यान दिनुहोस्। (फिलिप्पी २:३, ४) तिनीसित कोमल व्यवहार गर्नुहोस्। किनभने यहोवा आफ्ना सेवकहरूले “सबैसित कोमल व्यवहार” गरेको चाहनुहुन्छ। (२ तिमोथी २:२४) “व्यर्थको गफ तरवारझैं तीखो हुन्छ, तर बुद्धिमान्को बोलीले मानिसलाई निको पार्छ।” त्यसैले सोचविचार गरेर मात्र बोल्नुहोस्। (हितोपदेश १२:१८) मायालु भई बोल्न तपाईंलाई यहोवाले मदत गर्नुहुनेछ।—गलाती ५:२२, २३; कलस्सी ४:६.
यसो गरेर हेर्नुहोस्:
-
जीवनसाथीसित गम्भीर विषयमा कुरा गर्न लाग्नुभएको छ भने पहिले यहोवासित प्रार्थना गर्नुहोस्। शान्त भएर कुरा गर्न र आफ्नो कुरामा जिद्दी नगर्न मदत माग्नुहोस्।
-
के भन्ने अनि कसरी भन्ने, पहिल्यै विचार गर्नुहोस्।
३ मिलेर काम गर्नुहोस्
बाइबल के भन्छ? विवाह गरेपछि तपाईंहरू दुवै “एउटै शरीर” हुनुभयो। (मत्ती १९:५) तैपनि तपाईंहरूको व्यक्तित्व अनि सोच्ने तरिका फरक-फरक छ। त्यसैले सहमतिमा पुग्न र एकअर्काको भावना बुझ्न दुवैले सिक्नुपर्छ। (फिलिप्पी २:२) निर्णय गर्दा दुवै जना एकअर्काको कुरामा सहमत हुनु आवश्यक छ। बाइबल यसो भन्छ, ‘सल्लाह लिएर योजनाहरू बनाऊ।’ (हितोपदेश २०:१८, NRV) त्यसैले महत्त्वपूर्ण निर्णय गर्नुअघि बाइबलमा कस्तो सल्लाह दिइएको छ, खोज्नुहोस्।—हितोपदेश ८:३२, ३३.
यसो गरेर हेर्नुहोस्:
-
रिपोर्ट दिएजस्तो गरी कुरा नगर्नुहोस्; मनमा लागेको कुरा खुलेर बताउनुहोस्।
-
कसैलाई वचन दिनुअघि जीवनसाथीसित सरसल्लाह गर्नुहोस्।
a बाइबलअनुसार परमेश्वरको नाम यहोवा हो।
अन्य रोचक विषयहरू
प्रहरीधरहरा
विवाहको पहिलो वर्ष सफलतापूर्वक पार गर्ने
प्रहरीधरहरा
पतिहरू हो—आफ्नो परिवारलाई सुरक्षित राख्नुहोस्
कुनै परिवार आर्थिक रूपमा सुरक्षित भए तापनि अझ महत्त्वपूर्ण कुरा, भावनात्मक रूपमा असुरक्षित हुन सक्छ।
बाइबलसम्बन्धी प्रश्नहरूको जवाफ
के बाइबलले मेरो परिवार सुखी बनाउन मदत गर्न सक्छ?
बाइबलमा दिइएका व्यावहारिक सल्लाह पालन गर्दा लाखौं मानिसको परिवार आनन्दित भएको छ।
