“Miaka michache iliyopita kupata machapisho katika mfumo wa kielektroni, ingekuwa vigumu hata kuwazia.” Je, unakubaliana na maneno hayo? Yalikuwa sehemu ya hotuba yenye kutia moyo iliyotolewa na Geoffrey Jackson katika Ripoti ya 6 ya Baraza Linaloongoza ya 2020. Aliendelea kusema hivi: “Lakini sasa huenda unajiuliza mambo yangekuwaje wakati huu wa Corona bila kuwa na JW Library. Yehova amekuwa akituandaa kwa miaka mingi ili tuwe tayari kwa ajili ya jambo kama hili.”

 Yehova amekuwa akitutayarishaje? Ni nini kinachohusika katika kutayarisha programu ya JW Library, na ni nini kinachohitajika ili kuidumisha na kuiboresha?

 Mei 2013, Baraza Linaloongoza liliiomba Idara ya MEPS Programming iliyo kwenye makao makuu ya ulimwenguni pote, itokeze programu iliyo na toleo lililorekebishwa la Tafsiri ya Ulimwengu Mpya. Paul Willies, anayefanya kazi na Idara ya MEPS Programming alisema hivi: “Kufikia wakati huo hatukuwa tumewahi kutokeza programu yoyote ya simu. Lakini tulikusanya jopo la wafanyakazi, tukasitisha miradi fulani kwa muda, na tukashirikiana na idara nyingine ili kubuni na kutayarisha programu hiyo. Tulisali mara nyingi sana, na kwa msaada wa Yehova programu hiyo ilitolewa kwenye mkutano wa kila mwaka uliofanywa miezi mitano tu baadaye!”

 Changamoto iliyofuata ilikuwa kuifanya programu hiyo kuwa maktaba halisi iliyo na machapisho mengi zaidi na katika lugha nyingi zaidi. Kufikia Januari 2015, machapisho mengi ya sasa ya Kiingereza yalipatikana katika programu hiyo, na miezi sita baadaye, watumiaji wangeweza kupakua machapisho hayo katika mamia ya lugha nyingine.

 Tangu wakati huo, ndugu zetu wameboresha programu hiyo katika njia kadhaa, wakaongeza video, wakakusanya machapisho, picha, na video zitakazotumiwa mikutanoni kwenye tabo moja, na kuwawezesha watumiaji kupata marejeo ya Mwongozo wa Utafiti moja kwa moja kutoka kwenye mstari wa Biblia.

 Kila siku JW Library hufunguliwa katika vifaa milioni 8 na kila mwezi inafunguliwa katika zaidi ya vifaa milioni 15! Ni nini kinachohitajika ili kuhakikisha programu hiyo inafanya kazi vizuri katika vifaa vyote hivyo? Ndugu Willies anaeleza hivi: “Hakuna wakati ambapo programu ya simu inaweza kusemwa kuwa imekamilika. Kila wakati tunafanya kazi ili kuongeza sehemu mpya na kuifanya iwe rahisi zaidi kutumiwa. Kwa kuwa mifumo ya uendeshaji ya vifaa vya kielektroni huboreshwa mara nyingi, lazima tubadili programu hiyo mara kwa mara ili ipatane na mifumo hiyo. Pia, lazima tudumishe na kuboresha programu zinazoendesha JW Library kadiri machapisho na rekodi zinavyoendelea kuongezeka katika programu hiyo.” Tukihesabu matoleo ya lugha zote, kufikia sasa kuna machapisho 200,000 hivi na zaidi ya rekodi 600,000 za sauti na video kwenye JW Library!

 Ili kuiwezesha programu hiyo iendelee kufanya kazi, mambo mengi yanahitajika mbali tu na vifaa vya kompyuta. Leseni kadhaa zinahitaji kununuliwa kwa ajili ya programu za kompyuta. Leseni moja tu inagharimu dola 1,500 (za Marekani) kwa mwaka. Mbali na hilo, Idara ya MEPS Programming inatumia dola 10,000 hivi (za Marekani) kila mwaka ili kununua vifaa kutoka kwenye kampuni zinazozitokeza ili kuhakikisha programu hiyo inaendelea kufanya kazi vizuri katika kompyuta, tablet, na simu mpya.

