Se Kau Faitaulaga o Tupu Telā ka Aoga ki Tino Katoa

“Kae ko koutou se matakāiga ne filifiligina, ne faitaulaga kolā ka fai mo tupu, se fenua tapu, ne tino fakapito o te Atua.”​—1 PETELU 2:9.

E MAFAI O FAKAMATALA MAI NE KOE?

Ko te taimi fea ne fai mai ei te folafolaga muamua e uiga ki se kau faitaulaga o tupu?

E tuku mai pefea ne te feagaiga fou se kau faitaulaga o tupu?

Ne a mea aoga ka aumai ne te kau faitaulaga o tupu ki tino katoa?

1. Kaia e fakaigoa foki ei “te ‵kaiga a te Aliki i te afiafi” ki te Fakamanatuga, kae se a te pogai e fai ei te fakamanatuga tenā?

ITE afiafi o te po 14 o Nisani i te tausaga ko te 33 T.A., ne fakamanatu ei ne Iesu Keliso mo ana apositolo e toko 12 a te fakamanatuga faka-Iutaia ko te Paseka, mō te ‵toe taimi eiloa. I te fanoga keatea a Iuta te Isikaliota, ne kamata ei ne Iesu se isi fakamanatuga, telā ne fakaigoa fakamuli ki “te ‵kaiga a te Aliki i te afiafi.” (1 Kolinito 11:20) Ne fai fakalua mai a Iesu penei, “Ke fai faeloa te mea tenei.” Ne fakaigoa foki ei a te mea tenā ki te Fakamanatuga, se fakamanatuga telā e faka‵mafa mai i ei te tāua o tena mate. (1 Kolinito 11:24, 25) I te lotou faka‵logo ki te fakatonuga tenei, e fai ne Molimau a Ieova a te Fakamanatuga tenei i te lalolagi kātoa i tausaga takitasi. I te 2012, ka pakū eiloa a te po 14 o Nisani i te kalena faka-te-Tusi Tapu ki te Aso Fa po 5 o Apelila māfai ko tō te mata o te la.

2. Ne a pati a Iesu ne fai e uiga ki mea fakatusa, ko te falaoa mo te uaina kolā ne fakaaoga ne ia?

² Ne fakamatala fakatoetoe mai ne te soko ko Luka i fuaiupu e lua a pati a Iesu ne fai i te taimi tenā, penei: “Ne puke foki ne ia te falaoa, fai te fakafetai, tofitofi, kae tufatufa atu ki a latou, ana muna: ‘E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fai se fakamasauaga ki a au.’ E penā foki te ipu, i te otiga a latou ne ‵kai i te ‵kaiga i te afiafi, fai atu ei a ia: ‘E fakauiga a te ipu tenei ki te feagaiga fou e auala i toku toto, telā ka ‵ligi ki tua mō koutou.’” (Luka 22:19, 20) Ne malamalama pefea a te kau apositolo i te uiga o pati konei?

3. Ne malamalama pefea a apositolo i pati a Iesu e uiga ki te falaoa mo te uaina?

³ Ona ko latou ne tino Iutaia, ne masani ‵lei a apositolo mo taulaga manu, kolā e ofo atu ne faitaulaga ki te Atua i te faletapu i Ielusalema. Ne fai a taulaga konā ko te mea ke maua ei te taliaga a Ieova, kae ne fai a taulaga e uke mō te fakamagaloga o agasala. (Levitiko 1:4; 22:17-29) Tela la, i te taimi ne fai atu ei a Iesu me ‘ka tuku atu tena foitino kae ‵ligi ki tua tena toto mō latou,’ ne malamalama a te kau apositolo me ne fakauiga a ia ki tena ola ‵lei katoatoa telā ne ‵tau o tuku atu e pelā me se taulaga. Se taulaga telā ne lasi fakafia atu tena aoga i lō taulaga e fai ki manu.

4. Se a te mea ne fakauiga ki ei a Iesu i ana pati konei: “E fakauiga a te ipu tenei ki te feagaiga fou e auala i toku toto”?

