Genesis 33;1-20
33 Ekem Jacob emenede enyịn ese ndien sese, Esau ke asan̄a ye owo ikie inan̄ edi.+ Ndien enye abahade nditọwọn̄ ọnọ Leah ye Rachel ye ifịn iban iba oro,+
2 ndien enye anam ifịn iban oro ye nditọ mmọ ẹbe iso,+ ndien Leah ye nditọ esie ẹdiana+ edi Rachel ye Joseph ẹsan̄a ke edem.+
3 Ndien enye ebe mmọ iso onyụn̄ onụhọ ke isọn̄ utịm ikatiaba tutu enye asan̄a ekpere eyeneka esie.+
4 Ndien Esau efehe edisobo ye enye,+ afat enye,+ awan̄a enye ke itọn̄ onyụn̄ etịm enye inua, mmọ ẹnyụn̄ ẹtua eyet.
5 Ekem enye emenede enyịn okụt iban ye nditọ onyụn̄ ọdọhọ ete: “Mmanie ẹsan̄a emi ye afo?” enye ọbọrọ ete: “Mmọ ẹdi nditọ emi Abasi adade ọfọn mfọn ye asan̄autom fo.”+
6 Ndien ifịn iban ye nditọ mmọ ẹsan̄a ẹkpere ẹdinụhọ ẹnọ enye;
7 ndien Leah ye nditọ esie n̄ko ẹsan̄a ẹkpere ẹdinụhọ ẹnọ enye, ekem Joseph ye Rachel ẹdi ẹdinụhọ ẹnọ enye.+
8 Ekem enye obụp ete: “Ofụri udịm mbonisan̄ oro n̄kokụtde edi kaban̄a nso?”+ Enye ọbọrọ ete: “Nnam emi man n̄kụt mfọn ke iso ọbọn̄ mi.”+
9 Ekem Esau ọdọhọ ete: “Eyeneka mi, mmenyene ekese.+ Yak se idide okwo edi okwo.”
10 Edi Jacob ọdọhọ ete: “Baba, mbọk kûnam ntre. Edieke edide mmokụt mfọn ke iso fo,+ bọ enọ emi ke ubọk mi, koro emi esịn n̄kụt iso fo nte n̄kpọ eke n̄kụtde iso Abasi sia afo amadara ndikụt mi.+
11 Mbọk bọ enọ emi asan̄ade ye edidiọn̄, oro nnọde fi,+ koro Abasi ọmọfọn ye ami ndien mmenyene kpukpru n̄kpọ.”+ Ndien enye akpak eyeneka esie tutu enye ọbọ enọ oro.+
12 Ekem Esau ọdọhọ ete: “Yak inyọn̄ọ, edi yak mbem fi iso n̄ka.”
13 Edi enye ọdọhọ eyeneka esie ete: “Ọbọn̄ mi ọmọfiọk ete ke nditọ emi isọn̄ke idem, ami ke nnyụn̄ nse mban̄a mme erọn̄ ye mme enan̄ oro ẹnọde nditọ eba,+ ndien edieke ẹdade mmọ ẹsan̄a itọk itọk ke usen kiet, ofụri ufene iditreke ndikpan̄a.+
14 Mbọk yak ọbọn̄ mi ebem asan̄autom esie iso aka, edi yak nsan̄a sụn̄sụn̄ ndi nte mme ufene ẹdikemede ndisan̄a+ ye nte nditọ oro ẹdude ye ami ẹdikemede ndisan̄a+ tutu ndisịm ọbọn̄ mi ke Seir.”+
15 Ekem Esau ọdọhọ ete: “Mbọk, yak nnam ndusụk mbon oro ẹdude ye ami ẹsụhọ ye afo.” Edi enye ete: “Ntak oyomde ndinam emi? Yak n̄kụt mfọn ke iso ọbọn̄ mi.”+
16 Ntre Esau afiak ọnyọn̄ Seir ke usen oro.
17 Ndien Jacob aka Succoth,+ onyụn̄ ọkọbọp ufọk esie onyụn̄ atuak ataya+ ọnọ mme ufene esie. Ntak edi oro enye okotde ebiet oro Succoth.
18 Ekem Jacob edisịm obio Shechem,+ oro odude ke isọn̄ Canaan,+ ke ifụre, ke adan̄aemi enye otode Paddan-aram+ edi; ndien enye anam nna ke iso obio oro.
19 Ekem enye ọbọ nditọ Hamor, ete Shechem, in̄wan̄ emi enye okowụkde tent esie edep, ke mbak okụk ikie.+
20 Ekem enye anam itieuwa do onyụn̄ okot enye Abasi edi Abasi Israel.+