 JW Library imesaidia sana kuokoa pesa zinazotumiwa kuchapisha, kujalidi, na kusafirisha machapisho. Kwa mfano, fikiria kijitabu Kuyachunguza Maandiko Kila Siku. Tulichapisha nakala milioni 12 hivi za Kuyachunguza Maandiko—2013. Lakini tulichapisha vijitabu milioni tano tu kwa ajili ya toleo la 2020—hata ingawa idadi ya wahubiri ulimwenguni pote ilikuwa imeongezeka kwa 700,000. Kwa nini kulikuwa na badiliko hilo? Sasa ndugu na dada zetu wengi wanasoma andiko la siku kwenye JW Library. a

 JW Library inawasaidia watumiaji wake kwa njia nyingi sana. Geneviève, anayeishi nchini Kanada, anahisi kwamba programu hiyo imemsaidia kujifunza kwa ukawaida. Anasema hivi: “Kusema kweli, ikiwa ningehitaji kukusanya vitabu ninavyohitaji ili kujifunza, sidhani ningeweza kujifunza kila asubuhi. Lakini kwa sababu ya programu hiyo, ninachukua tu tablet yangu na ninapata kila kitu ninachohitaji. Funzo hilo la kawaida limeimarisha imani yangu na kuboresha hali yangu ya kiroho.”

 Programu hiyo imekuwa yenye faida sana wakati wa janga la COVID-19. Charlyn, nchini Marekani, anasema hivi: “Kwa sababu ya ugonjwa wa COVID-19, kwa zaidi ya mwaka mzima sijapata chapisho lolote kati ya yaliyotolewa hivi karibuni. Lakini JW Library imeendelea kutulisha kiroho, na ninamshukuru Yehova kwa uandalizi huo wenye upendo.”

 Watu wengi wanahisi kama Faye, anayeishi nchini Filipino. Alisema hivi: “Maisha na ratiba yangu yote ya kiroho inahusiana moja kwa moja na programu hii ya pekee. Ndiyo ninayosoma kwanza ninapoamka asubuhi. Ninaisikiliza ninapoendelea na kazi zangu. Ninaitumia ninapojifunza kwa ajili ya mikutano. Ninaitumia kujitayarisha kwa ajili ya funzo langu la Biblia. Ninatazama video zilizomo ninapopata muda. Ninaitumia kusoma makala au Biblia ninaposubiri kwenye mstari. Ni yenye thamani sana.”

 Programu hiyo imekuwa yenye faida kubwa pia katika huduma. Kwa mfano, dada mmoja nchini Kamerun alipokuwa akihubiri alitaka kutumia andiko ambalo alimwona dada mwingine akitumia majuma kadhaa mapema. Hata hivyo, hakuweza kukumbuka andiko lenyewe. Anaeleza hivi: “Kwa kupendeza, nilikumbuka neno moja. Nilifungua programu hiyo, nikafungua Biblia, na kutafuta neno hilo. Mara moja, nilipata andiko hilo. Programu hiyo imeniwezesha kupata mistari mingi ambayo pindi fulani ninasahau.”

 Michango yako ya ukarimu kupitia mbinu zinazoonyeshwa kwenye donate.isa4310.com zimetuwezesha kutokeza, kudumisha, na kuboresha programu ya JW Library kwa ajili ya ndugu na dada zetu ulimwenguni pote. Asante sana kwa ukarimu wako.

1. Oktoba 2013—Programu inatolewa ikiwa na toleo lililorekebishwa la Tafsiri ya Ulimwengu Mpya

2. Januari 2015—Machapisho mengine yanapatikana katika Kiingereza, baada ya hapo yanapatikana katika mamia ya lugha

3. Novemba 2015—Uwezo wa kupiga mstari unaongezwa

4. Mei 2016—Tabo ya mikutano inaongezwa

5. Mei 2017—Sehemu ya kuandika maandishi inaongezwa

6. Desemba 2017—Uwezo wa kutumia Biblia ya Kujifunzia unaongezwa

7. Machi 2019—Uwezo wa kupakua rekodi za sauti, kuonyesha video bila kuzipakua, na kutazama marejeo ya Mwongozo wa Utafiti unaongezwa

8. Januari 2021—Sehemu zilizoboreshwa za Furahia Maisha Milele! zinaongezwa