Rosie i tok: “Mi save wari long kain kain samting na tingim olsem ol i bikpela hevi, tasol tru tru i no olsem.” Wanem ol ves bilong Baibel i helpim em? Wanpela ves em Matyu 6:34: “No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.” Rosie i tok dispela tok bilong Jisas i helpim em long lusim pasin bilong wari long ol samting inap kamap long neks de. Em i tok: “Mi gat ol hevi, olsem na i no gat wok long wari nating long ol samting i no kamap yet na ating ol i no inap kamap.”

Yasmine tu i pilim olsem em i save wari tumas. Em i tok: “Long olgeta wik, mi save krai inap sampela de, na sampela taim mi hatwok long slip. Mi save holim tingting kranki na dispela i pinisim strong bilong mi.” Wanem skripsa i helpim em? 1 Pita 5:7 i helpim em: “God i save wari long yupela, olsem na yupela i mas putim olgeta hevi bilong yupela long han bilong em.” Yasmine i tok: “Mi beten oltaim long Jehova, na em i bekim beten bilong mi. Mi pilim olsem bikpela hevi i no stap moa long solda bilong mi. Sampela taim mi save kisim gen ol tingting kranki, tasol nau mi save long rot bilong daunim dispela hevi.”

Yangpela meri Isabella i tok: “Mi ting pasin bilong surikim taim em pasin i stap long blut bikos papa bilong mi i gat dispela pasin. Mi save surikim taim bilong mekim ol bikpela samting na mi westim nating taim—mi save malolo tasol o lukim TV. Hevi inap kamap bikos dispela pasin inap putim presa long man na man i no inap mekim gut wok.” Isabella i kisim helpim long tok bilong 2 Timoti 2:15: “Wok strong tru long kamap olsem wanpela gutpela man long ai bilong God, wanpela wokman husat i no sem long wok em i mekim pinis.” Em i tok: “Mi no laik bai Jehova i sem long wok bilong mi bikos mi surikim taim bilong mekim wok.” Olsem na Isabella i senisim pasin.

Wanpela sista, Kelsey, i tok: “Taim mi gat wok bilong mekim, mi save surikim taim na mekim las minit wok. Mi save krai na hatwok long slip, na tingting planti. Dispela pasin i putim hevi long mi.” Kelsey i kisim helpim long tok bilong Sindaun 13:16: “Olgeta man i gat gutpela tingting, ol i save tingting gut pastaim na mekim samting. Tasol ol man i no gat gutpela tingting, ol i save kamapim ples klia longlong pasin bilong ol yet.” Em i tingim tingim dispela skripsa na em i kisim stretpela tingting. Em i tok: “I gutpela long plenim gut ol samting yu laik mekim. Nau mi gat notbuk bilong mekim sediul, na mi inap mekim gut ol wok na mi no wet inap las minit.”

Kirsten i tok: “Man bilong mi i lusim mi wantaim 4-pela liklik pikinini.” Wanem tok bilong Baibel i helpim em? Sindaun 17:17 i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” Kirsten i pas gut wantaim ol narapela husat i lotuim Jehova. Wanem samting i kamap? Em i tok: “Ol pren i helpim mi long kain kain rot! Sampela i save baim ol kaikai na plaua na lusim ausait long haus. Tripela taim sampela pren i helpim mi na ol pikinini long muv long wanpela haus i go long narapela haus. Wanpela pren i helpim mi long painim wok mani. Oltaim ol pren i redi long helpim mi.”

Delphine em yumi stori long em long pastaim, em tu i hatwok long karim hevi bilong i stap wanpis. Em i tok: “Mi pilim olsem mi stap ausait long wanpela stua na lukluk i go insait na lukim olgeta manmeri i amamas long laip bilong ol. Mi pilim olsem mi stap wanpis tru.” Em i kisim helpim long Song 68:6: “[God] i save givim haus long ol man na meri i stap wanpis na bai ol i sindaun gut long en.” Delphine i tok: “Mi save olsem dispela tok i no makim tasol haus tru long nau. Mi luksave olsem God i redim ol samting i stap olsem haus we i strongim na lukautim yumi long sait bilong bilip, na yumi inap kisim ol gutpela pren na pas gut wantaim ol narapela husat i laikim Jehova. Mi save olsem mi mas pas gut wantaim Jehova na dispela bai helpim mi long pas gut wantaim ol narapela. Song 37:4 i helpim mi: ‘Yu mas amamas long Bikpela, na em bai i givim yu ol samting yu laikim tru.’”

Delphine i tok: “Mi luksave olsem mi mas strongim pasin bilong mi long pas gut wantaim Jehova. Em i nambawan gutpela Pren i winim tru olgeta narapela pren. Mi raitim lista bilong ol samting mi inap mekim wantaim ol narapela na bai mi inap kamap pren bilong ol manmeri husat i laikim Jehova. Mi lain long tingim ol gutpela pasin bilong ol narapela na mi no tingim ol popaia bilong ol.”

Em tru olsem ol pren husat i lotuim God, ol tu i gat sin. Ol Witnes Bilong Jehova i save karim ol wankain hevi olsem olgeta narapela manmeri. Tasol save bilong Baibel i kirapim ol manmeri long helpim ol narapela taim ol i gat rot long givim helpim. I gutpela long i gat ol kain pren olsem. Yu ting ol stiatok bilong Baibel inap helpim ol man long karim ol hevi em yumi no inap pinisim long nau, olsem bikpela sik na krai sori?