Se Fakaasiga ki a Ioane 19:1-21
19 Mai tua o te mea tenei ne lagona ne au se mea pelā me se leo maluga o se vaitino e tokouke i te lagi. Olotou muna: “‵Viki atu ki a Ioa!*+ I o te ‵tou Atua te fakaolataga mo te ‵malu mo te malosi,
2 me i ana fakamasinoga e ‵tonu kae amio‵tonu.+ Me ko oti ne fakaoko atu tena fakamasinoga ki te fafine talitāgata takutakua telā ne fakamasei ne ia te lalolagi ki ana amioga fakatauavaga sē ‵tau,* kae ne toe taui atu ne ia a toto o ana tavini kolā i lima o tou fafine.”+
3 Kae i konā loa ne toe fai atu latou i te lua o taimi: “‵Viki atu ki a Ioa!*+ Kae ko te au mai i tou fafine ne fanaka faeloa ki luga ki te se-gata-mai, se-gata-mai eiloa.”+
4 Kae ne faka‵siga ifo a toeaina e toko 24+ mo manu ola e fa+ kae tapuaki atu ki te Atua telā e sagasaga i te nofogaaliki olotou muna: “Amene! ‵Viki atu ki a Ioa!”*+
5 Ne oko mai foki se leo mai te nofogaaliki kae fai mai: “Ke ‵viki atu ki te ‵tou Atua, a koutou katoa ana pologa,+ kolā e ma‵taku ki a ia, ko tino ma‵lalo mo tino ma‵luga.”+
6 Kae ne lagona ne au se mea pelā me se leo o se vaitino e tokouke kae e pelā mo te ‵gulu mai o vai e uke kae e pelā mo te pa‵pa ma‵losi mai o fa‵tili. Olotou muna: “‵Viki atu ki a Ioa,*+ me i a Ieova* te ‵tou Atua Malosi Katoatoa,+ ko oti ne kamata o pule mai e pelā me ko te tupu!+
7 Ke na fia‵fia tatou kae ke fia‵fia malosi kae tuku atu te ‵malu ki a ia, me ko oko mai te taimi o te fakaipoipoga a te Tamā Mamoe kae ko oti ne fakatoka faka‵lei ne tena avaga a ia eiloa.
8 Ao, ko oti ne talia ke pei tou fafine ki laugatu lino malapu‵lapu, e ‵ma, kae ‵lei—me i te laugatu lino ‵lei e fakauiga ki galuega amio‵tonu a tino tapu.”+
9 Kae ne fai mai a ia ki a au, “Tusi ki lalo a pati konei: E fia‵fia a latou kolā e ‵kami ki te ‵kaiga o te fakaipoipoga a te Tamā Mamoe i te afiafi.”+ Ne fai mai foki a ia ki a au: “Konei a pati ‵tonu a te Atua.”
10 I konā, ne fakasiga ifo ei au i mua o ana vae o tapuaki atu ki a ia. Kae ne fai mai a ia ki a au: “Fakaeteete! Sa fai te mea tenā!+ Au se taina pologa fua o koe mo ou taina kolā e ga‵lue o molimau atu e uiga ki a Iesu.+ Tapuaki ki te Atua!+ Me i te molimau e uiga ki a Iesu ko te mea telā e fakaosofia i ei te faiga o valoaga.”+
11 Ne matea ne au te lagi e matala, kae kiloke! se solofanua ‵kena.+ Kae ko te tino telā e sagasaga i ei e fakaigoa ki a Fakamaoni+ kae Tonu,+ ko ia telā e fakamasino kae e taua atu i te amiotonu.+
12 Ana mata e ‵ka pelā me ne ulaga o te afi,+ kae e uke a foualiki i tena ulu. E isi sena igoa tusia telā e se iloa ne se tino kae na ko ia fua,
13 kae ne pei a ia ki te gatu e pisipisia* i toto, kae e fakaigoa a ia ko Te Muna+ a te Atua.
14 Ne tau‵tali atu foki i a ia a kautau o te lagi i luga i solofanua ‵kena, kae ne ‵pei latou ki laugatu lino ‵kena, e ‵ma kae ‵lei.
15 Kae e sae mai i tena gutu se pelu mata ‵kai kae loa+ telā ka katikati ne ia ki ei a atufenua, kae ka takitaki ne ia a latou ki te tokotoko fiti.+ E se gata i ei, ka lakalaka ne ia te mea ‵tau uaina o te kaitaua lasi o te Atua Malosi Katoatoa.+
16 I luga i tena gatu, ao, i luga i tena kauaga, e tusi i ei se igoa, te Tupu o tupu mo te Aliki o aliki.+
17 Ne matea foki ne au se agelu e tu i te la, kae ne kalaga mai a ia i se leo maluga kae fai atu ki manu eva katoa kolā e eva i luga i te lagi:* “O‵mai ki konei, maopoopo fakatasi ki te ‵kaiga lasi a te Atua i te afiafi,+
18 ko te mea ke ‵kai koutou ki ‵kano o tupu mo ‵kano o takitaki kautau mo ‵kano o tāgata ‵mafi+ mo ‵kano o solofanua mo latou kolā e saga‵saga i luga i ei,+ mo ‵kano o tino katoa, ko tino saoloto e penā foki mo pologa mo tino ma‵lalo mo tino ma‵luga.”
19 Kae ne matea ne au te manu fekai mo tupu o te lalolagi mo olotou kautau e maopoopo fakatasi o taua atu ki te tino telā e sagasaga i luga i te solofanua mo tena kautau.+
20 Kae ne ‵po aka te manu fekai, kae fakatasi atu ki ei ko te pelofeta loi+ telā ne fai ne ia a fakailoga i mua o te manu tenā kolā ne takitaki ‵se ne ia a latou kolā ne maua ne latou te fakailoga o te manu fekai+ mo latou kolā e tapuaki ki tena fakatusa.+ I te taimi koi ola i ei, ne ‵pei atu lāua ki loto i te lase ‵ka ulaula telā e faka‵ka ki te pauta ‵ka.+
21 Kae ne tamate a nisi tino kolā e ‵toe mai ki te pelu loa telā ne sae mai i te gutu o te tino telā e sagasaga i luga i te solofanua.+ Kae ne ma‵kona ‵lei eiloa a manu eva katoa i ‵kano o latou konā.+
Fakamatalaga mai lalo
^ Io me “Aleluia!” A “Ioa” ko te fakatoetoega o te igoa o Ieova.
^ Io me “Aleluia!” A “Ioa” ko te fakatoetoega o te igoa o Ieova.
^ Io me “Aleluia!” A “Ioa” ko te fakatoetoega o te igoa o Ieova.
^ Io me “Aleluia!” A “Ioa” ko te fakatoetoega o te igoa o Ieova.
^ Io me kāti, “fakamatulutulu.”
^ Io me “i te ea; i luga.”
