Kuli Bantu Mbomukonzya Kusyoma

Ba Santiago mbaanamutekenya bakkala kucisi ca Argentina. Muntu wakakkwelede mumootokala wabo naakaciluba cibbeke cakwe, cakutasowa ciindi ba Santiago bakamutolela cibbeeke mukamwini. Ncibakacita ba Santiago cilakonzya kubagambya bamwi akaambo kakuti mucibbeeke eeco mwakali mali aainda ku $32,000.

AMWEEZYEEZYE kuti mukkala munyika muli buyo bantu basyomeka. Elo kaka buumi inga bwabota kapati! Mulakonzya kumusiya mwana wanu muniini kuli sikumulela kakunyina akulibilika. Inga kamutayandiki kukkiya kumaanda aanu. Sena eeci inga cakonzyeka?

Bubotu Bwakusyomeka

Paulo, imwaapostolo Munakristo wakaamba kujatikizya nguwe a Banakristonyina kuti: “Tuyanda kuti katusyomeka muzyintu zyoonse.” (Bahebulayo 13:18) Eeci ncobasoleka kucita Bakamboni ba Jehova. Makanze aabo ngakupona kweelana abube bwaambidwe mu Bbaibbele kulugwalo lwa Isaya 33:15 kuti: “Oyo uuenda mubululami, uuamba zintu ziluleme, uusampaula impindu iizwa kukupenzya bantu, uukaka kutambula masinkamulomo.” Mbuti bamwi mbobasoleka kutobela malailile aaya?

● ‘Amwaambe zyintu ziluleme.’ Ba Domingo, Bakamboni ba Jehova babeleka mumuunda wamakunka kucisi ca Philippines. Baamba kuti: “Bantu banji tabasyomeki kuli basikubalemba mulimo. Mucikozyanyo, ikuti babwezelela zikunka, tabamwaambili masimpe sikubalemba mulimo bunji bwamasaka aazikunka. Kwiinda mukucita oobo, balakonzya kusisikizya masaka amwi akwaasambala.”

Ba Domingo amukwasyi wabo bakatiikatandwe mulimo akaambo kakuti bakali kubakakila kubeja basikubalemba mulimo nobakali kubaambila kuti babeje kujatikizya myeelwe yazyintu nzyobakali kusambala. Pele ba Domingo bakati: “Twakabaambila basikutulemba mulimo kuti tatuyandi kubeja nokuba kuti inga caamba kuti tutandwe mulimo. Mukuya kwaciindi, bakaamba kuti Bakamboni ba Jehova mbantu babotu mbotukonzya kusyoma, mpoonya bakatupa busena abumbi bwakulima.”

● Amukake “mpindu iizwa kukupenzya bantu.” Ba Pierre, bapati babasimitelo mucooko cimwi kucisi ca Cameroon bakalijisi zyoolwe zinji zyakujana mali munzila iitakatazi. Nobakapegwa mulimo wakuvwozya babelesi babeleka kwamyezi buyo misyoonto, bakabona bulubizyi bumwi. Ba Pierre bakati: “Mali akali kuvwozyegwa mumazyina aabantu bakalekede kubeleka naa ibakafwa. Muciindi cakuyeeya kuti ndaabelesye mali aaya, ndakaayobola akulemba mweelwe wamali aaya.”

 Ino ncinzi cakacitika? Ba Pierre baamba kuti: “Nokwakainda myaka yobilo, kwakasika basikulingula bweende bwamali. Ndakakkomana kapati mali oonse naakakkwana kweelana azyakalembedwe, alo aciindi eeci akalivwulide. Basikulingula bweende bwamali bakandilumbaizya akaambo kakusyomeka.”

