Afanikọn̄ ekeme ndinen̄ede ntịmede nnyịn, iyakke ikere n̄kpọ en̄wen, anam idem emem nnyịn, onyụn̄ anam uwem odorode nnyịn. Edidem David ke Israel eset ama osobo ediwak afanikọn̄. Nso ikan̄wam enye ọyọ? David etịn̄ ke psalm kiet ete: “Mmada uyo mi nseme n̄kot Jehovah nyom un̄wam; nda uyo mi ntua nnọ Jehovah nyom mfọn. Ntịn̄ mfịna mi nnọ enye; ntịn̄ nnanenyịn mi nnọ enye, ke ini spirit mi akpade mba ke esịtidem mi. Ndien afo ọdiọn̄ọ usụn̄ mi.” David ama osụhọde idem ọbọn̄ akam eben̄e Abasi an̄wam imọ.—Ps. 142:1-3.

Ke psalm en̄wen, David ama ọkwọ ete: “N̄kpọ kiet ke ami mben̄e Jehovah—kpa oro ke ami nyom, ndidụn̄ ke ufọk Jehovah ke ofụri eyouwem mi, man nse uyai Jehovah nnyụn̄ nse temple esie ye inemesịt.” (Ps. 27:4) David ikedịghe eyen Levi, edi kere nte eketiede enye ke idem ndida ke an̄wa edisana okụre n̄kpere ebiet emi ẹsituakde ibuot ẹnọ Jehovah. Esịt ama enen̄ede adat David tutu ọdọn̄ enye ndidụn̄ do ke ofụri eyouwem esie nnyụn̄ “nse uyai Jehovah.”

Ikọ oro “uyai” aban̄a n̄kpọ emi eyede onyụn̄ enemde ndise. Ekesinenem David ndise ndutịm oro Abasi akanamde man ẹtuak ibuot ẹnọ enye. Imekeme ndibụp idem nnyịn ite, ‘Ndi esitie mi nte eketiede David?’

Mfịn, inyeneke akpan ebiet emi anade kpukpru owo ẹka ẹketuak ibuot ẹnọ Jehovah. Edi enye enyene akwa temple eke spirit, oro edi, edisana ndutịm oro enye anamde man ẹtuak ibuot ẹnọ enye. * Edieke idatde esịt iban̄a ndutịm emi, ọwọrọ nnyịn ke ‘ise uyai Jehovah.’

Kere ban̄a itieuwa emi ẹkedade okpoho ẹnam, emi ẹkesiwade edifọp uwa; ekenịm enye ke iso enyịnusụn̄ tent utuakibuot. (Ex. 38:1, 2; 40:6) Itieuwa oro akada aban̄a n̄kpọ; enye okowụt ke Abasi eyenyịme uwa ufak Jesus. (Heb. 10:5-10) Kere ban̄a se uwa ufak Jesus anamde ọnọ nnyịn! Apostle Paul ekewet ete: “Abasi [ama ada] n̄kpa Eyen esie esịn emem ke ufọt nnyịn ye idemesie ke ini nnyịn ikedide mme asua.” (Rome 5:10) Edieke ibuọtde idem ke iyịp oro Jesus ọkọduọkde, iyakabade idi ‘ata ufan Jehovah,’ ndien enye ayama onyụn̄ atua nnyịn mbọm.—Ps. 25:14.

‘Mme ini nduọkodudu ẹyeto iso Jehovah ẹsịm nnyịn’ sia ‘ẹsọhide mme idiọkn̄kpọ nnyịn ẹfep.’ (Utom 3:19) Ẹkeme ndimen idaha nnyịn ndomo ye eke owo n̄kpọkọbi oro ẹbierede n̄kpa ẹnọ. Ke ini eti ebiereikpe okụtde nte enye atuade n̄kpọfiọk aban̄a se enye akanamde onyụn̄ enen̄erede okpụhọde uwem esie, enye ọsọhi ofụri idiọkn̄kpọ esie efep onyụn̄ ebiere ke owo idiwotke enye aba. Esịt ekpenen̄ede adat owo n̄kpọkọbi oro! Ukem nte ebiereikpe oro, Jehovah esitua mme anamidiọk oro ẹnen̄erede ẹkabade esịt mbọm, onyụn̄ ebiere ke imọ idiwotke mmọ aba.

