Leza Wakanduumbulizya Mumapenzi Aangu

Akaluulwa aba Victoria Colloy

Badokotela bakaambila baama kuti: “Kunyina cimbi ncotunga twacita kugwasya mwanaanu. Unoobelesya mandoombe mubuumi bwakwe boonse.” Ndakatyompwa! Alimwi ndakalibuzya kuti ‘Ino ncinzi ncondinoocita kuti kanditeendi?’

NDAKAZYALWA mu November 17, 1949, mudolopo lya Tapachula mucooko ca Chiapas, mucisi ca Mexico. Ndakali mwana uukkomene, uuli kabotu alimwi mutaanzi kuzyalwa mubana bone. Pele kandijisi myezi iili cisambomwe ndakatalika kukakilwa kukalaba. Nokwakainda myezi yobile ndakalekela limwi. Bamadokotela bakagambwa kapati nkaambo bana abamwi mudolopo lya Tapachula bakajisi zitondezyo zyabulwazi oobu. Aboobo, dokotela umwi wakaboola kuzwa ku Mexico City kuzotulanga-langa kujatikizya bulwazi oobu. Eelyo,twakajanwa abulwazi bwakulemana (polio).

Nindakali amyaka yotatwe, ndakaandulwa akasolo, agondo alimwi aango. Mpoonya alyalo gwezyo naa ikkuko lyakululyo tiilyakali kabotu. Nindakali amyaka iili cisambomwe, bakanditola ku dolopo lya Mexico City kuya kuzumanana kusilikwa kucibbadela cabana. Baama balo bakasyaala ampulazi yaku Chiapas mpobakali kubeleka, eelyo mebo ndakali kukkala abaneene mucisi ca Mexico City. Pele bunji bwaziindi ndakali mucibbadela.

Nindakali amyaka iili lusele, ndakatalika kusola kweenda asyoonto-syoonto. Pele bulwazi bwakaindila cakuti ndakatalika kukakilwa alimwi kweenda. Bamadokotela bakaamba kuti ndeelede kunoobelesya mandoombe mubuumi bwangu boonse.

Nondakajisi myaka iili 15, ndakalaandudwe kale ziindi zili 25. Ndakaandulwa amoongola, akuulu, agondo, ango, aatulolomwi. Ndamana kwaandulwa akumwi, ndakali kuyiisyigwa alimwi kucita zyintu. Cimwi ciindi nindakamana kwaandulwa, bakandibika Bbandeji naa cipulasita kumaulu. Nobakaigwisya Bbandeji ndakali kucita zyintu zigwasya koolola maulu nokuba kuti cakali kucisa kapati.

Luumbulizyo Lwini-lwini

Nondakali amyaka iili 11, Baama bakaboola kuzyootuswaya azyalo zilonda zyakwaandulwa zyakali kuyaabupona. Bakaliyiide kuti Jesu wakaponya baciswa alimwi akupa muntu wakayuminide mubili kuti aende. Eelyo, bakandipa magazini ya Ngazi Yamulindizi yakamwaigwa a Bakamboni ba Jehova, mobakabala makani aaya. Magazini eeyi ndakali kwiisisa kunsi acilitulisyo cangu, pesi bumwi buzuba ndakajana taiko. Anu bamanesi bakaibona akwiibweza. Alimwi  bakandifwubaazya akaambo kakubala magazini eeyi.

Nokwakainda mwaka omwe, baama alimwi bakaboola kuzoondibona kuzwa ku Chiapas. Kuciindi eeco, bakali kwiiya Bbaibbele a Bakamboni ba Jehova. Bakandiletela abbuku lyakuti From Paradise Lost to Paradise Regained. * Mpoonya bakandaambila kuti: “Kuti koyanda kuyookkala munyika mpya iisyomezyedwe mwalo Jesu mwayooponya baciswa, weelede kwiiya Bbaibbele.” Nokuba kuti baneene bakali kukazya, ndakatalika kwiiya Bbaibbele a Bakamboni kandijisi myaka iili 14. Mwaka wakatobela ndakeelede kuzwa mucibbadela nkaambo kakuti cakali cabana buyo.

Ikuliyumya Mumapenzi

Ndakatyompwa kapati. Akaambo kakukazyigwa abaneene, cakapa kuti ndijokele ku Chiapas kuyookkala abazyali bangu. Nokuba boobo, akwalo kuŋanda kwakali buyumu-yumu nkaambo bataata bakali basibukoko. Kwaciindi cilimbocibede ndakalimvwa kuti kunyina ncondakali kuponena. Ndakayeeya kulijaya. Pesi kwiinda mukuzumanana kwiiya Bbaibbele, ndakacinca kuyeeya. Cisyomezyo camu Bbaibbele cijatikizya paradaiso aanyika cakandipa kukkomana kapati.

Ndakatalika kwaambila bamwi kujatikizya bulangizi bubotu kapati bujanika mu Bbaibbele. (Isaya 2:4; 9:6, 7; 11:6-9; Ciyubunuzyo 21:3, 4) Eelyo, mu May 8, 1968, kandijisi myaka iili 18, ndakabbapatizyigwa akuba Kamboni wa Jehova. Kuzwa 1974, ndilapa mawoola ainda ku 70 amweezi ngondibeleka kwiinda mukwaambila bamwi bulangizi bwakandigwasya kuti ndizumanane kupona.

Buumi Bulaampindu

Mukuya kwaciindi, mebo abaama twakalongela kudolopo lya Tijuana, kufwaafwi amunyinza wacisi ca Mexico a United states, alo mpotwakajana busena butweelede. Ndilakonzya kweendeenda alubuwa kandibelesya mandoombe alimwi ndilabelesya akacinga kabalema kutegwa ndicikonzye kujika, kuwasya alimwi akuccisa zisani zyangu. Ciindi nondiinka mumulimo wakukambauka, ndibelesya kootokala kamagesi.

Kunze lyakukambaukila buyo bantu mbondijana mumigwagwa amumaanda abo, ndilaswaya acibbadela cili munsi-munsi kuyoobandika zyamu Bbaibbele abaabo balindilila kusilikwa. Ndamanizya kubandika ambabo, ndilaunka akootokala kangu kumusika kuyooula ziyandika mpoonya akujoka kuŋanda kuyoogwasya baama kujika alimwi amilimo iimwi yaaŋanda

Kutegwa tujane mali aayandika, inga ndisambala salaula. Lino baama balaamyaka iili 78 alimwi bakacisidwe bulwazi bwamoyo ziindi zyotatwe aboobo tabakonzyi kubeleka milimo minji. Alimwi ndime ndilanganya nzyobayandika mbuli zyakulya nzyobeelede alimwi amisamu. Nokuba kuti tulaciswa-ciswa, tulasolekesya lyoonse kujanika kumiswangano yambungano. Bantu bainda 30 mbondakagwasilizya kwiiya Bbaibbele abalo sunu balatola lubazu mumulimo wakukambauka.

Ndili masimpe kuti cisyomezyo camu Bbaibbele ciyoozuzikizyigwa cakuti: “Cilema unooya busotauka mbuli insya.” Kwaciindi cino, ndilaumbulizyigwa amajwi a Leza aakuti: “Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya, ncobeni njookutabilila ajanza lyalulyo lyabululami bwangu.”—Isaya 35:6; 41:10. *

[Bupanduluzi buyungizidwe]

[Cifwanikiso icili apeeji 31]

Kubelesya mandoombe kandijisi myaka iili ciloba yakuzyalwa

[Cifwanikiso icili apeeji 32]

Ndibelesya kootokala kamagesi nonduunka mukukambauka