⁴ Kae se a te mea ne fakauiga a Iesu ki ei i ana pati: “E fakauiga a te ipu tenei ki te feagaiga fou e auala i toku toto”? Ne iloa ne apositolo a te valoaga a Ielemia e uiga ki te feagaiga fou i te Ielemia 31:31-33. (Faitau.) Ne fakaasi mai i pati a Iesu me ko kamata ne ia te feagaiga fou, telā ka sui ne ia te feagaiga telā ne fai ne Ieova mo tino Isalaelu e auala i a Mose. E mata, e isi se sokoga o feagaiga e lua konei?

5. Ne a fakamoemoega ne ofo atu ne te feagaiga o te Tulafono ki te kau Isalaelu?

⁵ E tonu, e isi eiloa se sokoga ‵lei o te avā feagaiga konei. I te taimi ne tuku atu ei ne Ieova a te feagaiga o te Tulafono ki te fenua o Isalaelu, ne fai atu a ia penei: “Kafai e faka‵logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi kātoa e o oku, ka ko koutou ko oku tino filifilia, ko tino kolā ko tuku katoatoa mai olotou olaga ki a au, kae ka tavini mai koutou ki a au e pelā mo ne faitaulaga.” (Esoto 19:5, 6) Ne malamalama pefea a tino Isalaelu i pati konei?

TE FOLAFOLAGA E UIGA KI SE KAU FAITAULAGA O TUPU

6. Se a te folafolaga telā ne fakataunu e auala i te feagaiga o te Tulafono?

⁶ Ne malamalama a tino Isalaelu i te tāua o te pati “feagaiga,” me ne fai ne Ieova se vaegā mea penā mo olotou tupuga ko Noa mo Apelaamo. (Kenese 6:18; 9:8-17;15:18; 17:1-9) E pelā me se vaega o tena feagaiga ki a Apelaamo, ne tauto atu a Ieova, penei: “E auala i tau fanau, ka fakamanuia ei ne atufenua katoa o te lalolagi a latou eiloa.” (Kenese 22:18, Tusi Paia, Samoa) Ne fai ne Ieova a te feagaiga o te Tulafono ke fesoasoani atu ki te fakataunuga o te folafolaga tenei. Ona ko te mea tenā, ne mafai ei o fai a tino Isalaelu mo fai “ne tino ‵tonu” o Ieova. Se a te pogai? Ke ‘tavini atu latou ki a Ieova e pelā me se malo o faitaulaga.’

7. Se a te mea ne fakauiga ki ei te tugapati ko te kau ‘faitaulaga kolā ka fai foki mo fai ne tupu’?

⁷ Ne masani a tino Isalaelu ki tupu mo faitaulaga, kae ko Mekisateko fua ne talia ne Ieova ke maua ne ia a tofi konā e lua i aso mua. (Kenese 14:18) E auala i te Tulafono, ne ofo atu ne Ieova ki te kau Isalaelu te avanoaga ke maua mai i a latou se ‘malo o faitaulaga.’ Kae e pelā mo te mea e fakaasi fakamuli mai i te Tusi Tapu, ne fakasino atu loa te avanoaga tenā ki se kau o ‘faitaulaga kolā ka fai foki mo fai ne tupu.’​—1 Petelu 2:9.

8. Ne a galuega e fai ne faitaulaga kolā ne filifili ne te Atua?

⁸ E tonu, a te tupu ko ia telā e pule atu. Kae se a te mea e fai ne te faitaulaga? E fakamatala mai i te Epelu 5:1: “Me i faitaulaga sili katoa ne filifili mai i tāgata, kae ne ‵tofi aka latou ke tavini atu ki te Atua mō tatou, ko te mea ke ofo atu ne latou a meaalofa mo taulaga mō agasala.” Tela la, a te faitaulaga telā e filifili ne Ieova, e sui ne ia a tino agasala i mua o te Atua. E fakamolemole atu a ia ki a Ieova ke fakamagalo a agasala a tino mai te ofo atu o taulaga ki a Ieova. E sui foki ne te faitaulaga a Ieova i mua o tino, o akoako atu ki a latou a tulafono a te Atua. (Levitiko 10:8-11; Malaki 2:7) Kae ko te faitaulaga telā e filifili ne te Atua i aso nei, e fesoasoani atu o faka‵lei aka te fesokotakiga o tino agasala mo te Atua.

