ብ24 ለካቲት 2022፡ ሩስያ ንዩክረይን ክትወርራ ጀሚራ፣ በዚ ምኽንያት እዚ ኸኣ፡ ብሚልዮናት ዚቝጸሩ ሰባት ካብታ ሃገር ኪሃድሙ ተገዲዶም እዮም። a

 “ቦምባታትን ነተጕትን ነይሩ። ብቓላት ክትገልጾ እኳ ዜሸግር እዩ። ባቡር ከም ዘለዋ ምስ ፈለጥና፡ ክንወጽእ ወሲንና። ነፍሲ ወከፍና ሓንቲ ሻንጣ ጥራሕ ኢና ኽንሕዝ ንኽእል ኔርና። ሰነዳትን መድሃኒትን ማይን ዚብላዕ ነገራትን ጥራይ ኢና ኽንሕዝ ንኽእል ኔርና። ቦምባታት እናተፈንጀረ ንዅሉ ነገራት ራሕሪሕና ናብ መደበር ባቡር ኬድና።”—ናታልያ ኻብ ካርኪቭ፡ ዩክረይን።

 “እቲ ውግእ ፈጺምና ዘይተጸበናዮ እዩ ነይሩ። ካብ ገሊኡ ኽፋል እቲ ኸተማ ድምጺ ነታጒ ሰሚዐ፡ መሳዅቲ ኸኣ የንቀጥቅጥ ነይሩ። ዜድሊ ነገራት ጥራይ ሒዘ ክኸይድ ወሲነ። ሰዓት ሸሞንተ ናይ ንግሆ ኻብ ገዛ ወጺአ፡ ብባቡር ናብ ልቪቭ፡ ብኣውቶቡስ ከኣ ናብ ፖላንድ ከይደ።”—ናድያ ኻብ ካርኪቭ፡ ዩክረይን።

ኣብዛ ዓንቀጽ እዚኣ፦

•  ቀንዲ ጠንቂ እዚ ስደት እዚ እንታይ እዩ፧

•  ስደተኛታት ካበይ እዮም ተስፋ ዚረኽቡ፧

•  መጽሓፍ ቅዱስ ሎሚ ንዘለዉ ስደተኛታት ኪሕግዞም ይኽእል ድዩ፧

 ቀንዲ ጠንቂ እዚ ስደት እዚ እንታይ እዩ፧

 ኣብ ዩክረይን ዘጋጠመ ስደት ብምኽንያት ወራር ሩስያ እዩ። ይኹን እምበር፡ መጽሓፍ ቅዱስ፡ ቀንዲ ጠንቂ እዚ ሕጂ ዘሎ ስደት እንታይ ምዃኑ ይሕብረና እዩ፦

•   ሰብኣውያን መንግስትታት ኣብ መላእ ዓለም ንደቂ ሰብ ዜድልዮም ዘበለ ነገራት ኬማልኣሎም ኣይከኣላን። ሰበ ስልጣን ንስልጣኖም ንምጭቋን እዮም ዚጥቀምሉ።—መክብብ 4:1፣ 8:9።

•   ሰይጣን ድያብሎስ እቲ “ገዛኢ እዛ ዓለም እዚኣ” ኣብ ልዕሊ ደቂ ሰብ እኩይ ጽልዋ ኸም ዚገብር፡ መጽሓፍ ቅዱስ፡ “ብዘላ ዓለም እውን ኣብ ትሕቲ ቝጽጽር እቲ እኩይ ምህላዋ ንፈልጥ ኢና” ብምባል ይገልጽ እዩ።—ዮሃንስ 14:30፣ 1 ዮሃንስ 5:19።

•   ብዘይካ እቲ ንዘመናት ዚኣክል ኣብ ልዕሊ ደቂ ሰብ ዝወረደ ጸገማት፡ ሎሚ ኣብቲ መጽሓፍ ቅዱስ፡ “ኣብተን ዳሕሮት መዓልትታት ጽንኩር ግዜ ኸም ዚመጽእ ግና፡ እዚ ፍለጥ” ኢሉ እተዛረበሉ እዋን ኢና እንነብር ዘለና። (2 ጢሞቴዎስ 3:1) ብተወሳኺ፡ መለለዪ እዘን ዳሕሮት መዓልትታት፡ እቲ ንሰባት ከም ዚስደዱ ዚገብሮም፡ ማለት ውግእን ባህርያዊ ሓደጋታትን ጥሜትን ለበዳን ከም ዝዀነ እውን መጽሓፍ ቅዱስ ይገልጽ እዩ።—ሉቃስ 21:10, 11።

