Aman bebree wɔ hɔ a, amanyɔsɛm apaapae nnipa mu. Afe 2022 mu no, adwumakuw bi a yɛfrɛ wɔn Pew Research Center yɛɛ nhwehwɛmu bi wɔ aman 19 so. Nnipa a wɔbisabisaa wɔn nsɛm no, “wuyi 100 biara a, emu 65 kaa sɛ wɔn man mu no, nnipa a ɛsono amanyɔkuw a wɔdɔm no ani nhyia koraa, na amanyɔsɛm kɔfa akasakasa a emu yɛ den ne mente-me-ho-ase ba wɔn ntam.”

 Baabi a wote no nso ɛ? Mpaapaemu a amanyɔsɛm de ba no, wuhu sɛ ɛreyɛ kɛse anaa? Wohwɛ a, adɛn nti na ɛte saa? Ano aduru wɔ hɔ? Hwɛ nea Bible ka.

 Mmere a yɛwom yi, Bible frɛ no “awiei mmere,” na ɛka too hɔ sɛ, nnipa bebree beyi suban bi adi a ɛde mpaapaemu bɛba.

•   “Hu eyi sɛ awiei mmere no mu no, mmere a emu yɛ den bɛba. Efisɛ nnipa bɛyɛ pɛsɛmenkominya, . . . nkurɔfo rentumi ne wɔn nyɛ apam.”—2 Timoteo 3:1-3.

 Nnipa bebree ayɛ biara sɛ wɔbɛma nnipa amammu akɔ yiye, nanso enkosi hwee; wɔde tare a na awae. Sɛ nnipa mmienu adwene nhyia a, wɔbrɛ paa ansa na wɔatumi aka wɔn ti apam ho asɔ ɔhaw ano, na ɛtɔ da mpo a ɛnyɛ yiye. Wei nti na nnipa amammu nkɔ yiye no, na ɛnyɛ nwanwa, efisɛ Bible aka ho asɛm ato hɔ dedaadaw. Ɛkaa sɛ:

•   “Onipa di onipa so ma ewie no bɔne.”—Ɔsɛnkafo 8:9.

 Nanso, Bible ma yehu ano aduru. Ɛne sɛ, ɛrenkyɛ aban bi bɛba, na ɔhaw ne amane a nnipa rehu no nnɛ no, nea ɔda saa aban no ano no beyi afi hɔ.

 Bible ma yehu onii a ɔfata paa sɛ odi yɛn so a obeyi yɛn haw nyinaa afi hɔ. Ɔno ne Yesu Kristo. Yesu pɛ sɛ ɔde nkabom ne asomdwoe ba wiase, na ɔwɔ tumi a ɔde bɛyɛ nso. Hwɛ nea Bible ka fa ne ho:

•   “Ne bere so no, ɔtreneeni bɛyɛ frɔmfrɔm, na asomdwoe pii bɛba.”—Dwom 72:7.

•   “Amanaman nyinaa bɛsom no.”—Dwom 72:11.

 Yesu fata paa sɛ odi yɛn so, efisɛ yɛn asɛm yɛ n’asɛm. Afei nso, ɔpɛ sɛ ɔboa nnipa, ɛnkanka wɔn a nkurɔfo asisi wɔn no.

•   “Obegye ohiani a osu frɛ no, ne mmɔborɔwa ne nea onni boafo nso. Ɔbrɛfo ne ohiani asɛm bɛyɛ no mmɔbɔ, na obegye ahiafo nkwa. Obegye wɔn afi nhyɛso ne atirimɔdensɛm mu.”—Dwom 72:12-14.

 Aban a ɛwɔ soro a yɛfrɛ no Onyankopɔn Ahenni a Yesu da ano no, hwɛ nea saa aban no bɛyɛ ama wo, ne nea wubetumi ayɛ de akyerɛ sɛ wotaa saa aban no akyi.

•   Hwɛ video a yɛato din Dɛn Ne Onyankopɔn Ahenni?

•   Kenkan asɛm a yɛato din “Onyankopɔn Ahennie—Aban a Kɛtɛasehyɛ ne Porɔeɛ Biara Nnim.”