9. (a) Se a te mea ne ‵tau o fai ne tino Isalaelu ke mafai ei o fai latou mo fai ‘se malo o faitaulaga’? (e) Kaia ne filifili ei ne Ieova a nisi tino ke fai mo faitaulaga i loto i Isalaelu? (i) Kaia ne seki mafai ei o fai a tino Isalaelu mo fai se ‘kau faitaulaga o tupu’ mai lalo o te feagaiga o te Tulafono?

⁹ E auala i te feagaiga o te Tulafono ne maua ei ne tino Isalaelu te avanoaga ke fai pelā me ne tupu mo faitaulaga mō nisi ‘tino katoa.’ Kae e isi se mea e ‵tau o fai ne te kau Isalaelu ke mafai ei o maua ne latou te avanoaga gali tenei. Ne fai atu te Atua ki a latou: ‘Māfai e faka‵logo mai koutou ki a au kae tausi ki taku feagaiga.’ E mata, ne mafai o “faka‵logo” a tino Isalaelu ki a Ieova? Ao, kae ne seki mafai o faka‵logo katoatoa latou ki a ia. (Loma 3:19, 20) Tenā eiloa te pogai ne fakatoka ei ne Ieova se kau faitaulaga i loto i Isalaelu. Ne seki fai latou e pelā me ne tupu. Ne ofo atu ne latou a taulaga manu mō agasala, kolā e mautinoa me ka fai eiloa ne tino Isalaelu. (Levitiko 4:1- 6:7) Ne aofia foki i ei a agasala a faitaulaga konā. (Epelu 5:1-3; 8:3) Ne talia ne Ieova a taulaga konā, kae ne seki mafai o fakamagalo katoatoa i ei a agasala a tino Isalaelu. Ne seki mafai o faka‵lei katoatoa ne te kau faitaulaga mai lalo o te feagaiga o te Tulafono a te tulaga o tino Isalaelu fakamaoni i mua o te Atua. Ne fai mai te apositolo ko Paulo, penei: “Me e se mafai ne toto o pulumakau mo kouti o tapale keatea a agasala.” (Epelu 10:1-4) Ona ko te mea ne seki faka‵logo a tino Isalaelu ki mea katoa i te Tulafono, ne tumau eiloa latou i te malaia. (Kalatia 3:10) Ona ko te lotou tulaga tenā, ko se mafai ei o tavini atu latou ki nisi tino katoa o te lalolagi e pelā me se kau faitaulaga o tupu.

10. Se a te pogai ne tuku atu ei te feagaiga o te Tulafono?

¹⁰ E se fakauiga i ei me ka se mafai eiloa o fai a tino Isalaelu mo fai se vaega o se ‘malo o faitaulaga,’ e ‵tusa mo te folafolaga a Ieova. Kafai e taumafai latou mo te fakamaoni o faka‵logo, ka maua eiloa ne latou te avanoaga tenei​—kae e se mai lalo i te Tulafono. Kaia? (Faitau te Kalatia 3:19-25.) Ke malamalama tatou i te mea tenei, e ‵tau o iloa ne tatou te pogai ne tuku atu ei te Tulafono. Ne puipui ne te Tulafono a tino Isalaelu faka‵logo mai tapuakiga ‵se. Ne fai ei ke iloa ne latou olotou agasala mo te manakoga ke maua ne latou se taulaga telā e sili atu i lō te mea telā e mafai o ofo atu ne te lotou faitaulaga sili. Ne fai a te Tulafono e pelā me se faiakoga telā e takitaki ne ia latou ki te Keliso, io me ko te Mesia, ko tofi kolā e fakauiga ki te “Tino Fakaekegina.” Kae kafai e oko mai te Mesia, ka kamata ei ne ia te feagaiga fou telā ne ‵valo mai ne Ielemia. A tino kolā e talia ne latou te Keliso ka ‵kamigina ke fai mo fai ne vaega o te feagaiga fou kae ka fai ei latou mo fai se ‘malo o faitaulaga.’ Ke onoono aka tatou me e pefea la.

