Yima yog ni faanra manang be’ laniyan’ be’ ma aram e be yip’ fan “nrayog rok ni nge nang rogon e pi n’en ni be lemnag be’ ara be buch rok ni aram e nge susunnag ni gowa ir facha’ ni be buch fapi n’em rok.” Bay reb e togta ni ka nog Rick Hanson ngak ni boor ban’en ni manang u murung’agen rogon ni ma lem e girdi’ ni yog nre n’ey “nrayog ni ngad nanged rogon laniyan’ be’ e ka ban’en nni gargelegdad ni bay rodad.”

MU LEMNAG E RE N’EY: Mang fan ni yigoo girdi’ u fithik’ e pi n’en ni kan sunmiy e rayog rorad ni ngar nanged rogon laniyan’ be’? Be weliy e Bible ni kan sunmiy e girdi’ ni yad bod yaan Got. (Genesis 1:26) Re n’ey ni kan sunmiydad ni gad bod yaan Got e be yip’ fan nrayog ni nge m’ug rarogon rodad mu kud daged boor i fel’ngin. Ere nap’an nra ayuweg be’ yugu boch e girdi’ ni bochan e manang rogon lanin’rad, ma aram e be m’ug rarogon Jehovah Got rok ni ir e En ni Ke Sunmiydad ni ma runguydad maku manang rogon lanin’dad.​—Proverbs 14:31.

Manang Got rogon lanin’dad ma ri dabun ni be guy ni gad be gafgow. Baaray e n’en ni be yog e Bible u murung’agen e girdi’ rok Got u Israel kakrom nib gel e gafgow ni ur ted u Egypt u nap’an ni ur moyed u rom ni yad e sib nge ku gafgow ni ur ted u lan 40 e duw ni yad be yan u daken e ted. Be gaar: “Rib gel e gafgow ni i tay laniyan’ u fithik’ urngin e gafgow ni ur ted.” (Isaiah 63:9, NW) Mu tay fanam i yan riy ni gathi kemus ni manang Got e gafgow ni yad be tay. Ya ku rayog ni nge thamiy gelngin e gafgow ni yad be tay. Be gaar Got: “Rib tamilangan’ug u gelngin e gafgow ni yad be tay.” (Exodus 3:7) Ku be gaar: “En nra math ngomed e ke math nga tiren marwag.” (Zekariah 2:8, NW) Nap’an nra gafgownagdad e girdi’, maku be un Got ngodad ko gafgow.

Be micheg e Bible ngodad ni yugu aram rogon ni gad be lemnag nib kireb e rodad ndariy rogon ni nge dag Got ngodad ni manang rogon lanin’dad, machane bin riyul’ riy e “Got e ka ba ga’ nga lanin’dad, ni gubin ban’en ma manang.” (1 John 3:19, 20) Manangdad ni kab fel’ rogon nga rogon ni gad manang. Ri manang urngin ban’en ni be buch rodad, nge n’en ni bay u lanin’dad. Manang rogon lanin’dad.

 N’en ni be micheg e Bible ngodad

• “Gimed ra meybil ngog, ma gu ra fulweg taban e meybil romed. Ma gimed ra piningeg ma ra lungug, ‘Gub aray.’”​—ISAIAH 58:9.

• “Yigoo gag e gu manang e tin ku gu tanomnag ni fan ngomed, tanom ni nggu mon’ognagmed ma gathi nggu gafgownagmed, pi tanom nem e nge yag ngomed e tin u mu nameged. Ma aram e bay um pininged gag. Ma bay um bad nguum meybilgad ngog ma bay gu fulweg taban e meybil romed.”​—JEREMIAH 29:11, 12, BT.

• “Kam yoloy gubin gaf i luag ni ke map’. Dariy u babyor rom ni kam yoloy?”​—PSALM 56:8, BT.

Faanra gad manang ni manang Got rarogon lanin’dad, ma gur, rayog ni nge ayuwegdad e re n’ey ni ngad athamgilgad u fithik’ e gafgow ni ma yib ngodad, fa? Am lemnag e n’en ni buch rok Maria. I gaar:

“Nap’an nri amith lanin’ug u tomuren ni yim’ ba pagel ni fakag ni 18 e duw rok u tomuren l’agruw e duw ni ke cancer, ma aram mug lemnag nrib mo’maw’ e par rodad ma ri boor ban’en ni ma buch rodad nde mat’aw. Gu damumuw ngak Jehovah nde rin’ ban’en ni nge taleg ara golnag e m’ar rok!

“Nel’ e duw nga tomuren, ma aram e bay reb e fager rog u lan e ulung nri gub t’uf rok ma ma runguyeg ni par nge motoyil ngog u nap’an ni gu be weliy rogon lanin’ug ngak ni gu be lemnag ndag t’uf rok Jehovah. I par nge motoyil ngog u lan boor e awa nde th’ab e thin rog. Tomuren ma aram me yog ba thin nu Bible ngog nri pi’ e athamgil nga lanin’ug. Re thin nem e bay ko 1 John 3:19, 20 ni be gaar: ‘Got e ka ba ga’ nga lanin’dad, ni gubin ban’en ma manang.’ I weliy ngog ni Jehovah e manang urngin e gafgow ni gad be yan u fithik’.

“Yugu aram rogon, mab mo’maw’ ni nge chuw e damumuw rog! Ma aram mug beeg fare thin ni bay ko Psalm 94:19 (BT) ni be gaar: ‘Yu ngiyal’ nder paslagan’ug ma ke magafan’ug, mag fal’eg lanin’ug nggu felan’.’ Nap’an nug beeg e pi thin ney ma gowa gag e kan yoloy ni fan ngog! Munmun ma aram mug guy nnap’an nug ra weliy ngak Jehovah murung’agen e gafgow ni gu be yan u fithik’ ma gu ma thamiy ni ke gapas lanin’ug ni bochan e gu manang ni be motoyil ngog ma manang e pi n’em.”

Re n’ey ni kad nanged ni Got e ri manang rarogodad nge lanin’dad e ri ma fal’eg lanin’dad! Machane, mang fan nri boor e gafgow ni gad be yan u fithik’? Gur, re n’ey e gechig ni be tay Got ngodad ko kireb ni gad be rin’, fa? Gur, ra rin’ Got ban’en ni nge chuweg urngin e pi gafgow ney, fa? Ireray e n’en ni gad ra weliy ko tin migid e article.