Bivhili i ri: “Yehova! Zwi ḓo guma Iini ndi tshi vhidzelela Ú sa pfi? Ndi ṱavhela mavemu mukosi, Ú sa lamuleli!” (Habakuku 1:2, 3) Enea maipfi o ambiwa nga Habakuku munna o lugaho we a takalelwa nga Mudzimu. Naa thabelo yawe yo vha i tshi sumbedza uri ha na lutendo? Hai! Mudzimu o khwaṱhisedza Habakuku uri o vhea tshifhinga tshine a ḓo fhelisa ngatsho tshengelo.—Habakuku 2:2, 3.

Musi inwi kana muṅwe muthu a tshi khou shengela, zwi nga ni lelutshela u amba uri Mudzimu u khou lenga u dzhia vhukando nahone o vha o tea o no dzhenelela. Fhedzi, Bivhili i ri khwaṱhisedza uri: “Yehova ha ongolowi u ita zwe a fulufhedzisa, samusi vhaṅwe vhathu vha tshi mu dzhia sa ane a ongolowa, fhedzi ha ni fheleli mbilu ngauri ha ṱoḓi muthu naho e ufhio a tshi lozwiwa, fhedzi u tama vhoṱhe vha tshi rembuluwa.”—2 Petro 3:9.

Hu si kale! Yesu o dzumbulula uri hu ḓo vha na murafho une wa ḓo vhona zwiga zwa maḓuvha a vhufhelo ha ano “maitele a zwithu.” (Mateo 24:3-42) U ḓadzea ha vhuporofita ha Yesu musalauno zwi sumbedza uri vhufhelo vhu tsini. *

Mudzimu u ḓo fhelisa hani tshengelo yoṱhe? Musi Yesu a tshee kha ḽifhasi, o sumbedza nḓila ine Mudzimu a vha ngayo na maanḓa nga u fhelisa zwithu zwe zwa vha zwi tshi khou dina vhathu. Ṱhogomelani dziṅwe tsumbo dza zwenezwi zwithu.

Khombo Dza Mupo: Musi Yesu na vhaapostola vhawe vha tshi khou wela Lwanzhe lwa Galilea, maḓumbu o ṱoḓa u ita uri tshikepe tshi nupele. Fhedzi Yesu o sumbedza uri ene na Khotsi awe vha a kona u langa mupo. (Vhakolosa 1:15, 16) Yesu o ri: “Fhumula u ri tshete!” Ho itea mini? “Ḓumbu ḽa fhumula, ha vha na u dzika huhulu.”—Marko 4:35-39.

Malwadze: Yesu o vha a tshi ḓivhelwa uri u na vhukoni ha u fhodza vho pofulaho, zwihole, vha mapele kana zwithu zwe zwa vha zwi tshi khou vhilaedzisa vhathu. Bivhili i ri: “A fhodza vhoṱhe vha lwalaho.”—Mateo 4:23, 24; 8:16; 11:2-5.

Ṱhahelelo Ya Zwiḽiwa: Yesu o shumisa maanḓa e a vha o fhiwa nga Khotsi awe u itela uri hu vhe na zwiḽiwa zwinzhi. Bivhili yo amba uri o fusha vhathu vhanzhi luvhili lwoṱhe musi e kha vhuḓinḓa hawe.—Mateo 14:14-21; 15:32-38.

Lufu: Mvuwo tharu dze Yesu a dzi ita dzo sumbedza uri Yehova u na maanḓa a u fhelisa lufu. Iṅwe ya mvuwo dze a dzi ita ndi musi a tshi vusa muthu we avha e na maḓuvha maṋa o lovha.—Marko 5:35-42; Luka 7:11-16; Yohane 11:3-44.