Kulingana na Luka 1:1-80

CHEZA

Ujumbe kwa Theofilo (1-4)
Gabrieli atabiri kuzaliwa kwa Yohana Mbatizaji (5-25)
Gabrieli atabiri kuzaliwa kwa Yesu (26-38)
Maria amtembelea Elisabeti (39-45)
Maria amtukuza Yehova (46-56)
Yohana azaliwa na kupewa jina (57-66)
Unabii wa Zekaria (67-80)

1 Kwa kuwa watu wengi wamejitahidi kukusanya habari kuhusu mambo ambayo tunayasadiki kabisa,+ ² kama tulivyoyapokea kutoka kwa wale waliokuwa mashahidi wa kujionea tangu mwanzo+ na wahudumu wa ujumbe,+ ³ mheshimiwa Theofilo,+ mimi pia nimefuatilia mambo yote kwa usahihi tangu mwanzo, nami nimeamua kukuandikia mambo hayo kwa utaratibu mzuri, ⁴ ili ujue kikamili uhakika wa mambo uliyofundishwa kwa mdomo.+ ⁵ Katika siku za Herode,*+ mfalme wa Yudea, kulikuwa na kuhani aliyeitwa Zekaria wa kikundi cha Abiya.+ Mke wake aliitwa Elisabeti na alikuwa wa ukoo wa Haruni. ⁶ Wote wawili walikuwa waadilifu mbele za Mungu na walitembea bila lawama kulingana na amri na sheria zote za Yehova.* ⁷ Lakini hawakuwa na mtoto, kwa sababu Elisabeti alikuwa tasa, na wote wawili walikuwa wamezeeka. ⁸ Alipokuwa akihudumu akiwa kuhani mbele za Mungu wakati wa zamu ya kikundi chake,+ ⁹ kulingana na desturi ya* ukuhani zamu yake ikafika ya kuingia patakatifu pa Yehova*+ ili kufukiza uvumba.+ ¹⁰ Umati wote ulikuwa nje ukisali saa hiyo ya kufukiza uvumba. ¹¹ Malaika wa Yehova* akamtokea, akiwa amesimama upande wa kulia wa madhabahu ya uvumba. ¹² Lakini Zekaria alihangaishwa na jambo aliloona, akaogopa sana. ¹³ Hata hivyo, malaika akamwambia: “Usiogope, Zekaria, kwa sababu dua yako imesikiwa vema, na mke wako Elisabeti atakuzalia mwana, nawe utamwita Yohana.+ ¹⁴ Utakuwa na shangwe na furaha nyingi, na wengi watashangilia atakapozaliwa,+ ¹⁵ kwa maana atakuwa mkuu mbele za Yehova.*+ Lakini hapaswi kamwe kunywa divai wala kileo,+ naye atajazwa roho takatifu hata kabla ya kuzaliwa,*+ ¹⁶ naye atawarudisha wana wengi wa Israeli kwa Yehova* Mungu wao.+ ¹⁷ Pia, atamtangulia kwa roho na nguvu za Eliya,+ ili kurudisha mioyo ya akina baba kwa watoto+ na wale wasiotii kwenye hekima ya waadilifu, na kumwandalia Yehova* watu waliotayarishwa.”+ ¹⁸ Zekaria akamuuliza malaika: “Ninawezaje kuwa na uhakika kuhusu jambo hili? Kwa maana nimezeeka, nao umri wa mke wangu pia umesonga.” ¹⁹ Malaika akamjibu: “Mimi ni Gabrieli,+ ninayesimama karibu mbele za Mungu,+ nami nilitumwa nizungumze nawe na kukutangazia habari hii njema. ²⁰ Lakini tazama! utakaa kimya, hutaweza kuongea mpaka siku ambayo mambo hayo yatatendeka, kwa sababu hukuamini maneno yangu ambayo yatatimizwa katika wakati uliowekwa.” ²¹ Watu wakaendelea kumsubiri Zekaria, nao wakashangaa kwa sababu alikuwa amekawia sana katika patakatifu. ²² Alipotoka hakuweza kuzungumza nao, basi wakajua kwamba alikuwa ameona jambo la kustaajabisha* katika patakatifu. Akaendelea kuwafanyia ishara lakini hakuweza kuongea. ²³ Siku zake za utumishi mtakatifu* zilipokwisha, akarudi nyumbani. ²⁴ Baada ya siku chache Elisabeti mke wake akapata mimba, naye hakutoka nyumbani kwa miezi mitano. Alikuwa akisema: ²⁵ “Yehova* amenitendea hivi katika siku hizi. Amenikumbuka ili kuniondolea aibu kati ya watu.”