E MAUA I TE FEAGAIGA FOU SE KAU FAITAULAGA O TUPU

11. Ne mafai pefea o fai a Iesu mo fai te fakavae o se kau faitaulaga o tupu?

¹¹ I te 29 T.A., ne fai ei a Iesu te Nasaleta mo fai te Mesia. Kāti ko 30 ana tausaga i te taimi ne papatiso ei a ia. Ne fakaasi atu i ei me ko toka a ia o fai se mea fakapito telā ne manako a Ieova ke fai ne ia. Ne fakailoa mai ne Ieova penei: “Tenei eiloa taku Tama, ko taku fagasele.” Ne fakaeke ne Ieova a ia, e se ki te sinu, kae ki te agaga tapu. (Mataio 3:13-17; Galuega 10:38) A te fakaekega tenā, ne fakasopo ei a Iesu mo fai te Faitaulaga Sili mo te Tupu i aso mai mua mō tino katoa kolā e tali‵tonu ki a ia. (Epelu 1:8, 9; 5:5, 6) Ko mafai foki i ei o fai a nisi tino mo fai ne vaega ‵tonu o se kau faitaulaga o tupu.

12. Se a te mea ne mafai o fai ne te taulaga a Iesu?

¹² E pelā me ko te Faitaulaga Sili, se a la te taulaga telā ka ofo atu ne Iesu ke mafai ei o fakamagalo katoatoa a agasala a tino tali‵tonu? E fakaasi mai i ana pati ne fai i te taimi ne kamata ei ne ia te Fakamanatuga o tena mate, ke malamalama tatou me i te taulaga telā ka ofo atu ne ia ko tena ola ‵lei katoatoa faka-te-foitino. (Faitau te Epelu 9:11, 12.) I te otiga ne fakaeke a Iesu mo fai te Faitaulaga Sili, ne talia ei ne ia ke tofotofo kae ke maua foki ne ia a akoakoga ke oko eiloa ki tena mate. (Epelu 4:15; 5:7-10) Ne toe fakatu aka a ia mai tua o tena mate, fanatu ki te lagi, kae ofo atu te tulaga aoga o tena taulaga ki a Ieova. (Epelu 9:24) Mai te taimi tenā o fano ki mua, ne mafai ei ne Iesu o “fautua” ki a Ieova mō latou kolā e fakatuanaki ki tena taulaga. Ko mafai o fesoasoani atu a ia ki a latou ke tavini ki te Atua mo te fakamoemoega ke maua ne latou te ola se-gata-mai. (Epelu 7:25) Ne fakamau‵tu foki ne tena taulaga a te feagaiga fou mai lalo o te tulafono.​—Epelu 8:6; 9:15.

13. Ne a mea ka maua ne tino kolā e aofia i te feagaiga fou?

¹³ A tino kolā e aofia i te feagaiga fou e ‵tau foki o fakaekegina ki te agaga tapu. (2 Kolinito 1:21) Ne aofia i ei a tino Iutaia fakamaoni kae fakamuli ifo ko tino mai fenua fakaa‵tea. (Efeso 3:5, 6) Ne a la mea ka maua ne tino kolā e aofia i te feagaiga fou? Ka fakamagalogina katoatoa olotou agasala. Ne folafola mai a Ieova penei: “Ka fakamagalo ne au olotou agasala, kae se toe manatua olotou mea ‵se ne fai.” (Ielemia 31:34) Ona ko te mea ko oti ne ‵solo keatea olotou agasala mai lalo i te tulafono, ko mafai ei o fai latou mo fai se ‘malo o faitaulaga.’ Ne tusi atu a Petelu ki Kelisiano fakaekegina penei: “Kae ko koutou ‘se matakāiga ne filifiligina, ne faitaulaga kolā ka fai mo tupu, se fenua tapu, ne tino fakapito o te Atua, ke folafola atu ne koutou ki fenua katoa a galuega fakaofoofogia a te tino telā ne kalaga ne ia koutou mai te pouliga ki tena mainaga fakaofoofogia.” (1 Petelu 2:9) Ne siki mai ne Petelu i konei a pati a Ieova ki tino Isalaelu i te taimi ne tuku atu ei te Tulafono kae ne fakaaoga ne ia ki Kelisiano i te feagaiga fou.​—Esoto 19:5, 6.

