Genesis 2;1-25
2 Ntem ke ẹnam enyọn̄ ye isọn̄ ye kpukpru se idude mmọ ke esịt ẹma.+
2 Ndien etisịm ọyọhọ usen itiaba Abasi okụre utom esie emi enye akanamde, ndien ke ọyọhọ usen itiaba enye ọduọk odudu ke kpukpru utom esie eke enye akanamde.+
3 Ndien Abasi ọdiọn̄ ọyọhọ usen itiaba onyụn̄ anam enye edi edisana, koro ke usen oro ke Abasi ọduọk odudu ke ofụri utom esie emi enye okobotde okonyụn̄ aduakde ndinam.+
4 Emi edi mbụk aban̄ade enyọn̄ ye isọn̄ ke ini emi ẹkebotde mmọ, ke usen oro Jehovah Abasi akanamde isọn̄ ye enyọn̄.+
5 Ndien eto ndomokiet ikodụhe kan̄a ke isọn̄, baba ikọn̄ kiet ikonyụn̄ itịbeke kan̄a, koro Jehovah Abasi mîkanamke edịm edep+ kan̄a ke isọn̄, owo mîkonyụn̄ idụhe ndifụn̄ isọn̄.
6 Edi ntụhube+ oto isọn̄ ọdọk onyụn̄ ebịt ofụri iso isọn̄.+
7 Ndien Jehovah Abasi obot owo ke ntan+ isọn̄+ onyụn̄ ọduọk ibifịk uwem+ esịn ke odudu ibuo esie, ndien owo akabade edi ukpọn̄+ eke odude uwem.
8 Ndien Jehovah Abasi ọtọ in̄wan̄ ke Eden,+ ke edem usiahautịn, onyụn̄ emen owo emi enye okobotde+ ekesịn do.
9 Ndien Jehovah Abasi anam isọn̄ etịbe kpukpru eto eke ẹyede ndise ẹnyụn̄ ẹfọnde ke udia ye eto uwem+ n̄ko ke ufọt in̄wan̄ ye eto ifiọk eti ye idiọk.+
10 Akpa onyụn̄ oto ke Eden edibịt in̄wan̄ oro, ndien ọtọn̄ọ do abahade, akabade edi mbuot inan̄.
11 Kiet ekere Pishon; edi enye akanade ofụri idụt Havilah,+ emi gold odude.
12 Gold idụt oro onyụn̄ ọfọn.+ Itai bdellium+ ye itiat onyx+ ẹdu do n̄ko.
13 Ọyọhọ akpa iba ekere Gihon; edi enye akanade ofụri idụt Cush okụk.
14 Ndien ọyọhọ akpa ita ekere Hiddekel;+ edi enye ewet aka edem usiahautịn Assyria.+ Ndien ọyọhọ akpa inan̄ edi Euphrates.+
15 Ndien Jehovah Abasi ada owo oro edisịn ke in̄wan̄ Eden+ ete ọdiọn̄ onyụn̄ ekpeme enye.+
16 Jehovah Abasi onyụn̄ owụk owo oro ete: “Dia kpukpru mfri eto in̄wan̄ yụhọ.+
17 Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.”+
18 Ekem Jehovah Abasi ọdọhọ ete: “Ifọnke owo ndidu ikpọn̄. Nyanam andin̄wam nnọ enye, nte nsan̄a eke ekemde ye enye.”+
19 Ndien Jehovah Abasi ada ntan isọn̄ obot kpukpru unam ikọt ye kpukpru mme edibotn̄kpọ emi ẹfede ke enyọn̄, onyụn̄ ada mmọ ọsọk owo oro ete ise nte enye edikotde mmọ; ndien se ededi emi owo oro okotde ukpọn̄+ kiet kiet eke odude uwem, oro edi enyịn̄ esie.+
20 Ntre ke owo oro osio kpukpru ufene ye mme edibotn̄kpọ emi ẹfede ke enyọn̄ ye kpukpru unam ikọt enyịn̄, edi owo oro ikwe andin̄wam nte nsan̄a eke ekemde ye enye.
21 Ntem Jehovah Abasi anam ọkpọsọn̄ idap+ omụm owo oro, ndien ke adan̄aemi enye edede, Enye osio ọkpọn̄kan̄ esie kiet onyụn̄ esịri obụk ke itie oro.
22 Ndien Jehovah Abasi ada ọkpọn̄kan̄ oro enye okosiode owo oro ke idem obot n̄wan onyụn̄ ada enye ọsọk owo oro.+
23 Ndien owo oro ọdọhọ ete:“Emi ndien edi ọkpọ eke otode ọkpọ miYe obụk eke otode obụk+ mi.Enye edikere N̄wan,Koro ẹdade enye ẹto erenowo.”+
24 Ntak edi oro erenowo edikpọn̄de ete ye eka+ esie onyụn̄ akadiana ye n̄wan esie ndien mmọ ẹyekabade ẹdi obụk kiet.+
25 Ndien mmọ mbiba, eren oro ye n̄wan esie, ẹdi iferi+ edi bụt+ inamke mmọ.
