AUNKE cu nos a hereda pica y morto for di nos prome mayornan, Adam cu Eva, Dios su proposito pa hende no a cambia. Den Bijbel, Dios a confirma nos bes tras bes cu su proposito no a cambia.

• “E hustonan lo hereda e Tera, y lo biba den dje pa semper.” —Salmo 37:29.

• “E lo traga morto pa semper, y Señor DIOS lo seca awa di wowo for di tur cara.”—Isaias 25:8.

• “E ultimo enemigo cu lo e caba cu ne ta morto.”—1 Corintionan 15:26.

• “Lo no tin morto mas; ni tristeza ni sclamacion ni dolor lo no tin mas.”—Revelacion 21:4.

Con Dios lo “traga morto” of “caba cu ne”? Manera nos a caba di mira den Bijbel “e hustonan ... lo biba ... pa semper.” Pero Bijbel ta bisa tambe cu “no tin hende husto riba Tera cu continuamente ta haci bon.” (Eclesiastes 7:20) Acaso esey kiermen cu Dios lo ignora su normanan moral halto pa hende imperfecto y pecador por biba pa semper? Sigur cu no! Nunca e lo haci esey pasobra Bijbel ta bisa cu “Dios ... no por gaña.” (Tito 1:2) Kico Dios lo haci anto pa cumpli cu su proposito?

Amor a motiva Jehova Dios pa paga un rescate pa libra nos di morto. Basicamente, un rescate ta un prijs cu bo ta paga pa compensa un daño of pa satisface un exigencia di husticia. E balor di e rescate mester ta ekivalente na e daño causa. Como cu nos ta hende pecador y nos ta condena na morto, Bijbel ta bisa francamente: “Di ningun manera un hende por redimi su ruman, ni paga Dios placa di rescate p’e—pasobra e redencion di su alma ta costoso; e lo no por paga p’e nunca.”—Salmo 49:7, 8.

Ora un persona imperfecto muri, e por paga solamente pa su picanan; e no por salba su mes ni paga pa e picanan di otro hende. (Romanonan 6:7) Nos tabatin mester di un persona perfecto y sin pica pa ofrece su bida; no pa su mes picanan sino pa nos picanan.—Hebreonan 10:1-4.

Esaki ta precisamente loke Dios a plania pa haci. El a manda su yiu, Hesus, for di cielo pa nace riba Tera como un hende perfecto y sin pica. (1 Pedro 2:22) Hesus a bisa cu el a bin pa “duna su alma como rescate a cambio di hopi hende.” (Marco 10:45) El a muri pa caba cu nos enemigo, morto, pa nos por haya bida.—Juan 3:16.

Awe e profecianan di Bijbel ta cumpliendo. Nos ta bibando den “temponan critico, dificil pa trata cu ne”, y esey ta mustra cu nos ta den “e ultimo dianan” di e mundo malbado aki. (2 Timoteo 3:1) E ultimo dianan lo termina riba “e dia di huicio y di destruccion di hende malbado.” (2 Pedro 3:3, 7) Pero esnan cu ta stima Dios lo sobrevivi e destruccion ey y lo disfruta di “bida eterno.”—Mateo 25:46.

Ademas, tin miyones di hende cu lo haya oportunidad di biba pa semper ora nan resucita. Hesus a mustra cu resureccion ta posibel ora el a bishita e stad Nain. E unico yiu di un viuda a muri y Hesus “a haya duele” y a lanta su yiu for di morto. (Lucas 7:11-15) Y apostel Pablo a bisa: “Mi tin e speransa aki den Dios ... cu lo bay tin un resureccion  di tanto hende husto como inhusto.” E speransa aki ta real y un prueba grandi di Jehova su amor pa humanidad.—Echonan 24:15.

Miles di miyones di hende lo biba pa semper. Bijbel ta bisa: “E hustonan lo hereda e Tera, y lo biba den dje pa semper.” (Salmo 37:29) Na e tempo ey, nan lo experencia loke apostel Pablo a skirbi mas o menos 2.000 aña pasa: “Morto, unda bo victoria ta? Morto, unda bo puy ta?” (1 Corintionan 15:55) Porfin Dios lo a caba cu nos enemigo di mas grandi, morto! Esta un consuelo!