KA AUMAI NE TE KAU FAITAULAGA O TUPU A MEA AOGA KI TINO KATOA

14. Ka tavini atu i fea a te kau faitaulaga o tupu?

¹⁴ Ka tavini atu i fea a latou kolā e aofia i te feagaiga fou? Ka tavini atu latou i te lalolagi, ko te koga telā e tavini atu ei latou e pelā me se potukau o faitaulaga, o sui ne latou a Ieova mai te folafolaatuga o ana “galuega fakaofoofogia” mo te tukuatuga o meakai faka-te-agaga. (Mataio 24:45; 1 Petelu 2:4, 5) Kafai ko toe faka‵tu aka latou mai te mate, ka tavini atu ei latou fakatasi mo Keliso i te lagi e pelā me ne tupu mo faitaulaga. (Luka 22:29; 1 Petelu 1:3-5; Fakaasiga 1:6) Ne lavea ne te apositolo ko Ioane i se fakaasiga se aofaki o tino faka-te-agaga e tokouke e ‵nofo i tafa o te nofoagaaliki o Ieova i te lagi. Ne usu atu ne latou “se pese fou” ki “te Tama Mamoe” penei: “Mai i tou toto ne ‵togi ei ne koe a tino mō te Atua mai i matakāiga katoa, ‵gana katoa, tino katoa, mo fenua katoa. Ne fai ne koe a latou mo fai se malo mo faitaulaga ki te ‵tou Atua, kae ka pule latou ki te lalolagi e pelā me ne tupu.” (Fakaasiga 5:8-10) I se fakaasiga fakamuli ifo, ne fai mai a Ioane e uiga ki pule konei: “Ka fai latou mo fai a faitaulaga a te  Atua mo Keliso, kae ka pule latou pelā me ne tupu fakatasi mo ia i te 1,000 tausaga.” (Fakaasiga 20:6) Ka ‵kau fakatasi a tupu konei mo Keliso i te kau faitaulaga o tupu kae ka maua ne tino katoa a mea aoga mai i ei.

15, 16. Ne a mea aoga ka aumai ne te kau faitaulaga o tupu ki tino katoa?

¹⁵ Ne a mea aoga ka aumai ne te toko 144,000 ki tino i te lalolagi? E fakaasi mai i te Fakaasiga e 21 i a latou e pelā me se fa‵kai e tu i te lagi, ko te Ielusalema Fou telā e fakaigoa ki “te avaga a te Tamā Mamoe.” (Fakaasiga 21:9) E fai mai te fuaiupu e 2 ki te 4, penei: “Ne matea atu ne au te fakai tapu, ko te Ielusalema Fou, e fanaifo mai te lagi mai te Atua kae ne fakatoka pelā me se tamafine telā ka fakaipoipo kae e teu fakagaligali mō tena avaga. I konā loa ne lagona ei ne au se leo lasi mai i te nofogaaliki e fai mai penei: ‘Kiloke! Ko ‵nofo nei mo tino te faleie o te Atua, kae ka ‵nofo fakatasi a ia mo latou, kae ka fai latou mo fai ana tino. Ka ‵nofo fakatasi eiloa te Atua mo latou. Kae ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.’” Ko tafaga te ‵gali o fakamanuiaga konā! Ka se toe ai ne loimata, se fanoanoa, se logo‵mae io me ne tino e ‵tagi kae fanoa‵noa me ko se toe ai se mate. A tino fakamaoni ka ‵tu i te tulaga ‵lei katoatoa, kae ka ‵lei katoatoa ei te lotou fesokotakiga mo te Atua.

