Kasi imwe mungachita wuli para vyakulondezgapo ivi vyamuchitikirani?

1.   Msambizgi winu wamukalipirani chifukwa cha mphuvya zinu mu kilasi.

    Kasi mukwenera kuphepiska kwa msambizgi winu, nanga vingaŵa kuti imwe mukuwona nga kuti wavitolera waka panyake?

2.   Mubwezi winu wamanya kuti mukamunenanga.

    Kasi mukwenera kuphepiska kwa mubwezi winu nanga vingaŵa kuti imwe mukuwona kuti ivyo mukayowoya vikaŵa vyaunenesko?

3.   Mwakwiyira adada ŵinu ndipo mwayamba kugazgana nawo.

    Kasi mukwenera kuphepiska kwa adada ŵinu, nanga vingaŵa kuti mukuwona kuti ndiwo ŵangumuyambani?

 Zgoro la mafumbo ghose ghatatu ndakuti enya. Kweni chifukwa wuli mukwenera kuyowoya kuti “Phepani,” nanga vingaŵa kuti mukuwona kuti palije icho imwe mwabuda?

•  Chifukwa wuli mukwenera kuphepiska?

•  Kasi mungaphepiska wuli?

•  Ivyo ŵanyinu ŵakuyowoya

•   Para mwaphepiska mukulongora kuti ndimwe munthu wakukhwima. Para mukuzomera ivyo mukayowoya panji kuchita, vikulongora kuti mwamba kuŵa na makhaliro ghakuzirwa agho ghazamumovwirani paulara.

   “Para wamunthu ndiwe wakujiyuyura na wakuzikira ukuphepiska waka, ndipo ukutegherezga ivyo munyako wakuyowoya.”—Rachel.

•   Para tikuphepiska tikuwezgerapo mtende na ŵanyithu. Ŵanthu awo ŵakuyowoya kuti “phepani” ŵakulongora kuti mbakukhumbisiska kuŵaso pamtende na ŵanyawo m’malo mwa kuyezga kulongora kuti iwo ndiwo ŵakaneneskanga munyawo ndiyo wakabuda.

   “Nanga vingaŵa kuti mukuwona kuti palije icho mwabuda, kweni kuwezgerapo mtende ndicho chikwenera kuŵa chakuzirwa chomene. Ntchipusu waka kuyowoya kuti “phepani,” kweni kungawovwira kuti mwambeso kutemwana na munyinu.”—Miriam.

•   Para taphepiska tikujipulika makora. Chitima icho mungaŵa nacho para mwakhuŵazga munyinu chifukwa cha ivyo mwayowoya panji kuchita, chikuŵa nga ni katundu muzito chomene. Kweni para mwaphepiska, mukuŵa nga mwathura katundu uyu. a

   “Nyengo zinyake nkhayowoyanga waka chilichose icho chiza mu mutu kwa adada na amama. Pamanyuma nkhajisuskanga, kweni vikanisuzganga kuphepiska. Kweni usange naphepiska, nyengo zose nkhajipulikanga makora chifukwa vikawovwiranga kuti pa nyumba yithu paŵeso mtende.”—Nia.

 Kasi pakukhumbikwa kuŵikapo mtima kuti tiphepiskenge? Enya! Dena msungwana wa vyaka 26, uyo wakaphepiskapo kanandi waka chifukwa cha kuchitira nkhwesa amama ŵake wakuti: “Ntchipusu yayi kuyowoya kuti ‘phepani.’ Vikuŵa nga kuti chinthu chanijara pa singo ndipo mazgu ghakutondeka kufuma.

•   Para vingachitika phepiskani maso na maso. Usange mukuphepiska maso na maso vikovwira munyinu yura kuwona kuti ivyo mukuyowoya vikufuma nadi mu mtima winu. Kweni usange mungalemba waka meseji yakuphepiska pa foni, nyengo zinyake uyo mukumuphepiska wangagomezga yayi. Nanga mungatumizgira lumoza na kachithuzi kakulongora kuti muli na chitima, kweni wangagomezga yayi kuti mwaphepiska nadi kufuma mu mtima.

   Fundo yakovwira: Para vingachitika yayi kuphepiska maso na maso, mungayimba foni panji kulemba waka kadi. Mulimose umo vingaŵira mukwenera kusankha makora mazgu ghinu.

   Fundo ya mu Baibolo: “Mtima wa murunji ukughanaghanira dankha pambere undazgore.”—Zintharika 15:28.

•   Phepiskani mwaluŵiro. Para mukuchedwa kumazga nkhani, suzgo lingakura ndipo vinthu vingaŵa makora yayi pakati pa imwe na uyo mukamukhuŵazga.

   Fundo yakovwira: Muŵe na chilato, mwachiyelezgero, mungalemba kuti ‘mwahuno niphepiskenge.’ Sangani nyengo iyo mukuwona kuti mungakaphepiska ndipo phepiskani nadi.

   Fundo ya mu Baibolo: “Phemana luŵiro.”—Mateyu 5:25.

•   Phepiskani na mtima wose. Kuyowoya kuti “phepani kuti mukujipulika nthena” nkhuphepiska kwanadi yayi! Msungwana munyake zina lake Janelle wakati: “Munthu uyo mukamubudira wangakhorwa pekha para mukuzomera na mtima wose kuti mukabuda nadi.”

   Fundo yakovwira: Phepiskani kwambura kusanga pakugwenthera. Lekani kuyowoya kuti, “Niphepiskenge pekha para nawe waniphepiska pa ivyo wanibudira.”

   Fundo ya mu Baibolo: “Ipo tiyeni tilondezge vinthu vyakovwira kuti paŵe mtende.”—Ŵaroma 14:19.