Petro Klɛŋklɛŋ Wolo Lɛ 5:1-14
5 No hewɔ lɛ, asafoŋ onukpai ni yɔɔ nyɛteŋ lɛ, mi hu ni miji asafoŋ onukpa, Kristo amanehului lɛ ahe odasefonyo kɛ mɔ ni baaná anunyam ni abaajie lɛ kpo lɛ mli gbɛfaŋnɔ lɛ,+ miikpa amɛ fai* akɛ:
2 Nyɛkwɛa Nyɔŋmɔ tooku+ ni yɔɔ nyɛshishi lɛ nɔ tamɔ tookwɛlɔi feɔ lɛ, ni nyɛsɔmɔa akɛ nɔkwɛlɔi,* jeee tamɔ nɔ ni aanyɛ nyɛnɔ, shi moŋ nyɛjɛa nyɛsuɔmɔ mli nyɛfea nakai yɛ Nyɔŋmɔ hiɛ;+ ni jeee yɛ sɛɛnamɔ gbonyo hewɔ hu,+ shi moŋ tsuijurɔ naa;
3 jeee akɛ mɛi ni yeɔ Nyɔŋmɔ tooku, ni ji egboshinii lɛ anɔ akɛ nuŋtsɔmɛi,+ shi moŋ nyɛfea nɔkwɛmɔnɔ nyɛhãa tooku lɛ.+
4 Ni kɛ́ ajie tookwɛlɔnukpa+ lɛ kpo lɛ, nyɛnine baashɛ anunyam akekere ni fiteee lɛ nɔ.+
5 Nakai nɔŋŋ nyɛ oblahii lɛ, nyɛbaa nyɛhe shi nyɛwoa hii onukpai lɛ* ashishi.+ Shi nyɛ fɛɛ lɛ, nyɛwoa heshibaa* yɛ nyɛkɛ nyɛhe shãramɔ mli, ejaakɛ Nyɔŋmɔ tsĩɔ henɔwolɔi anaa, shi edroɔ heshibalɔi.+
6 No hewɔ lɛ, nyɛbaa nyɛhe shi yɛ Nyɔŋmɔ nine ni wa lɛ shishi, koni ewó nyɛnɔ yɛ be ni sa mli,+
7 be mli ni nyɛshɛrɛɔ nibii ni hãa nyɛyeɔ nyɛtsui* lɛ fɛɛ nyɛshwieɔ enɔ lɛ,+ ejaakɛ ejwɛŋɔ nyɛhe.+
8 Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ!+ Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.+
9 Shi nyɛdamɔa shi shiŋŋ yɛ hemɔkɛyeli lɛ mli nyɛtsĩa lɛ gbɛ,+ ejaakɛ nyɛle akɛ nakai amanehului lɛ nɔŋŋ nyɛnyɛmimɛi asafo muu lɛ fɛɛ* ni yɔɔ je lɛ mli lɛ hu kɛkpeɔ.+
10 Shi be ni nyɛna amanehulu fioo sɛɛ lɛ, dromɔ fɛɛ Nyɔŋmɔ lɛ diɛŋtsɛ, mɔ ni tsɛ nyɛ kɛba enaanɔ anunyam+ lɛ mli yɛ ekome ni nyɛkɛ Kristo efee lɛ hewɔ lɛ, baagbe nyɛtsɔsemɔ lɛ naa. Ebaahã nyɛhe awa,+ ebaawaje nyɛ,+ ebaahã nyɛnaji amɔmɔ shi jogbaŋŋ.
11 Lɛ enɔ ji hewalɛ lɛ kɛmiiya naanɔ. Amen.
12 Mitsɔ Silvano,*+ nyɛmi ni mibuɔ lɛ akɛ anɔkwafo lɛ nɔ miŋma nyɛ wiemɔi fioo nɛɛ bɔ ni afee ni mikɛwo nyɛ hewalɛ ni mikɛye odase kɛ hiɛdɔɔ akɛ enɛ ji Nyɔŋmɔ anɔkwa dromɔ lɛ. Nyɛdamɔa shi shiŋŋ yɛ mli.
13 Yoo* ni yɔɔ Babilon lɛ, mɔ ni ahala lɛ tamɔ nyɛ nɔŋŋ lɛ, miiŋa nyɛ, ni mibi Marko+ hu miiŋa nyɛ.
14 Nyɛŋaŋaa nyɛhe kɛ suɔmɔ naashɔmɔ.
Toiŋjɔlɛ ahã nyɛ, nyɛ mɛi fɛɛ ni kɛ Kristo efee ekome lɛ.
Shishigbɛ Niŋmaa
^ Loo “miiwie miitsɔɔ amɛ.”
^ Loo “nyɛkwɛa tooku lɛ nɔ jogbaŋŋ.”
^ Loo “asafoŋ onukpai lɛ.”
^ Loo “nyɛwoa heshibaa jwɛŋmɔ; nyɛkɛ heshibaa (loo heshibaa jwɛŋmɔ) aŋmɔa nyɛhɛ.”
^ Loo “nyɛshɛrɛɔ nyɛgbeyeishemɔi; nyɛshɛrɛɔ nyɛnaagbai.”
^ Greek sht. ŋm., “nyɛnyɛmifeemɔ.”
^ Atsɛɔ lɛ Sila hu.
^ Ebaanyɛ ekɔ asafo ko he.
