हामीले ईश्‍वरका आज्ञाहरू पालन गऱ्‍यौँ भने उहाँको आशिष्‌ पाउनेछौँ भनेर भविष्यवक्‍ता मोसाले बताए। (व्यवस्था १०:१३; ११:२७) हामीले ईश्‍वरबाट सजाय पाउने डरले मात्र उहाँको आज्ञा पालन गर्ने गर्दैनौँ। उहाँका मनमोहक गुणहरूले उहाँप्रति आज्ञाकारी हुन हामीलाई जुरमुऱ्‍याउँछ किनभने हामी उहाँलाई माया गर्छौँ र उहाँलाई दुःखित तुल्याउने कुनै पनि काम गर्न चाहँदैनौँ। “परमेश्‍वरका आज्ञाहरू पालन गर्नु नै उहाँलाई प्रेम गर्नु हो।”—१ युहन्‍ना ५:३.

तर आज्ञाकारी हुँदा कसरी ईश्‍वरको आशिष्‌ पाउन सक्छौँ? दुइटा तरिका विचार गरौँ।

“म यहोवा तिमीहरूका परमेश्‍वर हुँ। तिमीहरूकै भलाइ होस्‌ भनेर म तिमीहरूलाई सिकाउँछु। तिमीहरू हिँड्‌नुपर्ने बाटोमा म तिमीहरूलाई डोऱ्‍याउँछु।”—यसैया ४८:१७.

हाम्रो सृष्टिकर्ता यहोवा हामीलाई चिन्‍नुहुन्छ र आवश्‍यक डोऱ्‍याइ दिनुहुन्छ। यदि हामी उहाँको शिक्षा पाएर बुद्धिमानी निर्णय गर्न चाहन्छौँ भने पवित्र धर्मशास्त्र पढेर उहाँ हामीले के गरेको चाहनुहुन्छ भनेर थाह पाउनुपर्छ अनि सिकेको कुरा लागू गर्नुपर्छ।

“आनन्दित त तिनीहरू हुन्‌, जसले परमेश्‍वरको वचन सुन्छन्‌ र पालन गर्छन्‌!”—लुका ११:२८.

आज ईश्‍वरको वचन पालन गर्ने लाखौँ मानिसले साँचो आनन्द पाएका छन्‌। उदाहरणको लागि, स्पेनको एक जना मानिसको अनुभव विचार गर्नुहोस्‌। तिनी रिसाहा स्वभावका थिए अनि आफ्नी पत्नी र अरू मानिससित रुखो व्यवहार गर्थे। एकदिन तिनले भविष्यवक्‍ता मोसाले लेखेको पुस्तकमा पुरातन समयका याकुबका छोरा युसुफबारे पढे, जो कोमल स्वभावका थिए। युसुफ दासको रूपमा बेचिए अनि झूटो आरोपमा झ्यालखानामा परे। तैपनि तिनी कोमल, शान्तिप्रिय र क्षमाशील भइरहे। (उत्पत्ति, अध्याय ३७-४५) स्पेनका ती मानिस यसो भन्छन्‌: “युसुफको उदाहरण विचार गरेपछि म कोमल, दयालु र आत्मसंयमी हुन जुरमुरिएँ। अहिले मेरो जीवन आनन्दले भरिएको छ।”

पवित्र धर्मशास्त्रले अरूसित हामीले कस्तो व्यवहार गर्नुपर्छ भन्‍नेबारे थुप्रै सुझाव दिन्छ। त्यसबारे विस्तृत रूपमा अर्को लेखमा विचार गरौँ।