Ke ini David akakade ufọk Jehovah, enye ama okụt ẹnamde nsio nsio n̄kpọ man ẹtuak ibuot ẹnọ Abasi. Enye ama okụt akwa udịm nditọ Israel ẹsopde idem, okụt ẹkotde ẹnyụn̄ ẹnamde Ibet an̄wan̄a mme owo, okụt ẹfọpde incense, onyụn̄ okụt mme oku ye nditọ Levi ẹnamde edisana utom ẹnọ Abasi.  (Ex. 30:34-38; Num. 3:5-8; Deut. 31:9-12) Mfịn, ke ẹnanam mme n̄kpọ oro ẹbietde se ẹkesinamde ke Israel eset ke ini ẹtuakde ibuot ẹnọ Jehovah.

Nte ekedide ke eset, “ọfọn didie onyụn̄ enem didie ntem nditọete ndidụn̄ ọtọkiet ke edidianakiet” ke eyo nnyịn! (Ps. 133:1) Nditọete nnyịn ẹwak idahaemi ke ofụri ererimbot ẹkan nte akanam edide. (1 Pet. 2:17) Ẹsikot Ikọ Abasi ẹnyụn̄ ẹnam enye an̄wan̄a ke mme mbono esop nnyịn. Jehovah ada esop esie ekpep nnyịn ediwak n̄kpọ. Esop Abasi ewet ediwak n̄wed oro ikemede ndikot ke ini ikpepde n̄kpọ ke idem nnyịn m̀mê ke ini inịmde ukpepn̄kpọ ubon. Owo Otu Ukara kiet ọkọdọhọ ete: “Ndisitie n̄kere Ikọ Jehovah, n̄kere se enye ọwọrọde, nnyụn̄ ndomo ndinyene ikike ye ọniọn̄ anam mfiọk ekese n̄kpọ mban̄a Abasi onyụn̄ anam uwem enem mi.” Edi akpanikọ ke ‘ifiọk ekeme ndinem ukpọn̄ nnyịn.’—N̄ke 2:10.

Mfịn, Jehovah esikop akam oro mme asan̄autom esie ẹbọn̄de kpukpru usen. Utọ akam oro ebiet enye incense emi enemde ufuọn̄. (Ps. 141:2) Esinem nnyịn ndifiọk ke akam oro isụhọrede idem ibọn̄ esinenem Jehovah Abasi!

Moses ọkọbọn̄ akam ete: “Yak uyai Jehovah Abasi nnyịn odoro nnyịn, nyụn̄ nam utom ubọk nnyịn ọsọn̄ọ ada ọnọ nnyịn.” (Ps. 90:17) Ke ini isịnde ifịk inam utom ukwọrọikọ, Jehovah esidiọn̄ utom nnyịn. (N̄ke 10:22) Ekeme ndidi iman̄wam ndusụk owo ẹkpep akpanikọ. Onyụn̄ ekeme ndidi imọsọn̄ọ ida ikwọrọ ikọ ke ediwak isua kpa ye oro mme owo mîmaha etop nnyịn, kpa ye udọn̄ọ, ọkpọsọn̄ editịmede esịt, m̀mê ukọbọ. (1 Thess. 2:2) Edi ndi nnyịn ikwe “uyai Jehovah”? Ndi esịt isinemke nnyịn ndifiọk ke Ete nnyịn eke heaven enen̄ede ama ukeme oro isịnde?

David ama ọkwọ ete: “Jehovah edi udeme emi ẹbaharede ẹnọ mi ye cup emi ẹdemede ẹnọ mi. Afo emekpeme udeme mi. Mme urụk udomon̄kpọ ẹmeduọ ke edifọn ebiet ẹnọ mi.” (Ps. 16:5, 6) David ama ọkọm Abasi aban̄a “udeme” esie, oro edi, ifet oro enye ekenyenede ndidi ufan Jehovah nnyụn̄ nnam n̄kpọ esie. Ukem nte David, imekeme ndisobo nsio nsio afanikọn̄, edi Abasi ke ọdiọn̄ nnyịn ke nsio nsio usụn̄! Mmọdo, ẹyak ika iso inem esịt iban̄a utuakibuot akpanikọ, inyụn̄ ise temple Jehovah eke spirit “ye inemesịt.”