Paonan-o Mo Sadang Disiplinahon an Imo mga Anak?
“Aringit na gud ako samtang nagbibinantayon ha nalabay nga mga awto. Ini an ikatulo ka beses nga waray sunda ni Jordan an iya curfew. ‘Hain na ba hiya? May nahitabo ba ha iya? Nahunahuna ba niya nga nababaraka kami?’ Han umabot hiya, hirani na gud bumuto an akon dughan ha kasina.”—GEORGE.
“Gumuliat an akon anak nga babaye salit tigda nga natarantar ako. Paglingi ko, nakita ko nga ginkikinapotan niya an iya ulo ngan nagtitinangis. Ginlapatong ngay-an hiya han iya upat ka tuig nga manghod nga lalaki.”—NICOLE.
“‘Waray ko kawata an singsing. Nabilngan ko la ito!’ an nakikimalooy nga siring ni Natalie—an amon sais anyos nga anak. Pauroutro nga nagdidiwara hiya salit nasakitan gud kami ngan nagtangis. Maaram kami nga nagbibinuwa hiya.”—STEPHEN.
KON usa ka nga kag-anak, nasasabtan mo ba an inaabat hini nga mga kag-anak? Kon naatubang ka hin pariho nga sitwasyon, didisiplinahon mo ba an imo mga anak? Paonan-o? Sayop ba an pagdisiplina ha ira?
ANO AN DISIPLINA?
Ha Biblia, an pulong nga “disiplina” diri basta la katugbang ha pulong nga sirot. May kalabotan ito siyahan ha instruksyon, pagtutdo, ngan pagsaway. Ha bisan ano nga paagi, waray ito kalabotan ha pag-abuso o kamadarahog.—Proberbios 4:1, 2.
An kinag-anak nga pagdisiplina pariho ha pagtanom. An usa nga hardinero nagkukultibar han tuna, nagsasaribo han tanom, nagbubutang hin abuno, ngan nagtatagana hin proteksyon tikang ha peste ngan banwa. Samtang nagtutubo an tanom, bangin kinahanglan pangutdan ito han hardinero basi tumubo ha husto nga direksyon. Maaram hiya nga an iba-iba nga teknik makakabulig basi magin matambok ito. Ha pariho nga paagi, gin-aataman liwat han mga kag-anak an ira mga anak ha iba-iba nga paagi. Kondi usahay, kinahanglan nira maghatag hin disiplina, pariho han hardinero nga ginpapangutdan an tanom, mahimo tadungon dayon an sayop nga hilig han bata ngan buligan nga magtubo ha husto nga direksyon. Pero kinahanglan maghirot ha pangutod basi malikyan nga madaot an tanom. Ha pariho nga paagi, kinahanglan liwat magin mahirot an mga kag-anak ha pagpadapat hin disiplina.
Nagpakita hin susbaranan hi Jehova—an ngaran han Dios sumala ha Biblia—ha mga kag-anak. Epektibo gud ngan mapulsanon an disiplina nga iya iginhahatag ha iya masinugtanon nga mga magsiringba dinhi ha tuna salit ira gud ginhigugma an disiplina. (Proberbios 12:1) Ira ‘ginkakaptan hin maopay an pagtutdo’ ngan diri ginbubul-iwan ito. (Proberbios 4:13) Mabubuligan mo an imo anak ha pagkarawat hin disiplina kon susubaron mo an tulo nga aspekto han pagdisiplina han Dios: (1) mahigugmaon, (2) makatadunganon, ngan (3) diri nagbuburobag-o.
MAHIGUGMAON NGA DISIPLINA
Gugma an pundasyon ngan hinungdan han pagdisiplina han Dios. An Biblia nasiring: “Kon hin-o an hinihigugma ni Jehova iya sinasaway, bisan sugad han amay ha anak nga iya ikinalilipay.” (Proberbios 3:12) Dugang pa, hi Jehova “maloloy-on ngan mapinairon, mahinay ha pagkasina.” (Eksodo 34:6) Tungod hini, diri gud hiya nan-aabuso o madarahog. Diri liwat hiya nagyayakan hin nakakasakit, nagpapakaraot, o nanginginsulto, nga puydi makadaot “sugad hin nadulot nga kampilan.”—Proberbios 12:18.
Oo, diri bug-os nga masusubad han kag-anak an hingpit nga susbaranan han Dios ha pagpugong. Usahay mauubos an imo pasensya. Kondi ha tensyonado nga sitwasyon, hinumdumi nga an pagsirot samtang nasisina agsob mapintas, sobra, ngan waray maopay nga resulta. Ha pagkamatuod, an sugad nga pagdisiplina diri masisiring nga disiplina, kondi kawaray-kontrol ha kalugaringon.
Pero kon nagdidisiplina ka nga may gugma ngan pagpugong, magigin mas maopay an resulta. Tagda kon paonan-o ginsulbad nira George ngan Nicole, nga ginhisgotan kanina, an sitwasyon.
