Genesis 31;1-55
31 Ekem enye okop nte nditọ Laban ẹdọhọde ẹte: “Jacob amatan̄ kpukpru se inyenede ete nnyịn; enye onyụn̄ ọkọ kpukpru inyene emi oto inyene ete nnyịn.”+
2 Ke ini Jacob esede Laban, sese, iso esie inenke aba ye enye.+
3 Ke akpatre Jehovah ọdọhọ Jacob ete: “Nyọn̄ ka isọn̄ mme ete fo nyụn̄ tiene iman fo,+ ndien ami nyodu ye afo.”+
4 Ndien Jacob ọdọn̄ ẹkekot Rachel ye Leah ẹdi ke in̄wan̄ ke ebiet ufene esie,
5 ndien enye ọdọhọ mmọ ete:
“Mmokụt nte ke ete mbufo inenke iso aba ye ami;+ edi Abasi ete mi odu ye ami.+
6 Mbufo ẹmetịm ẹfiọk ẹte ke n̄kada ofụri odudu mi nsan̄a utom nnọ ete mbufo.+
7 Edi ete mbufo ebre mi n̄kari onyụn̄ okpụhọde utịp utom mi utịm ikoduop, edi Abasi iyakke enye anam mi idiọk.+
8 Edieke enye ọdọhọde ete, ‘Mmọ eke ẹtiede ntọi-ntọi ẹdidi utịp utom fo,’ ofụri otu ufene ẹyeman mmọ eke ẹtiede ntọi-ntọi; edi edieke enye ọdọhọde ete, ‘Mmọ eke ẹtiede n̄wet-n̄wet ẹdidi utịp utom fo,’ ofụri otu ufene ẹyeman mmọ eke ẹtiede n̄wet-n̄wet.+
9 Ntre Abasi ọbọ ete mbufo mme ufene ọnọ mi.+
10 Edikem ke ini mme ufene ẹyomde ayara, ndien mmenede enyịn n̄kụt ke ndap,+ ndien sese mme okpo ebot emi ẹdorode uman ẹtie n̄wet-n̄wet ye ntọi-ntọi ye n̄kem-n̄kem.+
11 Ekem angel ata Abasi okot mi ke ndap ete, ‘Jacob!’ ndien mbọrọ nte, ‘Se mi mi.’+
12 Ndien enye ọdọhọ ete, ‘Mbọk, menede enyịn se kpukpru mme okpo ebot emi ẹdorode uman nte ke mmọ ẹtie n̄wet-n̄wet ye ntọi-ntọi ye n̄kem-n̄kem, koro mmokụt kpukpru se Laban anamde fi.+
13 Ami ndi ata Abasi Bethel,+ kpa ebiet emi afo ọkọtọhọde aran ọduọk ke enyọn̄ adaha+ okonyụn̄ akan̄ade akan̄a ọnọ mi.+ Daha ke enyọn̄ wọrọ kpọn̄ isọn̄ emi nyụn̄ nyọn̄ isọn̄ emana fo.’”+
14 Ntem Rachel ye Leah ẹdọhọ enye ẹte: “Nte nnyịn imenyene udeme aba ke ufọk ete nnyịn?+
15 Nte enye ibatke nnyịn nte mbon esenidụt sia enye ama akanyam nnyịn, anamde enye adia kpa okụk oro ẹkenọde ke ibuot nnyịn?+
16 N̄kọm kpukpru inyene oro Abasi ọbọde ete nnyịn ẹdi eke nnyịn ye eke nditọ nnyịn.+ Ntem nam kpukpru se Abasi ọdọhọde fi.”+
17 Ndien Jacob adaha ke enyọn̄ onyụn̄ atan̄ nditọ esie ye iban esie odori ke camel;+
18 ndien enye atan̄ kpukpru ufene esie ye kpukpru inyene emi enye ọkọkọde,+ kpukpru ufene emi enye ekenyenede ke Paddan-aram, man ọnyọn̄ etiene ete esie Isaac ke isọn̄ Canaan.+
