Ester nga ti baʼdudxaapaʼ judía ni bibani ndaaniʼ ti guidxi stiʼ Persia láʼ Susa. Bisiniisi xprímube Mardoqueo laabe, laa guca tobi de ca hombre biʼniʼ xhiiñaʼ Asuero rey stiʼ Persia.

Rey Asuero gucalaʼdxiʼ ti reina cubi. Ngue runi yené ca hombre runi xhiiñabe ca baʼdudxaapaʼ jma sicarú de guidxi que ra nuube, ne Ester nga tobi de ca baʼdudxaapaʼ que. De lade guirácabe, gulí rey riʼ Ester para gaca reina. Gudxi Mardoqueo Ester cadi guiníʼ pa judía laa.

Ti hombre nabé orgulloso láʼ Hamán ni guca jefe stiʼ ca príncipe, gucalaʼdxiʼ nuzuxibi guiráʼ binni nezalú. Peru Mardoqueo qué ñuni ni. Guizáʼ bidxiichi Hamán dede gucalaʼdxiʼ ñuuti laabe. Ora gunna Hamán judíu Mardoqueo la? guníʼ ique guni xiixa para guti guiráʼ ca judíu nuu ndaaniʼ guidxi que. Gúdxibe rey que: «Guizáʼ malu ca judíu, naquiiñeʼ guutinu laacabe». Rey que bicabi laabe: «Biʼniʼ ni rábiluʼ jma jneza». Ne bidii lugar laabe gúnibe ti ley. Ley que ná guuti binni ca judíu dxi 13 stiʼ beeu adar. Peru cayuuyaʼ Jiobá guiráʼ ni cayaca que.

Cumu qué ganna Ester gastiʼ de ley que la? ngue runi biseendaʼ Mardoqueo copia stiʼ ley que ra nuube ne gudxi laabe: «Caquiiñeʼ guiníʼneluʼ rey ca». Bicabi Ester laabe: «Tutiica cheʼ ra nuu rey ca sin gaca invitar naquiiñeʼ gatiʼ. Ne maʼ napa 30 dxi de qué huayuni invitarbe naa. Peru ziaaʼ. Pa gusigaanabe vara de oro stibe nezaluáʼ, zabaneʼ. Peru pa coʼ la? zateʼ».

Guyé Ester ra palaciu stiʼ rey que. Ora biʼyaʼ rey que laabe, bisigaanáʼ vara de oro stiʼ nezalube. Bidxiña Ester ra nuube, ne óraque gunabadiidxaʼ rey que laabe: «¿Xi racaláʼdxiluʼ, Ester?». Para bicábibe rey que: «Racalaʼdxeʼ gueeduʼ lii ne Hamán ra ti guendaró ni chiguneʼ». Ora cayócabe que, biʼniʼ invitar Ester  laacabe sti guendaró ni chiguni sti dxi que. Guiropaʼ biaje riʼ, gunabadiidxaʼ rey que laabe sti biaje: «¿Xi racaláʼdxiluʼ?». Bicabi Ester laabe: «Nuu tuuxa ni racalaʼdxiʼ guuti naa ne ca binni xquidxeʼ. Rinabaʼ lii, gulaluʼ laadu». Gunabadiidxaʼ Rey que laabe: «¿Tu nga nuu guuti lii?». Laabe bicábibe: «Hamán, hombre malu riʼ». Guizáʼ bidxiichi rey Asuero ne biʼniʼ ordenar guuticabe Hamán.

Peru guirutiʼ zanda guxhiá ley ni biʼniʼ Hamán, nin rey Asuero qué zanda guni ni. Ngue runi bíʼnibe Mardoqueo jefe stiʼ ca príncipe ne bidiibe lugar laa guni ti ley nacubi. Ley riʼ ná zanda gaca defender ca judíu ora gucaalú ca enemigu sticaʼ laacaʼ. Dxi 13 stiʼ beeu adar, biʼniʼ ganar ca judíu que ca enemigu sticaʼ, dede dxi que guiráʼ iza runi ca judíu ti saa para guietenaláʼdxicaʼ dxi biʼniʼ ganarcaʼ.