Oo. Iginpapakita han Biblia ngan han mga eksperyensya nga ginbabaton han Dios an mga pag-ampo. An Biblia nasiring: “Gintatagbaw [han Dios] an hingyap han mga may kahadlok ha iya; namamati hiya han ira pangaraba para hin bulig, ngan iya hira gintatalwas.” (Salmo 145:19) Pero may mga butang nga kinahanglan mo himoon basi pamatian han Dios an imo mga pag-ampo.

An ginkikinahanglan han Dios

•   Pag-ampo ha Dios, diri kan Jesus, kan Maria, ha mga santo, mga anghel, o mga imahen. Hi Jehova nga Dios gud la an “Parapamati han pag-ampo.”—Salmo 65:2.

•   Pag-ampo uyon ha kaburut-on han Dios, o mga ginkikinahanglan, nga mababasa ha Biblia.—1 Juan 5:14.

•   Pag-ampo ha ngaran ni Jesus, nga ginkikilala an iya awtoridad. “Waray bisan hin-o nga nakakakadto ha Amay kon diri pinaagi ha akon,” siring ni Jesus.—Juan 14:6.

•   Pag-ampo nga may pagtoo, nga naghahangyo hin dugang nga pagtoo kon ginkikinahanglan.—Mateo 21:22; Lucas 17:5.

•   Magin mapainubsanon ngan sinsero. An Biblia nasiring: “Bisan kon hi Jehova naukoy ha kahitas-an, nakikita niya an mga mapainubsanon.”—Salmo 138:6.

•   Magin mapinadayunon. Hi Jesus nagsiring: “Padayon nga mangaro, ngan tatagan kamo.”—Lucas 11:9.

An diri ginkikinahanglan han Dios

•   An imo lahi o nasyonalidad. “An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.”—Buhat 10:34, 35.

•   An posisyon han imo lawas. Puydi ka mag-ampo ha Dios samtang nalingkod, naduko, naluhod, o natindog.—1 Cronicas 17:16; Nehemias 8:6; Daniel 6:10; Marcos 11:25.

•   Kon nag-aampo ka man hin hilom o ha daku nga tingog. Ginbabaton han Dios bisan an mga pag-ampo nga diri nababatian han iba.—Nehemias 2:1-6.

•   Kon daku man o gutiay an problema nga imo igin-aampo. Gin-aaghat ka han Dios nga ‘ipasa ha iya an ngatanan mo nga kabaraka, kay nagtatagad hiya ha imo.’—1 Pedro 5:7.