19 Laban ama aka ndifat mme erọn̄ esie idet. Ndien Rachel eyịp mme teraphim+ ete esie.
20 Ntre Jacob abian̄a Laban owo Syria, koro mîkasianke enye ke imọ imọn̄ ifehe inyọn̄.
21 Ntem enye efehe ọnyọn̄ onyụn̄ ebe Akpa,*+ asan̄a ye kpukpru inyene esie. Ekem enye enen iso aka obot obot ikpehe Gilead.+
22 Ndien ke ọyọhọ usen ita, ẹdidọhọ Laban ẹte ke Jacob ama efehe ọnyọn̄.
23 Ntem enye asan̄a usen itiaba ye nditọete esie ebịne+ enye onyụn̄ ekesịm enye ke obot obot ikpehe Gilead.
24 Ekem Abasi owụt Laban owo Syria+ idem ke ndap ke okoneyo+ onyụn̄ ọdọhọ enye ete: “Kpeme idem mbak udutịn̄ eti m̀mê idiọk udian Jacob.”+
25 Ntem Laban aka ebịne Jacob, koro Jacob okowụkde tent esie ke obot oro, Laban onyụn̄ anam itienna ọnọ nditọete esie ke obot obot ikpehe Gilead oro.
26 Ekem Laban ọdọhọ Jacob ete: “Nso ke afo anam emi, emi abian̄ade mi onyụn̄ atan̄de nditọiban mi ọnyọn̄ nte mmọ eke ẹdade akan̄kan̄ ẹmụm nte mbuotekọn̄?+
27 Ntak emi afo akabian̄ade mi, edịbe efehe ọnyọn̄ usianke mi man n̄kposio fi unyọn̄ ke idara ye ke ikwọ+ ye ke ekọmọ ye ke harp?+
28 Afo unọhọ mi ufan̄ nditịm nditọiban+ mi ye nditọ nditọ mi inua. Ke emi afo amanam ndisịme.
29 Mmenyene odudu ndinam mbufo idiọk,+ edi Abasi ete mbufo, ọkọdọhọ mi okoneyo n̄kpọn̄ ete, ‘Kpeme idem mbak udutịn̄ eti m̀mê idiọk udian Jacob.’+
30 Afo ọnyọn̄ koro itọn̄ ufọk usọ enen̄erede ọdọn̄ fi, edi ntak emi afo eyịpde mme abasi mi?”+
31 Ndien Jacob ọbọrọ Laban ete: “Edi koro n̄kefehede ndịk.+ Ndien ndọhọ nte, ‘Afo emekeme ndifịk mi mbọ nditọiban fo.’
32 Owo ekededi eke afo edikụtde mme abasi fo ke ubọk enyene ndikpa.+ Da ke iso nditọete nnyịn emi, sion̄o se idide okwo.”+ Edi Jacob ikọfiọkke ite ke Rachel ama eyịp mmọ.+
33 Ntre Laban odụk tent Jacob ye tent Leah ye tent ifịn iban iba oro,+ edi ikwe mmọ. Ekem enye ọwọrọ ke tent Leah okodụk tent Rachel.
34 Edi Rachel ama atan̄ mme teraphim oro ọdọn̄ ke akpasa iban oro esidianade ke ifịm camel, onyụn̄ ọdọk etie ke mmọ. Ndien Laban asan̄a ke ofụri tent oyom, edi ikwe mmọ.
35 Ekem enye ọdọhọ ete esie ete: “Kûyat esịt ọbọn̄ mi,+ koro n̄kemeke ndidaha nda sia ndude ke itieisọn̄.”+ Ntre enye etịm oyom, edi ikwe mme teraphim+ oro.
36 Ndien Jacob ayat esịt+ onyụn̄ ọtọhọ ye Laban, Jacob onyụn̄ obụp Laban ete: “Nso idi nsọn̄ibuot ye idiọkn̄kpọ mi,+ oro anamde fi ebịne mi idat idat?+
37 Ke emi ama okodụn̄ọde kpukpru n̄kpoduoho mi, ewe ke otu ofụri n̄kpọ ufọk fo ke afo okụt?+ Nịm enye ke iso nditọete mi ye nditọete fo,+ yak mmọ ẹbiere ke ufọt nnyịn mbiba.+
