Ebɛn Kwan Do Na Jesus N’afɔrbɔ No Yɛ ‘Werdam Ma Dodowara’?

BƆ

Mbuae a Bible no dze ma

Nyankopɔn nam Jesus n’afɔrbɔ no do na ɔbɛgye adasamba efi bɔn nye owu mu. Bible no ma yehu dɛ, Jesus dze no bɔgyaa yɛɛ werdam maa nyimpa. (Ephesusfo 1:7; 1 Peter 1:18, 19) Dɛm ntsi, Jesus kaa dɛ ɔbaa asaase yi do ‘dze no nkwa bɛyɛɛ werdam maa dodowara.’—Matthew 20:28.

Ebɛnadze ntsi na yehia werdam?

Adam na ɔyɛ nyimpa a odzi kan a wɔbɔɔ no. Nna ɔyɛ ɔbarimba a odzi mu a mfom nnyi noho. Adam nyaa hokwan dɛ ɔbɛtsena ase daa, naaso oenntsie Nyankopɔn. Ntsi, ɔhweer dɛm hokwan yi. (Genesis 3:17-19) Aber a ɔwoe no, bɔn a ɔyɛe no ho nsunsuando no kaa ne mba. (Romefo 5:12) Iyi ntsi, Bible no ka dɛ Adam ‘atɔn’ ɔno nye ne mba akɔ bɔn nye owu nkowaayɛ mu. (Romefo 7:14) Hɛn nyina yɛ nyimpa a yenndzi mu, dɛm ntsi yerunntum nntua dza Adam ahwer no ho kaw.—Ndwom 49:7, 8.

Nyankopɔn nyaa ayamuhyehye maa Adam n’asefo wɔ tsebea a enyidado biara nnyi mu a nna wɔwɔ mu no ho. (John 3:16) Naaso, nna Nyankopɔn ne mbra a ɔfa atsɛntsenenee ho no hwehwɛ dɛ onya biribi gyina do ana ɔdze hɛn bɔn akyɛ hɛn. (Ndwom 89:14; Romefo 3:23-26) Nyankopɔn dɔ adasamba paa, ntsi ɔyɛɛ nhyehyɛɛ a obegyina do dze hɛn bɔn bɛkyɛ hɛn, na ber kor no ara so ɔaapepa hɛn bɔn efi hɔ koraa. (Romefo 5:6-8) Dɛm nhyehyɛɛ no nye werdam no.

Ebɛn dwuma na werdam no dzi?

Bible no mu no, sɛ wɔka “werdam” a, ndzɛmba ebiasa yi na ɔba adwen mu:

Ɔyɛ biribi ho kaw a wotua.—Nkanee 3:46, 47.
Ɔma obi nya ɔgye anaa nkwa.—Exodus 21:30.
Ɔnye dza worutua ho kaw no bo yɛ pɛr. a

Hom mma yɛnhwɛ mbrɛ dɛm ndzɛmba ebiasa yi si fa Jesus Christ no werdam afɔrbɔ no ho.

Biribi ho kaw a wotua. Bible no ka dɛ wɔtɔɔ Christianfo “aboɔdzen.” (1 Corinthfo 6:20; 7:23) Bo a wɔdze tɔɔ Christianfo nye Jesus no bɔgyaa no. Dɛm bɔgya yi na ɔdze ‘tɔɔ binom maa Nyankopɔn a wofi mbusuakuw nye kasa, nye nkorɔfo, nye aman nyina mu.’—Nyikyerɛ 5:8, 9.
Ɔgye anaa nkwa a ɔma obi nya. Jesus n’afɔrbɔ no yɛ werdam a ɔma ‘wɔgye hɛn’ fi bɔn mu.—1 Corinthfo 1:30; Colossaefo 1:14; Hebrewfo 9:15.
Ɔnye dza worutua ho kaw no bo yɛ pɛr. Jesus n’afɔrbɔ no nye nkwa a Adam hweree no yɛ pɛr. Hɔn beenu no hɔn nkwa yɛ dza nna odzi mu. (1 Corinthfo 15:21, 22, 45, 46) Bible no ka dɛ: “Dɛ mbrɛ dodowara nam nyimpa kor [Adam] n’asoɔdzen do bɛyɛɛ ndzebɔnyɛfo no, mbrɛ dodowara nam ɔbaakofo [Jesus Christ] ne setsie do bɛyɛ atseneneefo nye no.” (Romefo 5:19) Iyi ma yehu siantsir a ɔbaakofo no wu botum etua ndzebɔnyɛfo pii hɔn bɔn ho kaw no. Nokwasɛm nye dɛ, Jesus n’afɔrbɔ no yɛ “asatsir” anaa werdam a ɔfata ma nyimpa nyina a wɔyɛ dza wobotum biara dɛ wobenya do mfaso no.—1 Timothy 2:5, 6.

a Sɛ ehwɛ kasa a wɔdze kyerɛɛw Bible no a, kasafua a wɔkyerɛɛ ase “werdam” no kyerɛ biribi no bo anaa biribi ho kaw a wotua. Dɛ nhwɛdo do no, dza Hebrew nyɛe kasafua ka·pharʹ kyerɛɛ ankasa nye “tar” anaa kata. (Genesis 6:14) Wɔtaa dze kyerɛ bɔn a wɔpepa. (Ndwom 65:3) Hebrew dzin kasafua fofor a ɔnye no dzi nsɛ nye koʹpher, na ɔkyerɛ kaw a wotua dze pepa dɛm bɔn no, anaa wɔdze gye obi nkwa. (Exodus 21:30) Dɛmara so na yɛwɔ Greek kasafua lyʹtron a wɔtaa kyerɛ ase “werdam.” Wotum so kyerɛ ase dɛ “kaw a wotua dze gye obi.” (Matthew 20:28; The New Testament in Modern Speech, by R. F. Weymouth) Nna Greek akyerɛwfo taa dze kasafua yi dzi dwuma dze kyerɛ kaw a wotua dze gye obi a wɔafa no ndɔmmum wɔ ɔko mu anaa kaw a wotua dze gye obi fi nkowaasom mu.