● ‘Amukake kutambula cisinkamulomo.’ Mumulimo wabo wabu notary (muntu uujisi nguzu zyakubona kuti mapepa asainwa kabotu kweelana amulawo) kudolopo lya Rio de Janeiro, kucisi ca Brazil, ba Ricardo ziindi zinji bantu bakali kuyanda kubapa zisinkamulomo. Bakaamba kuti: “Buzuba bumwi sikwiiminina twaambo munkuta umwi wakasola kundipa cisinkamulomo. Kanditazyi wakanditumina muncini uubelesya ma CD kuŋanda. Kuciindi eeco, muncini uubelesya ma CD tiwakali kubonwa-bonwa alimwi wakali kujanwa buyo kubantu bavwubide.”

Ino ba Ricardo bakacita buti? Bakaamba kuti: “Mebo abakaintu bangu twakayeeya kuti tutacivwungununi cipego eeco. Mpoonya, ndakacipilusya kuofesi yakwe katayeeyeli, akucibikka atebulu. Eeci cakali ciindi cibotu cakumupandulwida kaambo ncondakacipilusyila. Mulembi  wakwe wakagambwa kapati akaambo kacintu ncondakacita eeci.”

Nokuba kuti Bakamboni ba Jehova tabali balikke basola kusyomeka, mbuli nkamu balaampuwo yakusyomeka. Aaka nkakaambo kakapa kuti kkampani imwi iipanga zisani yaku Poland kailemba buyo Bakamboni ba Jehova milimo. Mupati wakkampani wakati: “Kuli bantu basyomeka munyika, pele Bakamboni ba Jehova balijisi zyeelelo zibotu nzyobatobela lyoonse.”

Kusyomeka Nokuba Kuti Mbacete

Bantu banji bayeeya kuti kutasyomeka kuli buyo kabotu kubacete. Mucikozyanyo, lipooti imwi yaba CNN yakaamba musankwa umwi uuli amyaka iili 14 waku Nigeria iwakali kupona kwiinda mukubbida bantu aa Intaneti. Kapa twaambo twakulilekelela wakati: “Ino muyeeya kuti ndicite buti? Ndime ndisanina mukwasyi—mucizyi wangu, bamaama abataata. Muntu weelede kupona.”

Nokuba kuti Bbaibbele talisyomezyi buvwubi kubantu basyomeka, libasyomezya kuti bayoojana ziyandika zyamubuumi. Lugwalo lwa Isaya 33:16 lwaamba kuti: “Cilyo cakwe uyoocipegwa, amaanzi aakwe akunywa taakooyoobulika.”

Nokuba boobo, bamwi inga babuzya kuti: ‘Mbuti kusyomeka mbokukonzya kubagwasya aabo bali mubukkale bukatazya? Mbuti kujatikizya baabo bapenga kujana cakulya?’

Amubone mbobakacita ba Berthe, bamukamufwu baku Cameroon ibasambala mwanja. Bakaamba kuti: “Tulasambala tubeela-beela twamwanja tuli 20 mukapepa komwe. Bantu banji babikka buyo tuli 17 naa 18 mutupepa, pele mebo nsiyandi kujana mpindu kwiinda mukucenga bantu.”

 Sena makwebo aaba Berthe alazwidilila? Talili lyoonse pe. Baamba kuti: “Ziindi zinji ndilakkala buzuba boonse kanditasambali. Pele nondiyanda kukweleta cakulya, balandipa nkaambo balizyi kuti ndiyoobbadela ndaakujana mali. Balandisyoma nkaambo kakuti ndilasyomeka lyoonse.”

Leza Iweelela Kusyomwa

Ilusyomo lwesu lulakomena ciindi twabona muntu kacita zyintu kweelana amajwi aakwe. Joshua, musololi wabana Israyeli wakaamba kujatizya Leza kuti: “Taakwe cintu niciba comwe catakacitika akati kazintu zibotu zyoonse Jehova nzyaakaamb[a] . . . Zyoonse buyo zyakacitika.” (Joshua 21:45) Sena andiswe tulijisi twaambo tubotu tutupa kumusyoma Leza?

