NDI NGANI VHAṄWE VHA TSHI TIMATIMA: U ya nga pfunzo ya zwenezwino, mulalavhungu washu u woṱhe u nga vha u na pulanete dzi ṱoḓaho u vha bilioni dza 100. Musi vha tshi vhona vhuhulu ha fhethu hoṱhe, vhathu vhanzhi vha ḓivhudzisa uri, ‘Ndi ngani Musiki ramaanḓaoṱhe a tshi lavhelesa zwine vhathu vho nyadzeaho vha zwi ita kha pulanete ṱhukhu nga u rali?’

ZWINE IPFI ḼA MUDZIMU ḼA FUNZA ZWONE: Mudzimu ho ngo sokou ri ṋea Bivhili nahone a si tsha vha na dzangalelo kha riṋe. Nṱhani hazwo, Yehova u ri khwaṱhisedza uri: “Ndi ḓo U dededza nga maṱo anga.”—Psalme ya 32:8.

Ṱhogomelani Hagara, mufumakadzi wa Muegipita wa ḓanani ḽa vhu 20 ḽa miṅwaha B.C.E. Hagara o vha a tshi nyadza mutholi wawe Sarai, nga zwenezwo, Sarai a mu shonisa, nahone Hagara a shavhela sogani. Naa Mudzimu ho ngo tsha vha na dzangalelo kha Hagara nge a ita vhukhakhi? Bivhili i a fhindula musi i tshi ri: “Muruṅwa wa Yehova a mu wana.” Onoyo muruṅwa o khwaṱhisedza Hagara musi a tshi ri: “Yehova o U pfa U tshi ṱhuphiwa.” Nga zwenezwo, Hagara a vhudza Yehova a ri: “U Mudzimu ane a vhona.”—Genesi 16:4-13.

“Mudzimu ane a vhona,” na inwi u khou ni vhona. Sa tsumbo: Mme a re na lufuno u ṱhogomela nga ho khetheaho vhana vhawe vhaṱuku, samusi ṅwana muṱuku a tshi ṱoḓa ṱhogomelo khulwane kha vhabebi vhawe. Nga hu fanaho, Mudzimu u a ri vhona musi ri tshi ḓiṱukufhadza na u fhelelwa nga nungo. Yehova u ri: “Ndi dzula ṱaḓulu fhethu hukhethwa, nda dovha nda dzula na vha vhaisalaho, vha mimuya yo pwanyeledzwaho; uri ndi hanyisa mimuya ya vho pwanyeledzwaho, ndi hanyise dzimbilu dza vha vhaisalaho.”—Yesaya 57:15.

Naho zwo ralo, ni nga ḓivhudzisa uri: ‘Mudzimu u ni vhona nga nḓila-ḓe? Naa u nkhaṱula u ya nga mbonalo yanga, kana u vhona zwa nga ngomu nahone a pfesesa zwine nda vha zwone?’