1   மாண்புமிகு தெயோப்பிலு+ அவர்களே, நாம் முழுமையாக நம்புகிற உண்மைச் சம்பவங்களைத் தொகுத்து எழுத நிறைய பேர் அதிக முயற்சி எடுத்திருக்கிறார்கள்.+ ²  கடவுளுடைய செய்தியை அறிவிக்கிற ஊழியர்கள் தாங்கள் ஆரம்பத்திலிருந்து நேரில் பார்த்த+ அந்த உண்மைச் சம்பவங்களை நம்மிடம் சொன்னார்கள்.+ ³  எல்லா விஷயங்களையும் ஆரம்பத்திலிருந்தே நான் துல்லியமாக ஆராய்ந்திருப்பதால், நானும்கூட அவற்றை சரியான வரிசையில் உங்களுக்கு எழுதத் தீர்மானித்தேன். ⁴  வாய்மொழியாக உங்களுக்குக் கற்றுக்கொடுக்கப்பட்ட விஷயங்கள்+ எவ்வளவு நம்பகமானவை என்பதை இந்தப் பதிவிலிருந்து நீங்கள் முழுமையாகத் தெரிந்துகொள்வீர்கள். ⁵  யூதேயாவின் ராஜாவாகிய ஏரோதுவின்* காலத்தில்,+ சகரியா என்ற ஆலய குரு ஒருவர் இருந்தார்; அவர் அபியா+ என்ற குருத்துவப் பிரிவைச் சேர்ந்தவர்; அவருடைய மனைவியின் பெயர் எலிசபெத்; அவள் ஆரோனின் வம்சத்தில் வந்தவள். ⁶  அவர்கள் இரண்டு பேரும் யெகோவாவுக்கு* முன்னால் நீதியுள்ளவர்களாக இருந்தார்கள், குற்றமற்றவர்களாக நடந்தார்கள்; ஏனென்றால், அவருடைய எல்லா கட்டளைகளுக்கும் சட்டங்களுக்கும் அவர்கள் கீழ்ப்படிந்தார்கள். ⁷  ஆனால், அவர்களுக்குக் குழந்தை இல்லை; ஏனென்றால், எலிசபெத் கருத்தரிக்க முடியாதவளாக இருந்தாள்; அதோடு, அவர்கள் இரண்டு பேரும் ரொம்ப வயதானவர்களாக இருந்தார்கள். ⁸  சகரியாவுடைய குருத்துவப் பிரிவின்+ முறை வந்தபோது, அவர் கடவுளுக்கு முன்னால் குருவாகச் சேவை செய்துகொண்டிருந்தார். ⁹  குருத்துவப் பணியின் வழக்கப்படி, தூபம் காட்டுவதற்கு+ சகரியாவின் முறை வந்தபோது அவர் யெகோவாவின்* ஆலயத்துக்குள்+ போனார். ¹⁰  தூபம் காட்டப்படுகிற நேரத்தில், திரண்டு வந்திருந்த மக்கள் எல்லாரும் வெளியே ஜெபம் செய்துகொண்டிருந்தார்கள். ¹¹  அப்போது, தூபபீடத்தின் வலது பக்கத்தில் சகரியாவுக்கு முன்னால் யெகோவாவின்* தூதர் வந்து நின்றார். ¹²  அவரைப் பார்த்ததும் சகரியா குழப்பமும் பயமும் அடைந்தார். ¹³  ஆனால் தேவதூதர் அவரிடம், “சகரியாவே, பயப்படாதே; உன்னுடைய மன்றாட்டைக் கடவுள் கேட்டார்; உன் மனைவி எலிசபெத்துக்கு ஒரு மகன் பிறப்பான்; நீ அவனுக்கு யோவான் என்று பெயர் வைக்க வேண்டும்.+ ¹⁴  நீ சந்தோஷத்தில் திக்குமுக்காடிப்போவாய்; அவனுடைய பிறப்பால் நிறைய பேர் சந்தோஷப்படுவார்கள்.+ ¹⁵  யெகோவாவின்* பார்வையில் அவன் உயர்ந்தவனாக இருப்பான்.+ திராட்சமதுவையோ வேறெந்த மதுவையோ அவன் குடிக்கக் கூடாது.