+ ²⁶ Katika mwezi wake wa sita, malaika Gabrieli+ akatumwa na Mungu aende katika jiji la Nazareti huko Galilaya, ²⁷ kwa bikira+ aliyeitwa Maria,+ mchumba wa mwanamume aliyeitwa Yosefu wa nyumba ya Daudi. ²⁸ Malaika akaja na kumwambia: “Salamu, wewe uliyebarikiwa sana, Yehova* yuko pamoja nawe.” ²⁹ Lakini Maria akahangaishwa sana na maneno aliyoambiwa, naye akaanza kufikiria maana ya salamu hizo. ³⁰ Basi malaika akamwambia: “Usiogope, Maria, kwa maana umepata kibali cha Mungu. ³¹ Tazama! utapata mimba* na kuzaa mwana+ nawe utamwita Yesu.+ ³² Huyo atakuwa mkuu+ naye ataitwa Mwana wa Aliye Juu Zaidi,+ na Yehova* Mungu atampa kiti cha ufalme cha Daudi baba yake,+ ³³ naye atatawala akiwa Mfalme juu ya nyumba ya Yakobo milele, na Ufalme wake hautakuwa na mwisho.”+ ³⁴ Lakini Maria akamuuliza malaika: “Hilo litawezekanaje, kwa kuwa sina uhusiano wa kingono na mwanamume?”+ ³⁵ Malaika akamjibu: “Roho takatifu itakuja juu yako,+ na nguvu za Aliye Juu Zaidi zitakufunika. Kwa hiyo yule atakayezaliwa ataitwa mtakatifu,+ Mwana wa Mungu.+ ³⁶ Tazama! Hata Elisabeti mtu wako wa ukoo, ingawa amezeeka ana mimba ya miezi sita, yule anayejulikana kuwa tasa; ³⁷ kwa sababu kwa Mungu hakuna tangazo* lisilowezekana.”+ ³⁸ Ndipo Maria akasema: “Tazama! Kijakazi wa Yehova!* Na itendeke kwangu kulingana na tangazo lako.” Kisha malaika akaondoka. ³⁹ Basi siku hizo, Maria akafunga safari haraka kwenda kwenye eneo lenye milima, mpaka jiji fulani la Yuda, ⁴⁰ naye akaingia nyumbani kwa Zekaria na kumsalimu Elisabeti. ⁴¹ Elisabeti aliposikia salamu za Maria, mtoto aliyekuwa tumboni mwake akaruka, naye Elisabeti akajazwa roho takatifu ⁴² na kusema kwa sauti kubwa: “Umebarikiwa kati ya wanawake, na uzao wa tumbo lako umebarikiwa! ⁴³ Imekuwaje nimependelewa hivi kwamba mama ya Bwana wangu amenitembelea? ⁴⁴ Kwa maana tazama! niliposikia salamu zako, mtoto aliye tumboni mwangu aliruka kwa shangwe. ⁴⁵ Mwenye furaha pia ni yule aliyeamini, kwa sababu atatimiziwa kikamili mambo aliyoambiwa kutoka kwa Yehova.”* ⁴⁶ Naye Maria akasema: “Nafsi* yangu inamtukuza Yehova,*+ ⁴⁷ na roho yangu haitaacha kumshangilia Mungu Mwokozi wangu,+ ⁴⁸ kwa sababu ametazama hali ya chini ya kijakazi wake.+ Tazama! tangu sasa vizazi vyote vitanitangaza kuwa mwenye furaha,+ ⁴⁹ kwa sababu Mwenye nguvu amenitendea mambo makuu, nalo jina lake ni takatifu,+ ⁵⁰ naye huwaonyesha rehema wale wanaomwogopa, kizazi baada ya kizazi.