Ndi zwa ndeme uri mme a vhe tsini na ṅwana wawe awara ya u tou thoma musi ṅwana a tshi kha ḓi tou bva u bebiwa. U vha hawe tsini nae zwi thusa ṅwana uri a aluwe zwavhuḓi. *

Ndi mini zwine zwa ita uri mme a ṱhogomele lutshetshe lwawe nga vhuronwane? Kha bugu ine ya ri The Journal of Perinatal Education, muphurofesa Jeannette Crenshaw o amba uri hormone ya oxytocin “i ita uri mme a vhe na lutamo lwa u fara ṅwana wawe, u mu sedza na u mu mamisa musi a tshi kha ḓi tou bva u mu beba.” Iṅwe hormone ine ya vha hone nga tshenetsho tshifhinga, “i thusa mme uri a ḓivhe nḓila ine a tea u ṱhogomela ṅwana wawe ngayo” na u khwaṱhisa vhushaka hawe na ṅwana wawe. Ndi ngani zwenezwo zwi zwa ndeme?

Vhushaka ha tsini vhune ha vha hone vhukati ha mme na ṅwana ho sikwa nga Yehova Mudzimu ane a vha Musiki washu wa lufuno. * Khosi Davida o livhuwa Yehova nge a ita uri a ‘bebiwe’ na u ita uri a ḓipfe o tsireledzea musi a tshi kuvhatedzwa nga mme awe. O rabela a ri: “Ndo kumedzelwa Iwe tshee nda bebiwa; ndi kha ḓi leliwa nga mme-anga wo vha U Mudzimu wanga.”—Psalme ya 22:9, 10.

ṰHOGOMELANI HEZWI: Arali Mudzimu o ita uri mme a ṱhogomele ṅwana wawe nga vhulondi na u mu thusa musi hu na zwine a ṱoḓa, naa a zwi khagala uri Mudzimu u na dzangalelo kha riṋe roṱhe sa “vhana vha Mudzimu”?—Mishumo 17:29.

Yesu Kristo ane a ḓivha Musiki khwine u fhira roṱhe, o funza uri: “Naa zwiṋoni zwiṱuku zwivhili a zwi rengwi nga peni nthihi? Naho zwo ralo, a hu na na tshithihi tshazwo tshine tsha ḓo wela fhasi Khotsi aṋu a sa zwi ḓivhi. Fhedzi mavhudzi oṱhe a re ṱhohoni dzaṋu o vhalwa. Ngauralo, ni songo ofha: Inwi ni vha ndeme vhukuma u fhira zwiṋoni zwiṱuku zwinzhi.”—Mateo 10:29-31.

Ndi vhathu vha si gathi fhedzi vhane vha ṱhogomela zwiṋoni zwiṱuku nahone vhaṅwe a vha vhuyi vha zwi ṱhogomela musi zwi tshi wela fhasi. Fhedzi Khotsi ashu wa ṱaḓulu u ṱhogomela zwoṱhe! Fhedzi vhathu ndi vha ndeme u fhira zwiṋoni zwinzhi. Zwine ra zwi guda zwi tou vha khagala: Ni “songo ofha” uri Mudzimu ha ni ḓivhi. Zwo fhambanaho na zwenezwo, u na ndavha na inwi!

 Bivhili i ri khwaṱhisedza uri

• “A hoṱhe—maṱo a Yehova; a vhona vhavhi na vhavhuya.”—MIRERO 15:3.

• “Maṱo a Yehova a vhona vho lugaho; nḓevhe dzawe dzi pfa u lila havho.” —PSALME ya 34:15.

• “Ndi ḓo imba ndi tshi takalela tshilidzi tshau; ngauri wo vhona vhusiwana hanga; U ḓivha u khakhelwa ha muya wanga.”—PSALME ya 31:7.

Naa zwi ḓo ita uri hu vhe na phambano vhutshiloni hashu arali ra ḓivha uri Mudzimu u na ndavha na riṋe na uri u a ri ṱhogomela? Ee, Hannah * ane a bva ngei England, o ri:

Tshifhinga tshinzhi ndo vha ndi tshi pfa u nga Yehova ha mpfuni na uri thabelo dzanga a dzi fhindulwi. Ndo vha ndi tshi pfa u nga ndi nga nṱhani ha uri athina lutendo. Ndo vhona u nga ndi khou pfiswa vhuṱungu kana ndi nga nṱhani ha uri a thi wa ndeme. Ndo vha ndi tshi pfa u nga Mudzimu ha na ndavha na nṋe.”

Naho zwo ralo, Hannah ha tsha timatima uri Yehova u a mu funa na uri u na ndavha nae. Ndi mini zwe zwa shandula nḓila ye a vha a tshi ḓipfa ngayo? O ri: “Ndo shanduka nga zwiṱuku nga zwiṱuku. Ndi humbula iṅwe nyambo ye ya vheiwa miṅwahani minzhi yo fhiraho ye ya vha i tshi khou amba nga ha tshirengululi tsha Yesu. Yeneyo nyambo yo nkwama vhukuma nahone yo ita uri ndi vhe na vhungoho ha uri Yehova u a mpfuna. Nahone musi thabelo dzanga dzi tshi fhindulwa, kanzhi ndo vha ndi tshi lila nga nṱhani ha uri ndo kona u zwi ṱhogomela uri Yehova u a mpfuna. Zwiṅwe hafhu, musi ndi tshi guda Bivhili na u ya miṱangano ya Vhukriste, ndo guda zwo engedzeaho nga ha Yehova, nḓila ine a vha ngayo na nḓila ine a ḓipfa ngayo nga ha riṋe. Zwino ndi kona u vhona zwavhuḓi uri Yehova u a ri funa na u ri tikedza nahone o ḓiimisela uri ṱhogomela nga muthihi nga muthihi.”

Zwe Hannah a zwi amba zwi a ṱuṱuwedza. Fhedzi ni nga vha hani na vhungoho ha uri Mudzimu u a ni pfesesa na u pfesesa nḓila ine na ḓipfa ngayo? Thero i tevhelaho i ḓo fhindula yeneyi mbudziso.