+ தாயின் கர்ப்பத்தில் இருக்கும்போதே கடவுளுடைய சக்தியால் அவன் நிரப்பப்பட்டிருப்பான்.+ ¹⁶  இஸ்ரவேலர்களில் நிறைய பேரை அவர்களுடைய கடவுளாகிய யெகோவாவின்* பக்கம் மறுபடியும் கொண்டுவருவான்.+ ¹⁷  அதோடு, கடவுளுக்கு முன்னே போய், எலியாவுக்கு இருந்த அதே ஆர்வத்துடிப்போடும் வல்லமையோடும் செயல்படுவான்;+ தகப்பன்களின் உள்ளத்தைப் பிள்ளைகளுடைய உள்ளத்தைப் போல மாற்றுவான்;*+ கீழ்ப்படியாதவர்களைத் திருத்தி நீதிமான்களைப் போல் ஞானமாக நடப்பதற்கு உதவி செய்வான்; இப்படி, யெகோவாவுக்கு* ஏற்ற ஒரு ஜனத்தைத் தயார்படுத்துவான்”+ என்று சொன்னார். ¹⁸  சகரியா அந்தத் தேவதூதரிடம், “இதை நான் எப்படி நம்புவேன்? நான் வயதானவன், என் மனைவிக்கும் வயதாகிவிட்டதே” என்று சொன்னார். ¹⁹  அதற்கு அந்தத் தேவதூதர், “நான் காபிரியேல்;+ கடவுளுடைய முன்னிலையில் நிற்பவன்;+ உன்னிடம் பேசுவதற்கும் இந்த நல்ல செய்தியை உனக்குச் சொல்வதற்கும் அனுப்பப்பட்டேன். ²⁰  இதோ! குறித்த காலத்தில் நிறைவேறப்போகிற என் வார்த்தைகளை நீ நம்பாததால், இவையெல்லாம் நடக்கும் நாள்வரை பேச முடியாமல் ஊமையாக இருப்பாய்” என்று சொன்னார். ²¹  இதற்கிடையே, சகரியாவுக்காக மக்கள் காத்துக்கொண்டிருந்தார்கள்; ரொம்ப நேரமாகியும் அவர் ஆலயத்திலிருந்து வெளியே வராததால் அவர்கள் ஆச்சரியப்பட்டார்கள். ²²  அவர் வெளியே வந்தபோது அவர்களிடம் அவரால் பேச முடியவில்லை; அதனால், ஆலயத்துக்குள் அவர் ஓர் அற்புதக் காட்சியை* பார்த்திருக்க வேண்டுமென்று அவர்கள் புரிந்துகொண்டார்கள்; அவர் அவர்களிடம் சைகைகளாலேயே பேசிவந்தார், அவருக்குப் பேச்சே வரவில்லை. ²³  பரிசுத்த சேவை செய்கிற நாட்கள் முடிவடைந்தபோது, அவர் தன்னுடைய வீட்டுக்குத் திரும்பிப் போனார். ²⁴  சில நாட்களுக்குப் பின்பு, அவருடைய மனைவி எலிசபெத் கர்ப்பமானாள்; ஐந்து மாதங்களுக்கு வெளியே போகாமல் வீட்டிலேயே இருந்தாள். ²⁵  “யெகோவா* என்னை இப்போது ஆசீர்வதித்திருக்கிறார்; என்னுடைய நிலைமையைப் பார்த்து, மக்கள் மத்தியில் எனக்கு ஏற்பட்ட அவமானத்தை நீக்கிவிட்டார்”+ என்று மனதுக்குள் சொல்லிக்கொண்டாள். ²⁶  ஆறாவது மாதத்தில், கலிலேயாவில் இருக்கிற நாசரேத் என்ற நகரத்தில் குடியிருந்த ஒரு கன்னிப்பெண்ணிடம் காபிரியேல் தேவதூதரைக்+ கடவுள் அனுப்பினார். ²⁷  தாவீதின் வம்சத்தில் வந்த யோசேப்புக்கும் அவளுக்கும் திருமணம் நிச்சயிக்கப்பட்டிருந்தது; அந்தக் கன்னிப்பெண்ணின்+ பெயர் மரியாள்.