+ ⁵¹ Amefanya mambo makuu kwa mkono wake, amewatawanya wenye majivuno katika nia ya mioyo yao.+ ⁵² Amewashusha watu wenye nguvu kutoka kwenye viti vya ufalme+ na kuwainua watu wa hali ya chini;+ ⁵³ amewashibisha kabisa wenye njaa kwa vitu vyema+ na kuwafukuza mikono mitupu wale waliokuwa na mali. ⁵⁴ Amekuja kumsaidia Israeli mtumishi wake, amekumbuka rehema zake,+ ⁵⁵ kama alivyowaahidi mababu zetu, Abrahamu na uzao wake,*+ milele.” ⁵⁶ Maria akakaa na Elisabeti kwa karibu miezi mitatu, kisha akarudi nyumbani kwake. ⁵⁷ Wakati wa Elisabeti wa kujifungua ukafika, naye akazaa mtoto wa kiume. ⁵⁸ Majirani na watu wake wa ukoo wakasikia kwamba Yehova* amemwonyesha rehema nyingi, wakafurahi pamoja naye.+ ⁵⁹ Siku ya nane wakaja kumtahiri huyo mtoto,+ nao walitaka kumpa jina la baba yake, Zekaria. ⁶⁰ Lakini mama yake akajibu: “Hapana! ataitwa Yohana.” ⁶¹ Wakamwambia: “Hakuna mtu wenu wa ukoo anayeitwa jina hilo.” ⁶² Kisha wakamuuliza baba yake wakitumia ishara jina alilotaka kumpa. ⁶³ Basi akaomba kibao akaandika: “Yohana ndilo jina lake.”+ Ndipo wote wakashangaa. ⁶⁴ Mara moja kinywa chake kikafunguliwa na ulimi wake ukawekwa huru, akaanza kuongea,+ akimsifu Mungu. ⁶⁵ Majirani wao wote wakaogopa, na mambo yote hayo yakaanza kuzungumziwa katika eneo lote la milimani la Yudea. ⁶⁶ Wote waliosikia mambo hayo wakayaweka moyoni, wakisema: “Mtoto huyu atakuwa mtu wa aina gani?” Kwa maana mkono wa Yehova* ulikuwa pamoja naye. ⁶⁷ Kisha Zekaria baba yake akajazwa roho takatifu, naye akatoa unabii huu: ⁶⁸ “Asifiwe Yehova* Mungu wa Israeli,+ kwa sababu amewakumbuka watu wake na kuwaletea ukombozi.+ ⁶⁹ Naye ametuinulia pembe ya wokovu*+ katika nyumba ya Daudi mtumishi wake,+ ⁷⁰ kama alivyosema kupitia kinywa cha manabii wake watakatifu tangu zamani,+ ⁷¹ kwamba atatuokoa kutoka kwa adui zetu na kutoka mikononi mwa wote wanaotuchukia;+ ⁷² ili kuonyesha rehema kuhusiana na mababu zetu na kulikumbuka agano lake takatifu,+ ⁷³ kama alivyomwapia Abrahamu babu yetu,+ ⁷⁴ kwamba atatukomboa kutoka mikononi mwa adui, na kutupatia pendeleo la kumtolea utumishi mtakatifu bila woga ⁷⁵ kwa ushikamanifu na uadilifu mbele zake siku zetu zote. ⁷⁶ Lakini wewe, mtoto mchanga, utaitwa nabii wa Aliye Juu Zaidi, kwa maana utaenda mbele za Yehova* ili kutayarisha njia zake,+ ⁷⁷ kuwapa watu wake ujuzi wa wokovu kupitia kusamehewa dhambi zao,+ ⁷⁸ kwa sababu ya huruma nyororo za Mungu wetu. Kwa huruma hizo tutapata mapambazuko kutoka juu, ⁷⁹ ili kuwapa nuru wale wanaokaa gizani na katika kivuli cha kifo+ na kuongoza hatua zetu kwenye njia ya amani.” ⁸⁰ Yule mtoto akakua na kupata nguvu katika roho, naye aliishi jangwani mpaka siku aliyojionyesha waziwazi kwa Israeli.