 ስደተኛታት ካበይ እዮም ተስፋ ዚረኽቡ፧

 መጽሓፍ ቅዱስ፡ እቲ ፈጣሪና ዝዀነ የሆዋ b ኣምላኽ ንስደተኛታትን ካብ መረበቶም ንእተመዛበሉ ሰባትን ከም ዜፍቅሮምን ከም ዚርሕርሓሎምን ይገልጽ እዩ። (ዘዳግም 10:18) ኣምላኽ ንጸገማት ስደተኛታት፡ በታ ንሰብኣውያን መንግስትታት እትትክእ፡ መንግስቲ ኣምላኽ እትብሃል ሰማያዊት መንግስቱ ኣቢሉ ኸም ዚፈትሖ ኣተስፍዩ ኣሎ። (ዳንኤል 2:44፣ ማቴዎስ 6:10) የሆዋ ብመንግስቱ ኣቢሉ ንሰይጣን ድያብሎስ ኬወግዶ እዩ። (ሮሜ 16:20) መንግስቲ ኣምላኽ ዓለምለኻዊት መንግስቲ ስለ እትኸውን፡ ብሃገራዊ ዶባት ዚፍጠር ምክፍፋል ከተወግድ እያ። ኵሎም ደቂ ሰብ ሓድነት ዘለዋ ዓለምለኻዊት ስድራ ቤት ኬቝሙ እዮም። ኣብቲ ግዜ እቲ፡ ቤቱ ራሕሪሑ ዚኸይድ ኣይክህሉን እዩ፣ ከመይሲ፡ መጽሓፍ ቅዱስ፡ “ኣፍ የሆዋ ጐይታ ሰራዊት ተዛሪቡ እዩ እሞ፡ ነፍሲ ወከፍ ኣብ ትሕቲ ተኽሊ ወይኑን ኣብ ትሕቲ ኦም በለሱን ኪቕመጥ እዩ፣ ሓደ እኳ ኣይኬፍርሆምን እዩ” ብምባል የተስፉ እዩ።—ሚክያስ 4:4።

 ነዚ ሎሚ ዜጋጥመና ዘሎ ስደት፡ ነባሪ ፍታሕ እተምጽእ መንግስቲ ኣምላኽ ጥራይ እያ። የሆዋ ብመንግስቱ ኣቢሉ፡ ነቲ ንሰባት ከም ዚስደዱ ዚገብሮም ዘሎ ጸገማት ኬወግዶ እዩ። ገለ ኣብነታት እስከ ንርአ፦

•   ውግእ። “[የሆዋ] ንውግእ ኣብ ብዘላ ምድሪ መወዳእታ ይገብረሉ።” (መዝሙር 46:9) ኣምላኽ ንግጭት ብኸመይ መወዳእታ ኸም ዚገበረሉ ምእንቲ ኽትፈልጥ፡ “ኣብ ምድሪ ሰላም ዚሰፍን ብኸመይ እዩ፧” ዘርእስታ ዓንቀጽ ኣንብብ።

•   ጭቈናን ዓመጻን። “[የሆዋ] ካብ ጭቈናን ካብ ዓመጻን ኬናግፎም፡ . . . እዩ።” (መዝሙር 72:14) ሰባት ካብቲ ኣብ ውሽጦም ዝሰረጸ ኽፉእ ባህርያት ብኸመይ ኪቕየሩ ኸም ዚኽእሉ ምእንቲ ኽትፈልጥ፡ “ዓንኬል ጽልኢ ብኸመይ ይስበር፧” ዘርእስታ ዓምዲ ኣንብብ።

•   ድኽነት። “[የሆዋ] ንዜእዊ ድኻ . . . ኼናግፍ እዩ።” (መዝሙር 72:12) ኣምላኽ ነቲ ቐንዲ ጠንቂ ድኽነት ብኸመይ ፍታሕ ከም ዚገብረሉ ምእንቲ ኽትፈልጥ፡ “ምዕሩይ ቍጠባዊ ስርዓት ኪመጽእ ይኽእል ድዩ፧” ዘርእስታ ዓንቀጽ ኣንብብ።

•   ጥሜት። “ኣብ ምድሪ ብዙሕ እኽሊ ኪኸውን . . . እዩ።” (መዝሙር 72:16) ኣምላኽ ንጥሜት ብኸመይ ከም ዜወግዶ ምእንቲ ኽትፈልጥ፡ “ኤ ዎርልድ ዊዝ ኣውት ሃንገር” ዘርእስታ ዓንቀጽ ኣንብብ።

 መጽሓፍ ቅዱስ ሎሚ ንዘለዉ ስደተኛታት ኪሕግዞም ይኽእል ድዩ፧

 እወ። መጽሓፍ ቅዱስ ንስደተኛታት ዜተኣማምን ተስፋ ኣብ ልዕሊ ምሃቡ፡ ነዚ ሕጂ ዘሎ ጸገማት ብኸመይ ኪሰግርዎ ኸም ዚኽእሉ እውን ይሕግዞም እዩ።

 ስርዓት መጽሓፍ ቅዱስ፦ “ብዛዕባ ዅሉ ነገር ደኣ ልማኖኹም ብጸሎትን ብምህለላን ምስ ምስጋና ኣብ ኣምላኽ ይፈለጥ እምበር፡ ብዛዕባ ገለ እኳ ኣይትጨነቑ፣ እቲ ኻብ ኵሉ ሓሳብ ዚበልጽ ሰላም ኣምላኽ ድማ ንልብኹምን ንኣእምሮኹምን ብክርስቶስ የሱስ ኪሕልዎ እዩ።”—ፊልጲ 4:6, 7።

 ትርጉሙ፦ ዝዀነ ይኹን ኵነታት የጋጥመካ ብዘየገድስ፡ ኣምላኽ ውሽጣዊ ሰላም ኪህበካ ለምኖ። “ፊልጲ 4:6, 7—‘ብዛዕባ ገለ እኳ ኣይትጨነቑ’” ዘርእስታ ዓንቀጽ ብእንግሊዝኛ ኣንብብ።