+ ²⁸  மரியாளிடம் தேவதூதர் வந்து, “கடவுளுக்கு மிகவும் பிரியமானவளே, வாழ்த்துக்கள்! யெகோவா* உன்னோடு இருக்கிறார்” என்று சொன்னார். ²⁹  அவர் சொன்னதைக் கேட்டு அவள் மிகவும் கலக்கமடைந்து, அந்த வாழ்த்துதலுக்கு என்ன அர்த்தம் என்று யோசிக்க ஆரம்பித்தாள். ³⁰  அதனால் தேவதூதர் அவளிடம், “மரியாளே, பயப்படாதே; நீ கடவுளுக்குப் பிரியமானவள். ³¹  இதோ! நீ கர்ப்பமாகி ஒரு மகனைப் பெற்றெடுப்பாய்;+ அவருக்கு இயேசு என்று நீ பெயர் வைக்க வேண்டும்.+ ³²  அவர் உயர்ந்தவராக இருப்பார்;+ உன்னதமான கடவுளின் மகன் என்று அழைக்கப்படுவார்;+ அவருடைய தந்தையான தாவீதின் சிம்மாசனத்தைக் கடவுளாகிய யெகோவா* அவருக்குக் கொடுப்பார்.+ ³³  அவர் ராஜாவாக யாக்கோபுடைய வம்சத்தை என்றென்றும் ஆட்சி செய்வார்; அவருடைய ஆட்சிக்கு முடிவே இருக்காது”+ என்று சொன்னார். ³⁴  அப்போது மரியாள், “இது எப்படி நடக்கும்? நான் கன்னிப்பெண்ணாக இருக்கிறேனே”*+ என்றாள். ³⁵  அதற்கு அவர், “கடவுளுடைய சக்தி உன்மேல் வரும்;+ உன்னதமான கடவுளுடைய வல்லமை உன்மேல் தங்கும். அதனால், உனக்குப் பிறக்கப்போகும் குழந்தை பரிசுத்தமானது என்றும்,+ கடவுளுடைய மகன் என்றும் அழைக்கப்படும்.+ ³⁶  இதோ! உன் சொந்தக்காரப் பெண் எலிசபெத்தும் வயதான காலத்தில் ஒரு மகனை வயிற்றில் சுமக்கிறாள்; மலடி என்று அழைக்கப்பட்ட அவளுக்கு இது ஆறாவது மாதம். ³⁷  கடவுளால் நிறைவேற்ற முடியாத வாக்குறுதி* எதுவுமே இல்லை”+ என்று சொன்னார். ³⁸  அதற்கு மரியாள், “இதோ! நான் யெகோவாவின்* அடிமைப் பெண்! நீங்கள் சொன்னபடியே எனக்கு நடக்கட்டும்” என்றாள். அப்போது, தேவதூதர் அவளைவிட்டுப் போனார். ³⁹  மரியாள் உடனடியாகப் புறப்பட்டு, மலைப்பகுதியில் இருக்கிற யூதாவிலுள்ள ஒரு நகரத்துக்கு வேகமாகப் போனாள். ⁴⁰  அவள் சகரியாவின் வீட்டுக்குள் போய், எலிசபெத்துக்கு வாழ்த்துச் சொன்னாள். ⁴¹  மரியாள் சொன்ன வாழ்த்தை எலிசபெத் கேட்டபோது, அவளுடைய வயிற்றிலிருந்த குழந்தை துள்ளியது; எலிசபெத் கடவுளுடைய சக்தியால் நிரப்பப்பட்டு, ⁴²  “நீ பெண்களிலேயே மிகவும் ஆசீர்வதிக்கப்பட்டவள்; உன் வயிற்றிலுள்ள குழந்தையும் ஆசீர்வதிக்கப்பட்டது! ⁴³  என் எஜமானுடைய தாய் என்னைப் பார்க்க வருவதற்கு நான் என்ன பாக்கியம் செய்தேன்! ⁴⁴  இதோ! நீ வாழ்த்திய சத்தம் என் காதில் விழுந்தவுடனே, என் வயிற்றிலுள்ள குழந்தை சந்தோஷத்தில் துள்ளியது. ⁴⁵  யெகோவாவின்* வார்த்தையை நம்பிய நீ சந்தோஷமானவள்; அவர் உனக்குச் சொன்னதெல்லாம் முழுமையாக நிறைவேறும்” என்று உரத்த குரலில் சொன்னாள். ⁴⁶  அப்போது மரியாள், “யெகோவாவை* நான் மகிமைப்படுத்துகிறேன்.