30 MEY 2023 | VAOVAO FARANY: 6 MARTSA 2024
ROSIA

VAOVAO FARANY: ASAINA MANDOA LAMANDY | Tsapan’ny Rahalahintsika any Teykovo fa Manohana Azy Ireo i Jehovah

HANDEFA

Nomelohin’ny Fitsaram-paritr’i Teykovskiy, any amin’ny Faritr’i Ivanovo, ny Rahalahy Sergey Galyamin, Anatoliy Lyamo, Vladimir Spivak, ary Aleksandr Vasichkin, tamin’ny 29 Febroary 2024. Samy nasaina nandoa lamandy ireo rahalahy ireo. Mitentina 600 000 roubles (6 564 dolara amerikanina) ny lamandy nasaina naloan’i Vladimir, 650 000 roubles (7 111 dolara amerikanina) ny an’i Sergey, ary 1 100 000 roubles (12 034 dolara amerikanina) avy ny an’i Aleksandr sy Anatoliy.

Ireo voampanga

Sergey Galyamin

Teraka: 1967 (Teykovo, Faritanin’i Ivanovo)

Mombamomba azy: Manana orinasa mpanamboatra kiraro simba sady miasa ao

Nanambady an’i Lyudmila tamin’ny 1991. Manan-janaka vavy telo ry zareo

Gaga rehefa nahafantatra hoe manana anarana Andriamanitra. Nanatrika fivorian’ny Vavolombelon’i Jehovah, dia resy lahatra hoe nahita ny fahamarinana satria tsara fanahy be taminy ry zareo. Natao batisa i Sergey tamin’ny 2001, ary i Lyudmila tamin’ny 2002

Resadresaka nifanaovana taminy

Inona no zava-dehibe ianaranao avy amin’izao zava-tsarotra atrehinao izao?

Tezitra be mihitsy aho tamin’ny vao naheno ny fomba nitondrana ny rahalahy sy anabavintsika. Dia mazava ho azy fa lasa natahotra koa aho hoe inona no mety hanjo ahy. Tadidiko anefa ny voalaza ao amin’ny Salamo 73:26, ilay hoe: “Mety hihareraka ny vatako sy ny foko, fa Andriamanitra kosa no vatolampin’ny foko.” Izay mihitsy no nilaiko. Tonga saina aho hoe tsy manampy mihitsy ny manahy sy mieritreritra be hoe inona avy ny zavatra ratsy rehetra mety hitranga. Ny tena tokony hataoko dia ny miezaka hifandray akaiky kokoa amin’i Jehovah foana, dia miantehitra tanteraka aminy.

Anatoliy Lyamo

Teraka: 1963 (Pogar, Faritanin’i Bryansk)

Mombamomba azy: Namboatra lalamby

Nanambady an’i Galin tamin’ny 1993. Manan-janaka roa sy zafikely roa izy mivady

Nitady ny fahamarinana dia resy lahatra satria nahita hoe nitombina tsara ny zavatra resahin’ny Baiboly. Natao batisa tamin’ny 1995 i Anatoliy, dia i Galina tamin’ny 1997

Resadresaka nifanaovana taminy

Ahoana no nanampian’ny mpiara-manompo anareo?

Vao mainka aho izao lasa tia sy mankasitraka ny rahalahy sy anabaviko. Tsy hitako izay teny mahalaza azy fa tena nampiasain’i Jehovah ry zareo mba hanampy ahy. Be dia be mihitsy ny olana natrehiko nandritra an’izay fotoana niampangana ahy izay. Nampiasa ny rahalahy sy anabaviko anefa i Jehovah mba hikarakara tsara ny fianakaviako. Tena be herim-po koa ry zareo dia tonga tany amin’ny tribonaly mba hanohana ahy. Ankoatra an’izay, dia mandefa hafatra atỳ amiko ry zareo isan’andro hoe mivavaka ho ahy sy ho an’ny fianakaviako. Lasa nandrisika ahy hanampy an’izay miatrika zava-tsarotra koa ny zavatra ataon-dry zareo.

Vladimir Spivak

Teraka: 1955 (Litin, Ukraine)

Mombamomba azy: Miaramila talohan’ny naha lasa Vavolombelon’i Jehovah azy

Nanambady an’i Nellie tamin’ny 1979. I Nellie no nianatra Baiboly voalohany. Niara-nanatrika fivoriamben’ny vondrom-paritry ny Vavolombelon’i Jehovah ry zareo tamin’ny 1992. Variana be tamin’ny zavatra hitany sy henony tany i Vladimir. Natao batisa i Nellie tamin’ny 1994, dia i Vladimir tamin’ny 1997

Resadresaka nifanaovana taminy

Inona no manampy anao tsy ho kivy?

Anisan’ny zavatra tena mampalahelo ahy ilay izaho tsy afaka manatrika fivoriambe. Be dia be koa ny zavatra tsy azoko atao, dia indraindray aho lasa mahatsiaro hoe tsy manana hery intsony sady kivy. Fantatro anefa hoe tsy irery aho satria vonona hanampy ahy foana i Jehovah sy ny rahalahy sy anabaviko. Matoky aho fa hanohana sy hiaro ahy foana i Jehovah, sady hanampy ahy hiaritra.

Aleksandr Vasichkin

Teraka: 1969 (Bryansk, Faritanin’i Bryansk)

Mombamomba azy: Miaramila talohan’ny naha lasa Vavolombelon’i Jehovah azy. Vao haingana izy no lasa mpanao zaridaina

Nanambady an’i Nataliya tamin’ny 1993. Manan-janaka roa izy mivady

Nanatrika fivorian’ny Vavolombelon’i Jehovah, dia variana rehefa nahita hoe tsara fanahy be taminy ry zareo. Nanomboka nianatra Baiboly izy mivady. Natao batisa i Nataliya tamin’ny 1994, dia i Aleksandr tamin’ny 1995

Resadresaka nifanaovana taminy

Inona no manampy anao tsy hifantoka be amin’ny fitsapana mahazo anao?

Tsikaritro hoe rehefa manomboka mitsetra tena aho dia amin’iny aho no tena kivy be. Aleoko àry mifantoka amin’ny tombontsoa ananako hoe afaka miresaka momba an’i Jehovah, toy izay mieritreritra be momba ny zavatra mahazo ahy. Miezaka mitadidy foana koa aho hoe mandalo ihany izao zavatra iainako izao, dia kely sisa dia hivadika indray ny pejy. Raha tsy mivadika mihitsy aho, dia hifandray tsara amin’i Jehovah sy amin’ny rahalahy sy anabaviko foana mandrakizay.

Fantatsika fa na inona na inona fitsapana atrehintsika eto amin’izao tontolo izao, dia mandalo ihany ireny raha oharina amin’ny fitahiana mandrakizay omanin’i Jehovah ho an’ny mpanompony tsy mivadika.—2 Korintianina 4:17, 18.

Zava-nitranga

10 Aprily 2020

Nampangaina ho mpanao heloka bevava
11 Aprily 2020

Nosavana ny tranon’izy ireo
16 Aprily 2020

Tsy navela hanao dia lavitra
2 Febroary 2023

Nanomboka ny fitsarana

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO