Despué de stale iza de biʼniʼ guiar Moisés guidxi Israel, yanna mayaca guiluxe xquendanabánibe. Gudxi Jiobá laabe: «Cadi lii diouʼ nga chineluʼ ca israelita ndaaniʼ Tierra Prometida. Peru zudieeʼ lugar gúʼyaluʼ ni». Nga runi, gunabaʼ Moisés Jiobá cuiʼ sti xaíque ni gapa guidxi que. Bicabi Jiobá laabe: «Guyé ra nuu Josué ne gudxi laa, laa nga ni maʼ gulieeʼ».

Gudxi Moisés guidxi que, mayaca gatiʼ ne maʼ gulí Jiobá Josué para guni guiar laacabe ndaaniʼ Tierra Prometida. Óraque gudxi Moisés Josué: «Cadi guidxíbiluʼ. Zacané Jiobá lii». Despué de ngue, gudxiʼbaʼ Moisés ique dani Nebo. Dede raqué, biluíʼ Jiobá laabe layú ni biʼniʼ prometer Abrahán, Isaac ne Jacob. Napa Moisés ti gayuaa gande iza dxi gutiʼ.

Gudxi Jiobá Josué: «Gudiʼdiʼ guiiguʼ Jordán ne biuu Canaán. Naa zacaniáʼ lii, cásica gucaniáʼ Moisés. Cadi guiaandaʼ lii gúʼndaluʼ Ley stinneʼ guiráʼ dxi. Cadi guidxíbiluʼ, naquiiñeʼ gácaluʼ nadxibalú. Guyé ne biʼniʼ guiráʼ ni maʼ bineʼ mandar lii».

 Biseendaʼ Josué chupa espía ndaaniʼ guidxi Jericó. Lu sti historia ca zazíʼdinu xcaadxi de ni guca raqué. Ora bibiguetaʼ ca espía de Jericó, guniʼcaʼ maʼ zanda chúʼcabe Canaán. Sti dxi que, gudxi Josué guidxi que gutópacaʼ guiráʼ ca cosa sticaʼ. Primeru biseendabe ca sacerdote sanírucaʼ né Arca stiʼ pactu ra guiiguʼ Jordán. Dxátipa guiiguʼ que, peru casi bizuhuaa ñee ca sacerdote ndaaniʼ nisa que, bisaana de guxooñeʼ nisa stini ne bibidxi ni. Guzá ca sacerdote ndaaniʼ guiiguʼ que, ne ora yendácabe galaa, bizuhuaadxícabe raqué ne gulézacabe gudiʼdiʼ guidubi guidxi que dede ra yendacaʼ sti ladu. Ora bíʼyacabe milagru riʼ, ¿ñee rábiluʼ bietenaláʼdxicabe ni biʼniʼ Jiobá pur laacabe ndaaniʼ nisadóʼ Xiñáʼ que la?

Despué de stale iza, yendá ca israelita lu Tierra Prometida. Yanna huaxa maʼ zanda gucuicaʼ lídxicaʼ ne gápacaʼ guidxi sticaʼ. Zanda gúnicaʼ dxiiñaʼ lu layú para gápacaʼ lubáʼ uva, cuananaxhi ne verdura. Guca ni ti layú ra ridá leche ne miel.