Hi Smita, * 35 anyos nga taga-Dhaka, Bangladesh, kilala nga mahigugmaon ngan buotan. Maduruto hiya ngan malipayon nga asawa nga naruruyag pagsumat ha iba han iya hinbaroan mahitungod ha Dios. Nahipausa an iya pamilya ngan kasangkayan han tigda nga nagkasakit hiya, ngan waray pa mag-usa ka semana namatay hiya!

Hi James ngan an iya asawa, pariho sobra 30 anyos pa la an edad ngan mag-opay an reputasyon pariho kan Smita. Usa ka higayon, binisita hira ha ira kasangkayan ha West Coast han Estados Unidos. Waray na hira makauli ha New York. Namatay hira ha aksidente nga nagbilin hin kasakit ha mga nahigugma ha ira ngan mga katrabaho.

Diri mo kinahanglan humirayo pa basi makita nga kalyap na an karaotan ngan pag-antos. An mga sibilyan, pati sundalo, namamatay ha girra. An mga inosente nabibiktima hin krimen ngan kamadarahog. An aksidente ngan nakakabaldado nga balatian waray ginpipili, anoman an edad o estado ha kinabuhi han usa. Ginpapara ha mapa han mga kalamidad an anoman nga maagian nga komunidad. Kalyap an diskriminasyon ngan kawaray-hustisya. Bangin ikaw mismo nagin biktima na han usa hini.

Natural la nga magpakiana:

• Kay ano nga nahitatabo an magraot nga butang ha mag-opay nga tawo?

• An Dios ba an angay basulon?

• Basta la ba nga nahitatabo an mga kalamidad, o binuhatan ini han tawo?

• Posible ba nga tungod han Karma—an resulta han binuhatan han usa ha iya naglabay nga kinabuhi—nga nag-aantos an usa?

• Kon may-ada makagarahum-ha-ngatanan nga Dios, kay ano nga diri man niya ginpapanalipdan an mag-opay nga tawo?

• Posible ba mawara an karaotan ngan pag-antos?

Basi mabaton ito, kinahanglan naton mabaton inin duha nga pakiana: Kay ano nga nahitatabo an karaotan ha ngatanan, ngan ano an pagbubuhaton han Dios?