38 Mmodu ye afo isua edịp. Uman erọn̄ fo ye uman ebot fo iwakke eyen,+ n̄konyụn̄ ntaha okukịm erọn̄ ke otu ufene fo.
39 N̄kabatke unam ekededi oro ẹwaide mbai mbai nnọ fi.+ N̄kada nte se itakde mi. Se ededi oro ẹkeyịpde ke uwemeyo m̀mê ke okoneyo, afo ama ọbọ mi usiene.+
40 Mmọfọbọ eyo ke uwemeyo nnyụn̄ n̄webe tuep ke okoneyo ndehe idap.+
41 Mmetie isua edịp ke ufọk fo. Mmasan̄a utom nnọ fi ke isua duopenan̄ ke ibuot nditọiban fo iba nnyụn̄ mbọk ufene fo ke isua itiokiet, edi afo okpụhọde utịp utom mi utịm ikoduop.+
42 Edieke Abasi ete mi,+ Abasi Abraham ye Enye emi Isaac eten̄ede,+ mîkpodụhe ye ami, afo ọkpọnọ mi nnyọn̄ ubọk ubọk. Abasi omokụt ukụt mi ye utom ubọk mi, oro akanam enye asua ọnọ fi okoneyo n̄kpọn̄.”+
43 Ekem Laban ọbọrọ Jacob ete: “Nditọiban emi ẹdi nditọiban mi, nditọ emi ẹnyụn̄ ẹdi nditọ mi, mme ufene emi ẹnyụn̄ ẹdi mme ufene mi, kpukpru se okụtde emi ẹnyụn̄ ẹdi okịmmọ ye eke nditọiban mi. Nso idiọk ke n̄kpanam mmọ mfịn emi ye nditọ emi mmọ ẹmande?
44 Di ndien nnyịn inam ediomi,+ ami ye afo, man edi n̄kpọ ntiense ke ufọt mi ye afo.”+
45 Ntem Jacob ada itiat anam adaha.+
46 Ndien Jacob ọdọhọ nditọete esie ete: “Ẹtan̄ itiat ẹdi!” Ndien mmọ ẹtan̄ itiat ẹdibok.+ Ekem mmọ ẹtie ke ebok itiat oro ẹdia udia.
47 Ndien Laban okot ebiet oro Jegar-sahadutha, edi Jacob okot enye Galeed.
48 Ndien Laban ọdọhọ ete: “Ebok itiat emi edi ntiense ke ufọt mi ye afo mfịn emi.” Ntak edi oro enye okotde ebiet oro Galeed,+
49 ye Enyọn̄-Ukpeme, koro enye ọdọhọde ete: “Yak Jehovah ese mi ye afo ke ini nnyịn mîkwe kiet eken aba.+
50 Edieke afo akade okofiomo nditọiban mi+ onyụn̄ ọdọde iban efen adian ye mmọ, owo ikwe nnyịn. Sese! Abasi edi ntiense ke ufọt mi ye afo.”+
51 Ndien Laban ọdọhọ Jacob ete: “Sese, mmanam ebok itiat emi nnyụn̄ n̄wụk adaha emi ke ufọt mi ye afo.
52 Ebok itiat emi edi ntiense, adaha emi onyụn̄ etie ntiense+ nte ke ndibehe ebok itiat emi ndinam fi idiọk ye nte ke afo udubehe ebok itiat ye adaha emi udunam mi idiọk.+
53 Yak abasi Abraham+ ye abasi Nahor,+ kpa abasi ete mmọ, ekpe ikpe ke ufọt nnyịn.” Edi Jacob ọn̄wọn̄ọ ke enyịn̄ Enye emi ete esie, Isaac, eten̄ede.+
54 Ekem Jacob awa uwa ke obot oro onyụn̄ okot nditọete esie ẹdidia udia.+ Ndien mmọ ẹdia udia ẹnyụn̄ ẹsụhọde ẹna ke obot oro ke okoneyo oro.
55 Edi Laban abak edemede ke usenubọk etịm nditọiren esie ye nditọiban esie inua+ onyụn̄ ọdiọn̄ mmọ.+ Ekem Laban adaha ọnyọn̄ ke ebiet esie.+
Mme Ikọ Idakisọn̄
^ Oro edi, “Euphrates.”