“Pag-abot ni Jordan, nasisina gud kami nga mag-asawa, pero nagpupugong kami samtang namamati han iya esplikasyon. Tungod kay gab-i na, nagdesisyon kami nga kinabuwasan na la mag-istorya. Urosa kami nga nag-ampo, katapos nangaturog. Kinabuwasan, kalmado na kami basi makiistorya ngan abuton an iya kasingkasing. Ginkarawat niya an amon ginhatag nga restriksyon ngan disiplina. Maopay na la nga nahunahuna namon nga diri mapulsanon nga atubangon dayon an sitwasyon samtang nasisina. Kon namamati anay kita, agsob nga maopay an resulta.”—George.
“Nasina gud ako han makita ko an ginbuhat han akon anak ha iya ate. Imbes nga isgan dayon, ginpasulod ko hiya ha iya kwarto tungod kay bangin ano la an akon mahimo ha iya. Han kalmado na ako, ginsidngan ko hiya nga diri husto nga manakit ngan iginpakita ha iya an iya ginbuhat ha iya ate. Maopay an nagin resulta hini ha iya. Nag-sorry hiya ngan ginhangkopan an iya ate.”—Nicole.
Oo, an husto nga pagdisiplina, bisan kon nag-uupod hin sirot, pirme basado ha gugma.
MAKATADUNGANON NGA DISIPLINA
An pagdisiplina ni Jehova diri kulang o sobra, kondi may husto nga sukol. (Jeremias 30:11; 46:28) Iya gintatagad an ngatanan nga sirkumstansya. Paonan-o ito masusubad han mga kag-anak? Hi Stephen, nga gin-unabi kanina, nagsiring: “Bisan kon nasakitan gud kami ngan diri maintindihan kon kay ano nga pauroutro nga nagdidiwara hi Natalie mahitungod han singsing, nangalimbasog kami nga tagdon an iya edad ngan panhunahuna.”
Nangangalimbasog hi Robert, an bana ni Nicole, nga tagdon an tanan nga sirkumstansya. Kon nagpipinasaway an bata, pauroutro nga ginpapakianhan niya an iya kalugaringon: ‘Yana la ba ini o pirme na la? Kapoy la ba an bata o maraot la an pamati? Sintomas ba ini hin iba nga problema?’
Naiintindihan liwat han makatadunganon nga mga kag-anak nga an ira mga anak diri gudtiay nga adulto. Maaram hito an Kristiano nga hi apostol Pablo. Hiya nagsurat: “Han bata pa ako, nagyayakan ako sugad hin bata, naghuhunahuna sugad hin bata.” (1 Corinto 13:11) Hi Robert nagsiring: “Usa han nakabulig ha akon nga magin makatadunganon ngan diri sobra magreak amo an paghinumdom han akon mga nabuhat han bata pa ako.”
Importante nga magin reyalistiko ha imo mga ginlalaoman, pero ayaw liwat takpi o konsintera an sayop nga buhat o batasan. Kon imo tatagdon an abilidad, limitasyon, ngan iba pa nga sitwasyon han imo anak, makakasiguro ka nga timbang ngan makatadunganon an imo pagdisiplina.
DIRI NAGBUBUROBAG-O NGA DISIPLINA
An Malakias 3:6 nasiring nga hi Jehova diri nagbabag-o. Nasarig hini an mga surugoon han Dios ngan naabat hin kasigurohan ha paghibaro hini. Kon diri liwat nagbuburobag-o an pagdisiplina, naabat gihap hin kasigurohan an mga anak. Kon nagbabag-o an imo patakaran depende han imo inaabat, bangin mawurok ngan maaringit an imo anak.
Hinumdumi nga hi Jesus nagsiring: “An iyo ‘oo,’ sadang magin oo, ngan an iyo ‘diri,’ sadang magin diri.” Aplikado gud ito may kalabotan ha disiplina nga iginpapadapat han mga kag-anak. (Mateo 5:37) Paghunahuna anay hin maopay antes maghatag hin ultimatum nga diri mo matitindogan. Kon sumiring ka ha imo anak nga sisirotan mo hiya kon magpinasaway hiya, siguroha nga bubuhaton mo ito.
An maopay nga komunikasyon han mga kag-anak importante basi diri magburobag-o an disiplina. Hi Robert nagsiring: “Kon napasugot ako han amon mga anak ha usa nga butang nga waray ngay-an itugot han akon asawa, ginbabag-o ko an akon desisyon basi suportahan an akon asawa.” Kon waray magkauyon an mga kag-anak kon paonan-o susulbaron an usa nga sitwasyon, maopay nga mag-istorya hin pribado ngan magkausa ha desisyon.
IMPORTANTE AN PAGDISIPLINA
Kon susubaron mo an mahigugmaon, makatadunganon, ngan diri nagbuburobag-o nga pagdisiplina ni Jehova, sigurado nga magpapahimulos an imo mga anak. An imo mahigugmaon nga paggiya makakabulig ha ira nga magin hamtong, responsable, ngan makatadunganon nga adulto. Sugad han siring han Biblia: “Pahiaraa an bata ha dalan nga iya paglalaktan, ngan bisan ha iya katigurang diri hiya mabaya hito.”—Proberbios 22:6.
