KƐ́ OSHÃRA BA LƐ, ANI OBIƆ OHE AKƐ, ‘NO MLI LƐ, NƐGBƐ NYƆŊMƆ YƆƆ?’ ALOO NƆ KO NI NAA WA WAA EBA BO DIƐŊTSƐ ONƆ PƐŊ NI NO EHÃ OBI OHE KƐJI NYƆŊMƆ SUSUƆ OHE LƐƐLƐŊ?

Ekolɛ onuɔ he tamɔ bɔ ni Sheila, ni yɔɔ United States, ni atsɔse lɛ yɛ weku ko ni sumɔɔ Nyɔŋmɔjamɔ waa lɛ mli lɛ nu he lɛ. Ewie akɛ: “Misumɔɔ Nyɔŋmɔ kɛjɛ migbekɛbiiashi tɔ̃ɔ, ejaakɛ lɛ ji wɔ-Bɔlɔ. Shi no mli lɛ, minuuu he akɛ mibɛŋkɛ lɛ. Minu he akɛ eekwɛ mi, shi kɛmiijɛ shɔŋŋ. Minuuu he akɛ Nyɔŋmɔ nyɛɔ mi, ni minuuu he hu akɛ esusuɔ mihe.” Mɛni hewɔ Sheila yiŋ fee lɛ enyɔnyɔɔnyɔ lɛ? Ewie akɛ: “Miweku lɛ kɛ naagbai ni eko nyiɛ eko sɛɛ kpe, ni efee tamɔ nɔ ni Nyɔŋmɔ yeee ebuaaa wɔ kwraa.”

Tamɔ bɔ ni Sheila nu he lɛ, ekolɛ bo hu oheɔ oyeɔ akɛ Nyɔŋmɔ Ofe lɛ yɛ. Shi ekolɛ oyiŋ feɔ bo enyɔnyɔɔnyɔ kɛji esusuɔ ohe lɛɛlɛŋ. Nuu anɔkwafo Hiob hu yiŋ fee lɛ enyɔnyɔɔnyɔ, eyɛ mli akɛ eheɔ eyeɔ akɛ Bɔlɔ lɛ yɛ hewalɛ, ni ehiɛ kã shi. (Hiob 2:3; 9:4) Be ni ekɛ naagbai ni eko nyiɛ eko sɛɛ kpe, ni enu he akɛ mɔ ko bɛ ni baaye abua lɛ lɛ, ebi Nyɔŋmɔ akɛ: “Mɛni hewɔ okɛ ohiɛ teɔ, ni obuɔ mi akɛ ohenyɛlɔ lɛ?”​—Hiob 13:24.

Mɛni Biblia lɛ kɛɔ? Kɛ́ oshãra ko ba lɛ, ani esa akɛ ashwa Nyɔŋmɔ? Ani nɔ ko yɛ ni tsɔɔ akɛ Nyɔŋmɔ susuɔ adesai fɛɛ ahe, ni esusuɔ wɔteŋ mɔ fɛɛ mɔ he akɛ aŋkroaŋkroi? Akɛ aŋkroaŋkroi lɛ, ani wɔteŋ mɔ ko baanyɛ ale lɛɛlɛŋ kɛji Nyɔŋmɔ jwɛŋɔ wɔhe, enuɔ wɔ shishi, enuɔ he hãa wɔ, loo eyeɔ ebuaa wɔ kɛ́ wɔkɛ naagbai kpe?

Yɛ saji ni nyiɛ sɛɛ lɛ amli lɛ, wɔbaasusu bɔ ni adebɔɔ nibii hãa wɔnaa akɛ Nyɔŋmɔ susuɔ wɔhe lɛ he. (Romabii 1:20) No sɛɛ lɛ, wɔbaakwɛ saji ni yɔɔ Biblia lɛ mli ni tsɔɔ akɛ Nyɔŋmɔ susuɔ wɔhe. Babaoo ni otsɔɔ nibii ni ebɔ lɛ kɛ e-Wiemɔ lɛ nɔ ‘onáa oleɔ lɛ lɛ,’ babaoo ni onáa nɔmimaa akɛ ‘ejwɛŋɔ ohe’ ji no.​—1 Yohane 2:3; 1 Petro 5:7.