+ ⁴⁷  என் மீட்பராகிய கடவுளை நினைத்து என் உள்ளம் மகிழ்ச்சியில் பொங்குகிறது.+ ⁴⁸  ஏனென்றால், அவர் தன்னுடைய அடிமைப் பெண்ணின் தாழ்ந்த நிலையைக் கவனித்திருக்கிறார்.+ இதுமுதல் எல்லா தலைமுறையினரும் என்னைச் சந்தோஷமானவள்+ என்று புகழ்வார்கள். ⁴⁹  ஏனென்றால், வல்லமையுள்ள கடவுள் எனக்காக அற்புதமான செயல்களைச் செய்திருக்கிறார்; அவருடைய பெயர் பரிசுத்தமானது.+ ⁵⁰  அவருக்குப் பயந்து நடப்பவர்களுக்குத் தலைமுறை தலைமுறையாக அவர் இரக்கம் காட்டுகிறார்.+ ⁵¹  அவர் தன்னுடைய கைகளால் வல்லமையான செயல்களைச் செய்திருக்கிறார். இதயத்தில் கர்வமுள்ளவர்களைச் சிதறிப்போக வைத்திருக்கிறார்.+ ⁵²  அதிகாரமுள்ளவர்களைச் சிம்மாசனங்களிலிருந்து இறக்கியிருக்கிறார்,+ தாழ்ந்தவர்களை உயர்த்தியிருக்கிறார்.+ ⁵³  ஏழைகளுக்கு* நல்ல நல்ல காரியங்களைக் கொடுத்து முழுமையாகத் திருப்திப்படுத்தியிருக்கிறார்;+ பணக்காரர்களை வெறுங்கையோடு அனுப்பியிருக்கிறார். ⁵⁴  ஆபிரகாமுக்கும் அவருடைய சந்ததிக்கும் என்றென்றும் இரக்கம் காட்டுவதாக+ நம்முடைய முன்னோர்களுக்குக் கொடுத்த வாக்குறுதியை நினைத்துப் பார்த்து,+ ⁵⁵  தன்னுடைய ஊழியனான இஸ்ரவேலுக்கு உதவி செய்திருக்கிறார்” என்று சொன்னாள். ⁵⁶  மரியாள் சுமார் மூன்று மாதங்கள் அவளோடு தங்கிவிட்டு, தன் வீட்டுக்குத் திரும்பி வந்தாள். ⁵⁷  எலிசபெத்துக்குப் பிரசவ நேரம் வந்தது, அவள் ஒரு மகனைப் பெற்றெடுத்தாள். ⁵⁸  அவளுக்கு யெகோவா* மிகுந்த இரக்கம் காட்டியதை அக்கம்பக்கத்தாரும் சொந்தக்காரர்களும் கேள்விப்பட்டபோது, அவளோடு சேர்ந்து சந்தோஷப்பட்டார்கள்.+ ⁵⁹  எட்டாம் நாளில் அந்தக் குழந்தைக்கு விருத்தசேதனம் செய்வதற்காக+ அவர்கள் எல்லாரும் கூடிவந்தார்கள்; அதற்கு சகரியா என்று அதன் அப்பாவின் பெயரையே வைக்கலாம் என்று நினைத்தார்கள். ⁶⁰  ஆனால் குழந்தையின் அம்மா, “வேண்டாம்! இவனுக்கு யோவான் என்று பெயர் வைக்க வேண்டும்” என்று சொன்னாள். ⁶¹  அதற்கு அவர்கள், “உன் சொந்தக்காரர்களில் யாருக்குமே இந்தப் பெயர் இல்லையே” என்று சொன்னார்கள். ⁶²  பின்பு, குழந்தைக்கு என்ன பெயர் வைக்க விரும்புகிறார் என்று அதன் அப்பாவிடம் சைகையால் கேட்டார்கள். ⁶³  அவர் ஒரு பலகையைக் கொண்டுவரச் சொல்லி, “யோவான் என்று பெயர் வைக்க வேண்டும்”+ என்று எழுதினார். அதைப் பார்த்து