Ora ruuyaʼ ca xcuidi ca pabiáʼ nadxiisaa bixhózecaʼ ne jñaacaʼ ne runi respetarsaacaʼ la? jma galán riniisicaʼ (Colosenses 3:14, 19). Laaca naquiiñeʼ guni sentírcabe pabiáʼ nadxii bixhózecabe ne jñaacabe laacabe ne riéchecaʼ né guiráʼ ni rúnicabe. Ora gudxi Jiobá Xiiñiʼ, Jesucristu, pabiáʼ nadxiibe laa ne rusiecheʼ laabe, gudíxhebe ti ejemplu ni naquiiñeʼ chinanda cani napa xiiñiʼ. (Biindaʼ Mateo 3:17.)

Rucaadiaga Jiobá, Bixhózenu ni nuu guibáʼ, laanu ne riene ni runi sentirnu. Galán chinanda cani napa xiiñiʼ ejemplu stibe ne gucaadiágacaʼ xiiñicaʼ ora guiniʼné laacaʼ (Santiago 1:19). Risaca nga guni respetárcabe ni cayuni sentir xiiñicabe ne pa guiníʼ xiiñicabe ti cosa cadi jneza la? cadi gúnicabe ni ti guendanagana naroʼbaʼ. (Biindaʼ Números 11:11, 15.)

Cani napa xiiñiʼ zanda quíxhecaʼ xi guni xiiñicaʼ ra yoo (Efesios 6:1). Peru, cásica runi Dios, laaca naquiiñeʼ gusiene chaahuicabe xiiñicabe xi naquiiñeʼ guni ne gábicabe laacaʼ xi zazaacacaʼ pa qué guzuubacaʼ diidxaʼ. Zacá zusihuínnicabe nadxiicabe laacaʼ (Génesis 3:3). Lugar de gucaatu laacabe guzuubacabe diidxaʼ la? jma jneza guluiʼtu laacabe xi guiráʼ zabeendúcabe pa gúnicabe ni jneza. (Biindaʼ Isaías 48:18, 19.)

Gudixhe ique gacaneluʼ ca xiiñiluʼ gannaxhiicaʼ Dios. Pa ganda gacaneuʼ laacabe la? zánnacabe xi gúnicabe dede né ora cadi cayuuyaluʼ laacabe. Rusiidiʼ Dios laanu né modo runi, galán chinanduʼ ejemplu stibe. (Biindaʼ Deuteronomio 6:5-7; Efesios 4:32, ne 5:1.)