KAFAI e fai atu se tino ki a koe, “Ko pili o se toe ai ne fakalavelave ‵tupu fakafuasei,” ka saga atu koe pefea ki ei? Kāti ka tali mai koe, “Fai koe! A fakalavelave ‵tupu fakafuasei ne mea masani eiloa o te olaga.” Io me ka fai ifo koe ki a koe eiloa, ‘Ko oi te tino e taumafai tou tagata tenei o fakaloiloi?’

E tiga eiloa e foliga mai me ka isi faeloa ne fakalavelave o te natula, e isi eiloa se fakamoemoega mautinoa me ka isi se ‵fuliga ki te mea tenei. Kae ka se maua te ‵fuliga tenei e auala i taumafaiga a tino. E se mafai o malamalama katoatoa a tino i te auala e ‵tupu ei a mea i te natula kae kaia foki e ‵tupu ei. Kae maise i ei me e se mafai o pule atu latou ki ei io me ‵fuli ne latou. Ne tusi mai a te tupu o Isalaelu ko Solomona telā ne lauiloa ona ko tena poto, penei: “E se mafai eiloa o malamalama [a tino] i mea e fai ne te Atua. Me e pefea eiloa tou taumafai, e se mafai eiloa o iloa ne koe. E isi ne tino ‵poto e fai mai me e iloa ne latou, kae tela la, e se iloa lele eiloa ne latou.”​—Failauga 8:17.

Kafai e se mafai ne tāgata o pule atu ki fakalavelave o te natula, ko oi la e mafai o pule ki ei? E fakaasi mai i te Tusi Tapu me i te ‵tou Mafuaga ko te tino telā ka fai ne ia te ‵fuliga tenei. A iako te Tino telā ne fakatumau ne ia a tamilosaga o te lalolagi e pelā mo te tamilosaga o te vai. (Failauga 1:7) E se pelā mo tino, e seai eiloa se tapula ki te malosi o te Atua. Ne fakamaoni mai ne te pelofeta ko Ielemia a te mea tenei, i ana pati: “Te Aliki Sili [ko Ieova], ne faite ne koe a te lagi mo te lalolagi ki tou ‵mana malosi; e seai se mea e faigata ki a koe.” (Ielemia 32:17) Ona la ko te Atua ne faite ne ia a te lalolagi mo mea katoa i ei, e iloa ne ia o fakagasue‵sue a mea konā ko te mea ke mafai ne tino o ‵nofo i luga i ei i te filemu mo te tokagamalie.​—Salamo 37:11; 115:16.

Ka fai la pefea ne te Atua a te ‵fuliga telā e manakogina? A mea fakama‵taku e uke kolā ko ‵tupu i te lalolagi i aso nei e fai mo fai se “fakailoga” e fakamailoga ki ei a “te gataga o te olaga tenei.” Muna a Iesu: “Kafai ko lavea ne koutou a mea katoa konei ko ‵tupu, ko iloa ei ne koutou me ko pili mai te Malo o te Atua.” (Mataio 24:3; Luka 21:31) A te Malo o te Atua, se malo faka-te-lagi telā ka aumai ne ia a ‵fuliga ‵lasi ki te lalolagi kae ka pule faka‵lei atu foki ki mea ma‵losi o te natula. E tiga eiloa e lava te malosi o Ieova te Atua ke fai ne ia te mea tenei, ne tuku atu eiloa ne ia te galuega tenei ke fai ne tena Tama. I ana pati e uiga ki te tino tenei, ne fai mai penei a te pelofeta ko Tanielu: “Ne avatu ki a ia te pule, te fakaaloalo, mo te ‵malu fakatupu, ko te mea ke tavini atu ki a ia a tino katoa o malo katoa mo ‵gana kesekese.”​—Tanielu 7:14.

Ko oti ne tuku atu ki te Tama a te Atua, ko Iesu Keliso, a te malosi e lava ke fai ne ia a ‵fuliga katoa kolā e manakogina, ke fai ei a te lalolagi mo fai se koga fakafiafia loto. I te lua afe tausaga ko ‵teka, ne fakaasi mai ne Iesu i se auala foliki me e mafai ne ia o pule atu ki mea ma‵losi o te natula i tena nofoga i te lalolagi nei. I te taimi e tasi, ne ‵nofo ei a Iesu mo ana soko i te poti i te Vai o  Kalilaia, “ne poko se kaumatagi lasi kae ne ‵fati a galu ki loto i te poti, toeitiiti eiloa ko pulu.” Ne manava‵se valevale ana soko. Ona ko te lotou ma‵taku, ne ‵saga atu ei latou ki a Iesu. Ne a mea ne fai ne Iesu? “Ne tu aka tou tagata ki luga kae ‵liko ne ia te matagi kae fai atu ki te tai: ‘Malū! Filemu!’ Ne mate te matagi kae malū palapala te tai.” Ne ofo ana soko kae fesili aka penei: “Ko oi la te tino tenei? E faka‵logo foki te matagi mo te tai ki a ia.”​—Maleko 4:37-41.