எல்லாரும் ஆச்சரியப்பட்டார்கள். ⁶⁴  அந்த நொடியே அவருக்குப் பேச்சு வந்துவிட்டது;+ அவர் கடவுளைப் போற்றிப் புகழ ஆரம்பித்தார். ⁶⁵  அக்கம்பக்கத்தார் எல்லாரும் பயந்துபோனார்கள்; நடந்த விஷயங்களெல்லாம் யூதேயா மலைப்பகுதியெங்கும் பேசப்பட்டது. ⁶⁶  அவற்றைக் கேள்விப்பட்ட எல்லாரும் அவற்றை மனதில் வைத்துக்கொண்டு, “இந்தப் பிள்ளை எப்படிப்பட்ட ஆளாக ஆவானோ?” என்று சொல்லிக்கொண்டார்கள். உண்மையிலேயே, யெகோவா* அந்தக் குழந்தையோடு இருந்தார்.* ⁶⁷  அதன் அப்பாவாகிய சகரியா கடவுளுடைய சக்தியால் நிரப்பப்பட்டு இப்படித் தீர்க்கதரிசனம் சொன்னார்: ⁶⁸  “இஸ்ரவேலின் கடவுளாகிய யெகோவா* புகழப்படட்டும்.+ ஏனென்றால், அவர் தன்னுடைய மக்கள்மேல் கவனத்தைத் திருப்பி, அவர்களுக்கு விடுதலை கொடுத்திருக்கிறார்.+ ⁶⁹  பண்டைய காலம்முதல் தன்னுடைய பரிசுத்த தீர்க்கதரிசிகள் மூலம் சொன்னபடியே,+ ⁷⁰  பலம்படைத்த மீட்பர் ஒருவரை*+ தன்னுடைய ஊழியனாகிய தாவீதின் வம்சத்தில்+ நமக்காக வர வைத்திருக்கிறார்; ⁷¹  நம் எதிரிகளிடமிருந்தும் நம்மை வெறுக்கிற எல்லாரிடமிருந்தும் மீட்பதற்காகவும்,+ ⁷²  நம் முன்னோர்களுக்கு இரக்கம் காட்டுவதாக அவர் கொடுத்த வாக்குறுதியை+ நிறைவேற்றுவதற்காகவும் அந்த மீட்பரை வர வைத்திருக்கிறார். ⁷³  நம் மூதாதையான ஆபிரகாமுக்கு ஆணையிட்டுக் கொடுத்த பரிசுத்த ஒப்பந்தத்தை+ நினைத்துப் பார்ப்பதற்காகவும், ⁷⁴  ஆணையிட்டுக் கொடுத்தபடி, எதிரிகளுடைய கைகளிலிருந்து நம்மைக் காப்பாற்றி, ⁷⁵  நாம் உயிரோடிருக்கிற காலமெல்லாம் உண்மையோடும்* நீதியோடும் தைரியத்தோடும் அவர்முன் பரிசுத்த சேவை செய்கிற பாக்கியத்தை நமக்குக் கொடுப்பதற்காகவும் அவரை வர வைத்திருக்கிறார். ⁷⁶  குழந்தையே, நீ உன்னதமான கடவுளுடைய தீர்க்கதரிசி என்று அழைக்கப்படுவாய்; யெகோவாவுக்கு* முன்னே போய் அவருக்காக வழிகளைத் தயார்படுத்துவாய்.+ ⁷⁷  நம் கடவுள் காட்டுகிற கரிசனையால் அவருடைய மக்களுக்குப் பாவ மன்னிப்பின் மூலம் கிடைக்கிற மீட்பைப் பற்றிச் சொல்வாய்.+ ⁷⁸  இந்தக் கரிசனையால், சூரிய உதயத்தைப் போன்ற ஓர் ஒளி மேலே இருந்து நம்மிடம் வந்து, ⁷⁹  இருட்டிலும் மரணத்தின் நிழலிலும் உட்கார்ந்திருப்பவர்களுக்கு வெளிச்சத்தைத் தரும்;+ அதோடு, நம்முடைய கால்களைச் சமாதான வழியில் கொண்டுபோகும்.” ⁸⁰  குழந்தையாக இருந்த யோவான் வளர்ந்து ஆளானார், மனவலிமை பெற்றார்; இஸ்ரவேலர்களுக்குப் பிரசங்கிக்க ஆரம்பிக்கும்வரை வனாந்தரத்திலேயே வாழ்ந்துவந்தார்.