UJONATHAN, waseKorea kodwa owazalelwa eMelika, wayebandlululwa lapho esemncane. Njengoba ekhula, wafuna indawo lapho abantu babengeke bafinyelele iziphetho ngaye ngenxa yokubukeka kwakhe noma ubuzwe bakhe. Waba udokotela edolobheni elisenyakatho ye-Alaska, e-U.S.A., lapho abantu abaningi ayebelapha babebukeka njengaye. Wayenethemba lokuthi mhlawumbe ngokuba lapho, e-Arctic Circle, ulubalekele ubandlululo.

Noma yiliphi ithemba ayenalo laphela nyá lapho elapha owesifazane oneminyaka engu-25 ubudala. Njengoba lona wesifazane ephaphama, wabuka uJonathan wabe esemchapha ngenhlamba, eveza inzondo anayo ngabantu baseKorea. Leso senzakalo saba buhlungu kuJonathan, sambonisa ukuthi yonke imizamo yakhe yokuthuthela kule ndawo enabantu ababukeka njengaye ayimenzanga wakwazi ukubalekela ubandlululo.

Okwenzeka kuJonathan kuqokomisa iqiniso lokuphila elibuhlungu. Ubandlululo lugcwele umhlaba  wonke. Kubonakala sengathi nomaphi lapho kukhona khona abantu, kukhona nobandlululo.

Nokho, naphezu kokwanda kobandlululo, iningi labantu liyashesha ukulugxeka. Lokhu kuyindida ngempela. Kungenzeka kanjani ukuba into ezondwa kangaka yande kangaka? Kuyaphawuleka ukuthi abaningi abalugxekayo ubandlululo bayahluleka ukulubona kubo ngokwabo. Unjalo yini nawe? Ungawuphendula kanjani lo mbuzo?

Kungakhathaliseki ukuthi siyaqaphela noma cha, kunzima ukubona ukuthi sinalo yini ubandlululo ezinhliziyweni zethu. IBhayibheli lichaza isizathu salokhu lapho lithi: “Inhliziyo ikhohlisa ngaphezu kwanoma yini enye.” (Jeremiya 17:9) Ngakho, singase sizikhohlise sicabange ukuthi asikho isizwe esinenkinga naso. Noma singase sizithethelele ngokuthi sinesizathu esizwakalayo sokungazithandi izinhlanga ezithile.

Ukuze uzibone ukuthi unayo yini inkinga yobandlululo, cabanga ngalesi simo: Ake sithi uhamba wedwa emgwaqweni ebusuku. Uzophambana nezinsizwa ezimbili ongakaze uzibone. Zibukeka ziyizidlakela futhi enye ibonakala iphethe okuthile esandleni.

Ingabe uphetha ngokuthi lezi zinsizwa ziyingozi kuwe? Yiqiniso, okwenzeka esikhathini esidlule kungase kukwenze ungazethembi lezi zinsizwa, kodwa ingabe lokho kukwenza kufaneleke ukuba uphethe ngokuthi lezo zinsizwa ziyingozi kuwe? Nanku omunye umbuzo ongakusiza uzihlolisise, ucabanga ukuthi lezi zinsizwa ezaluphi uhlanga? Impendulo yakho ingase yembule indlela ozizwa ngayo ngempela. Ingase ibonise ukuthi ngokwezinga elithile unalo ubandlululo.

Uma sibhekana namaqiniso, kumelwe sivume ukuthi ekujuleni kwezinhliziyo sonke sinalo ubandlululo ngamazinga ahlukahlukene. Ngisho neBhayibheli liyavuma ukuthi kunohlobo oluvamile lobandlululo lapho lithi: “Abantu bahlulela abanye ngokubukeka kwabo.” (1 Samuweli 16:7, Contemporary English Version) Njengoba sonke sinale nkinga—evame ukuba nemiphumela elimazayo—ingabe likhona ithemba lokuthi siyoke silunqobe noma silususe ubandlululo ekuphileni kwethu? Ingabe siyoba khona isikhathi lapho umhlaba wonke uyobe ungasenalo ubandlululo?