Gudxi Jiobá Samuel: «Guyé ra lidxi Jesé, purtiʼ tobi de ca xiiñibe chigaca rey stiʼ Israel». Ngue runi biree Samuel zeʼ, ora yendabe biiyabe baʼduʼ primé stiʼ Jesé, óraque guníʼ íquebe: «Seguru ndiʼ nga ni maʼ gulí Jiobá». Peru Jiobá gudxi Samuel coʼ, ne bisiénebe laa: «Naa nannaʼ ximodo naca cada binni ne qué ruuyaʼ modo si rihuínnicabe pur fuera».

Bedané Jesé xi xhoopaʼ xiiñiʼ ra nuu Samuel. Peru Samuel gudxi laabe: «Nin tobi de laacabe qué nibí Jiobá. ¿Naparouʼ xiiñiluʼ la?». Para ná Jesé: «Nuu stobi ni jma nahuiiniʼ láʼ David, canayapa dendxuʼ». Ora bedandá David, gudxi Jiobá Samuel: «¡Laabe nga ni maʼ gulieeʼ!». Óraque bindaateʼ Samuel aceite ique David. Zaqué biʼniʼ ungir Samuel laabe para gácabe rey stiʼ Israel.

Tiempu despué, gudindené ca israelita ca filisteu, ne gupa ca filisteu que ti soldadu gigante láʼ Goliat. Guiráʼ dxi, runi búrlabe ca israelita ne maʼ caniʼbe reciu: «Laguseendaʼ ti hombre tindené naa. Pa guni ganarbe naa la? zácadu esclavu stitu. Peru pa guneʼ ganar la? zácatu esclavu stidu».

Guyé David ra campamentu stiʼ ca soldadu israelita, yesaana guendaró stiʼ ca biʼchiʼ purtiʼ soldadu laacaʼ. Raqué binadiágabe guiráʼ ni caníʼ Goliat, óraque ná David: «¡Naa tindeniáʼ laabe!». Para ná rey Saúl rabi laabe: «Qué zanda diʼ, nahuiinirouʼ». Gudxi David laabe: «Zacané Jiobá naa».

 Ngue runi bitiiñeʼ Saúl David armadura stiʼ ni riné lu guerra. Peru David guníʼ: «Qué zanda diʼ tindeʼ pa gacuaʼ armadura stiluʼ ca». Ngue runi gucuaa David guixhe bixeendaʼ stiʼ (ti honda), laani nga ti tira ni rundaanécabe guié. Guyebe ra nuu ti guiiguʼ, gundísabe gaayuʼ guié lisu ne guluube ni ndaaniʼ murral stibe. Óraque bixooñebe ra nuu Goliat. Bicaa Goliat ti ridxi ná: «¡Lii, hombrehuiiniʼ, bidxiña ti guʼyuʼ! Zuxuuxeʼ lii, ne zuneʼ lii guendaró para ca pájaru ne ca maniʼ guiʼxhiʼ ca». Peru qué nidxibi David ne bicabi: «Lii zeeduʼ ra nuaaʼ né ti espada ne ti lanza, peru naa zendaʼ lu lá Jiobá. Cadi laadu nga cucaaluluʼ, Dios stidu nga cucaaluluʼ. Guiráʼ cani nuu raríʼ zuuyaʼ jma nadipaʼ Jiobá que ti espada o ti lanza. Ne laabe zacanebe laadu guni ganardu».

Óraque, gucuaa David ti guié guluuni ndaaniʼ guixhe bixeendaʼ stiʼ ne bindaani né guiráʼ stipa stiʼ. Gucané Jiobá para gucuá guié que biaʼsi lucuá Goliat. Guti gigante que. Ngue runi bixooñeʼ ca filisteu que para cadi guuti ca israelita que laacaʼ. ¿Lii yaʼ? ¿Ñee nápaluʼ confianza Jiobá cásica gupa David ni la?