Keletso ya Bibele: “Mokgwa wa lona wa bophelo e ke e be o se nang lerato la tjhelete, ha le ntse le kgotsofalletse dintho tse teng.”​—Baheberu 13:5.

Kajeno ho na le dintho tse ngata tseo batho ba reng re lokela ho ba le tsona. Le ha ho le jwalo, Bibele e re re lokela ho ‘kgotsofalla dintho tse teng.’ Empa re ka etsa seo jwang?

O se ke wa ‘rata tjhelete.’ Batho ba etsa sohle seo ba se kgonang e le hore ba fumane tjhelete ho sa tsotellehe hore na seo se ka beha bophelo ba bona le ba malapa a bona kotsing, sa ba diha seriti, sa senya setswalle sa bona le ba bang, kapa sa etsa hore ba etse boitshwaro bo bobe. (1 Timothea 6:10) Ka nnete sena ke lefeela, hobane Bibele e re motho ya ratang maruo ‘a ke ke a kgotsofala.’​—Moeklesia 5:10.

Batho ke ba bohlokwa ho feta dintho tseo re nang le tsona. Ke nnete hore dintho tseo re nang le tsona tse kang di selefounu le di khomphiyutha di ka re tswela molemo. Empa dintho tsena di ke ke tsa kgona ho re rata le ho re ananela, ke batho feela ba ka etsang seo. Ho ba le “motswalle wa nnete” ho ka re thusa hore re kgotsofale bophelong.​—Liproverbia 17:17.

Keletso ya Bibele: “Pelo e thabileng ke moriana o motle.”​—Liproverbia 17:22.

Jwalo ka ha “moriana o motle” o le molemo, ho thaba ho ka re thusa hore re mamelle ha re kula. Empa ke jwang re ka thabang le ha re kula?

Bontsha ho re o a ananela. Haeba motho a dula a nahana ka mathata a hae, “matsatsi ohle” ahae a tla ba mabe. (Liproverbia 15:15) Ho e na le hoo, Bibele e re: “Le iponahatse le le ba lebohang.” (Bakolose 3:15) Ithute ho ananela dintho tse nyane bophelong, tse jwalo ka botle ba ha letsatsi le dikela, moya o phodileng ha monate, le ho bososela le batho bao o ba ratang. Ha re etsa sena re tla thabela bophelo.

Etsetsa batho ba bang dintho tse molemo. Le hoja re kula, re ka thaba haholo haeba re fana, etswe Bibele e re: “Ho fana ho tlisa thabo e kgolo ho feta ho amohela.” (Liketso 20:35) Haeba batho ba ananela dintho tseo re ba etseditseng tsona, re a thaba mme seo se ka etsa hore re se ke ra dula re nahanne ka mathata a rona. Haeba re thusa batho ba bang seo se ka ntlafatsa bophelo ba rona le ba bona.

Keletso ya Bibele: “Nepisisa dintho tsa bohlokwa haholo.”​—Bafilipi 1:10.

Ha banyalani ba sa qete nako e ngata ba le ha mmoho seo se ka senya kamano ya bona. Banna le basadi ba lokela ho nka lenyalo la bona e le e nngwe ya dintho tsa bohlokwa ka ho fetisisa bophelong ba bona.

Etsang dintho ha mmoho. Ipheng nako ya ho etsa dintho ha mmoho. Bibele e re: “Ba babedi ba molemo ho feta a le mong.” (Moeklesia 4:9) Mohlomong le ka nahana ka hore le etse dintho tse ding ha mmoho tse kang ho pheha, ho ikwetlisa le ho intsha.

Bontsha molekane wa hao ho re o a mo rata. Bibele e kgothalletsa monna le mosadi hore ba ratane ba be ba hlomphane. (Baefese 5:28, 33) Mohlomong o ka bonya le molekane wa hao, wa mo haka, kapa wa mo fa mpho, e leng se tla etsa hore lenyalo la lona le matlafale. Nnete ke hore banyalani ba lokela ho bontsha dipontsho tsa lerato ho balekane ba bona feela.​—Baheberu 13:4.