Faanra gathi Got tapgin e gafgow ni be buch, me ere mang e be k’aring e pi gafgow ni be buch ni bod rogon e girdi’ ni yad be yim’ ko bilig, nge girdi’ ni gubin ngiyal’ ma yad be gafgow ko par, nge mahl ni boor e girdi’ ni be yim’ riy, nge m’ar ni kireb, nge yoko’, nge durru’, nge boch ban’en ni ma yib ni yima gafgow riy? Thin rok Got ni aram e Bible e be weliy dalip ban’en ni ir e be k’aring e gafgow ko girdi’:

1. Lem ni Fel’ Ngak, Chogow, nge Fanenikan. ‘Bay boch e girdi’ nib gel gelngirad ma boch e be gafgow u tan pa’rad.’ (Eklesiastes 8:9) Ba ga’ ni ma gafgow e girdi’ ni bochan e be gafgownagrad yugu boch e girdi’ ndawor ra flontgad, ara yigoo yad e yad be lemnagrad, ara yad ba kireb.

2. Ma Buch Boch Ban’en u Ba Ngiyal’ Ndan Lemnag Nra Buch. Ba ga’ ni ma gafgow e girdi’ ni bochan e “pi n’en ni ma buch ndan lemnag nge ngal’an ni ma buch.” (Eklesiastes 9:11, NW) Re n’ey e be yip’ fan ni bay yu ngiyal’ nib kireb e gin ni bay be’ riy u nap’an ni ke buch ban’en, fa reb e ke buch ban’en ndan lemnag nra buch, ara bochan ndanir kol ayuw ara kan oloboch ma aram me buch ban’en nib kireb nga tomuren.

3. En ni Be Gagiyegnag e Re Fayleng Ney e Ir Be’ Nrib Kireb. Ri be tamilangnag e Bible e en ni ir tapgin urngin e gafgow ni be yib ko girdi’. Be gaar: “Girdi’ nu fayleng e ke suweyrad Faanem nib Kireb.” (1 John 5:19) “Faanem nib Kireb” e ir Satan ni Moonyan’, nreb e engel nrib gel gelngin ni immoy nsom’on ni ir reb e engel rok Got, machane “de par ko tin riyul’.” (John 8:44, NW) Ku bay boch e engel nra uned ngak Satan ngar togopuluwgad ngak Got ni bochan e nge yag nrin’ed e pi n’en ni yad be ar’arnag. Bochan e re n’ey ma aram mar pingeged yad ngar manged boch e kan nib kireb. (Genesis 6:1-5) Ka nap’an ni togopuluw Satan nge pi moonyan’ rok ma aram e kar pared ni yad be tay tanggin urngin e pi n’en ni be buch u roy u fayleng, mab ga’ ni ngiyal’ ney ni gad bay riy e kari gel ni yad be rin’ e re n’ey. Chiney e kari damumuw Moonyan’ ma be “bannag e girdi’ nu fayleng ni polo’.” Bochan e re n’ey ma aram fan ni kari “gafgow e fayleng.” (Revelation 12:9, 12) Arrogon, rib kireb rogon e gagiyeg ni be tay Satan ni bochan e baadag ni be guy e girdi’ ni yad be gafgow. Ere Satan e ir e be k’aring e gafgow ko girdi’, ma gathi Got.

MU LEMNAG E RE N’EY: Kemus ni be’ nrib gel e kireb rok e ra i k’aring e gafgow ko girdi’ ndawor ra bucheged ban’en. Machane, be gaar e Bible: “Got e t’ufeg.” (1 John 4:16) Bochan ni ma t’ufegey Got, ma aram fan ndabiyog ni nge taw ko lem rok ni nge “rin’ e kireb.”​—Job 34:12, BT.

Machane, sana rayog ni ngam lemnag e re deer ney, ‘Uw n’umngin nap’an nra pag Got ni Gubin Ma Rayog Rok ni nge ulul Satan ko gagiyeg ni be tay nrib gel e kireb riy?’ Ba tamilang ko n’en ni kad weliyed nib fanenikan Got e tin nib kireb, ma ri ma kireban’ ko gafgow rodad. Maku reb e be gaar e Thin rok: “Mpaged fan urngin e magafan’ romed ngak, ya be lemnag rogomed.” (1 Peter 5:7) Gad ba t’uf rok Got mab gel gelngin, ere aram fan ndab ki n’uw nap’an ma bayi chuweg urngin e gafgow nge tin nde mat’aw ni be buch. Ma ireray e n’en nra weliy e bin migid e article. *