Zyintu nzyasyomezya Leza nzyamasimpe cakuti ulazikozyanisya kumvwula. (Isaya 55:10, 11) Sena kuli cintu cikonzya kulesya mvwula kuwa, kubombya nyika akupa kuti zisyango zikomene? Taakwe. Mbubwenya buyo, kunyina cikonzya kulesya zisyomezyo zya Leza kuti zizuzikizigwe.

Comwe cazisyomezyo eezyo cililembedwe kuli 2 Petulo 3:13 kuti: “Kuli majulu mapya anyika mpya nzyotulindila swebo kweelana acisyomezyo cakwe, alimwi muli zyeezyi muyooba bululami.” Leza ukanza kugwisya bantu boonse badyaaminina bantunyina anyika. Sena mulayanda kuzyiba zinji kujatikizya Leza mbwayoozuzikizya makanze aakwe? Amubonane a Bakamboni ba Jehova bakubusena nkomukkala naa kubalembela kwiinda mukubelesya kkeyala iili apeeji 5 mumagazini eeyi.

[Kabbokesi kali apeeji 8]

BUBOTU BWAKUSYOMEKA

Ba Lucio, Bakamboni ba Jehova baku Philippines bakasunkwa kutasyomeka. Buzuba bumwi bakajana mali aasika ku $27,500 mukkabati lyakaindi lyamuofesi ndyobakaambilwa kuti basalazye. Ofesi eeyi—amali—zyakali zyabapati bamulimo ibakaunkide kumakwebo. Ba Lucio baamba kuti: “Cakali ciindi cakusaanguna ikubona mali aamadola.”

Nibakapiluka bapati bamulimo, ba Lucio bakabapa mali aaya. Ino ncinzi cakacitika? Ba Lucio baamba kuti: “Ndakapegwa mikuli minji. Alimwi ndakapegwa aŋanda yakukkala amukwasyi wangu. Nokuba kuti buumi ku Philippines mbuyumu, ndilasyoma kuti Jehova Leza ulatulanganya akaambo kakutobela milawo yakwe.”

[Kabbokesi/Cifwanikiso icili apeeji 9]

ZIPIMYO ZISYOMEKA

Cintoolo caba Moïse cilizyibidwe kapati mumusika umwi waku Douala mucisi ca Cameroon, mwalo mobasambalila nswi. Baamba kuti: “Cintoolo cangu ndiciita kuti Zipimyo akaambo kakuti zipimyo nzyondibelesya ziliindene azyabasambazi bambi mumusika ooyu akaambo kakuti tiindakazicinca kuti kazitondezya myeelwe iitaluzi. Ndilizyi kuti bantu balandisunka lyoonse. Ikuti naa bayanda kkilo yomwe yanswi, ndilabapa. Bamana, balaunka kumusambazi umwi akuyooipimya alimwi. Bacita oobo balajana kuti ilaindilila akkilo yomwe. Mpoonya balazyiba kuti tiindabacenga pe. Banji balandaambila kuti, ‘Tulayanda kuula kuli ndinywe akaambo kakuti mulasyomeka.’”

[Cifwanikiso icili apeeji 7]

“Twakabaambila basikutulemba mulimo kuti tatuyandi kubeja nokuba kuti inga caamba kuti tutandwe mulimo.”—Ba Domingo, baku Philippines.

[Cifwanikiso icili apeeji 7]

“Basikulingula bweende bwamali bakandilumbaizya akaambo kakusyomeka.”—Ba Pierre, baku Cameroon.

[Cifwanikiso icili apeeji 7]

“Sikwiiminina twaambo munkuta umwi wakasola kundipa cisinkamulomo. . . . Mebo abakaintu bangu twakayeeya kuti tutacivwungununi cipego eeco.”—Ba Ricardo, baku Brazil.

[Cifwanikiso icili apeeji 7]

Ba Berthe ziindi zinji balakkala buzuba boonse kabatasambali. Pele basambazi bazyakulya balabakolotya cakulya nkaambo balizyi kuti bayoobbadela baakujana mali.