Talu mai te taimi tenā, ko oti ne fakamasiki aka a Iesu ki te lagi kae tuku atu ki a ia te malosi mo te pulega telā e lasi kae maluga atu. E pelā me ko te Tupu o te Malo o te Atua, e nofo mo ia te tiute mo te mafai ke fai ne ia a ‵fuliga katoa kolā e manakogina ke tuku atu ei ki tino i te lalolagi se olaga filemu kae tokagamalie.

Kae pelā mo te mea ko oti ne lavea ne tatou, a te ukega o mea ‵tupu mo fakalavelave ‵tupu fakafuasei ne fai eiloa ne tāgata ona ko olotou faifaiga kaima‵nako. Ne a mea ka fai ne te Malo ki a latou kolā e tumau i vaegā auala penā kae ita ma ‵fuli? E faipati loa te Tusi Tapu ki te foki mai o te Aliki ko Iesu “mai te lagi fakatasi mo ana agelu ‵mana i se afi ‵ka ulaula, o tuku atu te taui ma sui ki a latou kolā e se iloa ne latou te Atua mo latou kolā e se faka‵logo ki te tala ‵lei e uiga ki te ‵tou Aliki ko Iesu.” Ao, ka “fakaseai atu foki a latou kolā e fakama‵sei ne latou te lalolagi.”​—2 Tesalonia 1:7, 8; Fakaasiga 11:18.

Fakamuli loa, ka pule katoatoa atu ei a Iesu Keliso, te “Tupu o tupu,” ki mea ma‵losi o te natula i te lalolagi nei. (Fakaasiga 19:16) Ka fakamautinoa aka ne ia ke se toe logo‵mae a tino kolā ka pule atu ki ei te Malo i so se fakalavelave fakamataku. Ka fakaaoga ne ia tena malosi ke pule atu ki tau o aso ko te mea ke aoga a tamilosaga mo tau o aso ki tino. A ko te mea telā ka iku mai i ei ko te mea telā ko leva ne tauto atu a Ieova te Atua ki ana tino penei: “Kae ka avatu ne au a vaiua i te taimi tonu, ko te mea ke fua mai ne te laukele a lakau kaina mo lakau foki ka fua mai olotou fuataga.” (Levitiko 26:4) Ka mafai ne tino o faite olotou fale e aunoa mo te ma‵taku i te mea mana ‵galo atu i fakalavelave fakama‵taku: “A tino ka faite olotou fale ko nofo ei i ei - ka se toe fakaaoga eiloa ne nisi tino fakaa‵tea. Ka ‵toki olotou togāvine kae inu fia‵fia i te uaina mai i olotou togāvine konā, kae se toe inu ne nisi tino fakaa‵tea.”​—Isaia 65:21.

E seai se fakalotolotolua me ‵pau eiloa koe mo nisi tino kolā e ma‵nako o ola i se lalolagi telā e se toe ai i ei ne fakalavelave ‵tupu fakafuasei. Kae ne a la au mea e ‵tau o fai ke nofo atu koe i konā? A “latou kolā e se iloa ne latou te Atua” mo “latou kolā e se faka‵logo ki te tala ‵lei” ka se talia ke ola i te lalolagi telā ka se toe ai ne fakalavelave ‵tupu fakafuasei i ei. E manino ‵lei me e ‵tau eiloa mo te tino o tauloto nei e uiga ki te Atua kae ‵lago atu ki tena fakatokaga mō te pulega ki te lalolagi nei. E manako te Atua ke iloa ne tatou a ia kae ke faka‵logo foki ki te tala ‵lei o te Malo telā ko oti ne fakatoka ne ia e auala i tena Tama.

A te ‵toe auala ‵lei ke tauloto ki te faiga o te mea tenei ko te sukesuke faka‵lei ki te Tusi Tapu. E maua i ei a fakamatalaga katoa kolā e manakogina ke mafai koe o ola i se olaga tokagamalie mai lalo i te pulega a te Malo. Kaia e se fakamolemole atu ei koe ki Molimau a Ieova ke fesoasoani atu ke tauloto koe ki mea kolā e akoako mai i te Tusi Tapu? E toka fua latou o fai te fakamolemole a koe tenā. Kafai e taumafai malosi koe ke iloa ne koe te Atua kae fakalogo foki ki te tala ‵lei, e mautinoa eiloa me ka lavea ne koe te ‵tonu o pati i te Faataoto 1: 33, penei: “So se tino e saga tonu [io me fakalogo] mai ki a au ka maua ne ia te saogalemu. Ka tokagamalie tena olaga, kae seai se mea e mataku ki ei.”