¹⁶ I ana nisi fakamatalaga e uiga ki nisi fakamanuiaga kolā ka aumai ne te kau faitaulaga o tupu konei, e fai mai penei te Fakaasiga 22:1, 2: “Kae ne fakaasi mai ne ia ki a au te vaitafe o te vai o te ola, e malipolipo pelā me se kilasi, kae e ‵tafe mai i te nofogaaliki o te Atua mo te Tamā Mamoe i te kogaloto o tena auala lasi. Kae i feitu e lua o te vaitafe e isi ne lakau o te ola kolā e ‵fua mai i ei a fuataga e 12, kae e ‵fua mai olotou fuataga i masina takitasi. Kae ko lau o lakau konā e aoga mo faka‵lei a ma‵saki o atufenua.” E fakaasi mai i fakatokaga fakatusa konei, a te auala ka faka‵lei katoatoa aka ei a “atufenua” io me ko itukaigā tino o te lalolagi mai te tulaga se ‵lei katoatoa telā ne togi mai ne Atamu. E tonu eiloa, “ko palele atu a mea mua.”

KO FAKAOTI NE TE KAU FAITAULAGA O TUPU TE LOTOU GALUEGA

17. Se a te mea ka fakataunu ne te kau faitaulaga o tupu i te fakaotiga o te 1,000 tausaga?

¹⁷ I te fakaotiga o te 1,000 tausaga o te lotou taviniga aoga a ko oti ne avaka ne te kau faitaulaga o tupu tenei a tino i te lalolagi ke ‵tu i te tulaga ‵lei katoatoa. Ka tuku atu ei ne te Faitaulaga Sili mo te Tupu, ko Keliso, a tino ‵lei katoatoa ki a Ieova. (Faitau te 1 Kolinito 15:22-26.) Ko fakataunu katoatoa ei i konā a galuega a te kau faitaulaga o tupu.

18. Kafai ko oti ne fakataunu ne te kau faitaulaga o tupu te lotou galuega, ka fakaaoga pefea ne Ieova a taugasoa o Keliso?

¹⁸ Ne a mea ka fai ne Ieova ki te kau faitaulaga o tupu mai tua ifo i ei? E fai mai te Fakaasiga 22:5, “Ka tavini atu latou e pelā me ne tupu ki te se-gata-mai, ki te se-gata-mai eiloa.” Ko oi a tino ka pule atu latou ki ei? E seai ne pati i te Tusi Tapu e uiga ki ei. Kae ka tumau eiloa te lotou aoga malosi ki a Ieova. Ka maua ne latou te ola telā e se mafai o mate, mo te iloa i te fesoasoani atu ki tino sē ‵lei katoatoa. Tela la, ka tumau eiloa te lotou fai mo fai ne tupu, kae ka fakaaoga latou ne Ieova i te fakataunuga o ana fuafuaga ki te se-gata-mai.

19. Se a te fakamasauaga ka maua ne tino kolā ka ‵kau atu ki te Fakamanatuga?

¹⁹ Ka ‵mau eiloa a akoakoga konei mai te Tusi Tapu i ‵tou mafaufau māfai ko fakamanatu ne tatou te Fakamanatuga o te mate o Iesu i te Aso Fa, po 5 o Apelila, 2012. Ka fakaaoga ne se tamā potukau o Kelisiano fakaekegina a mea fakatusa, ko te falaoa se faka‵fete mo te uaina ‵kula, ke fakaasi mai i ei me e aofia latou i te feagaiga fou. Ka fakamasaua atu a mea fakatusa konei o te taulaga a Keliso ke matea ne latou te lasi o te lotou tauliaga mo te ‵mafa o te lotou tiute i fuafuaga se-gata-mai a te Atua. Ke na ‵kau atu tatou katoa mo te loto fakafetai lasi ki fakatokaga a Ieova te Atua mō se kau faitaulaga o tupu kolā ka aoga ki tino katoa.

 [Fesili mo te Sukesukega]

 [Ata i te itulau e 31]

Ka aumai ne te kau faitaulaga o tupu a mea aoga ki tino katoa ke oko ki te se-gata-mai