E TOʻATELE tagata o loo feagai ma popolega o le olaga, ma ua latou manaʻomia ai se fesoasoani. E latou te manaʻomia se tasi e agaalofa, ma malamalama i o latou tulaga.

Ua faapena lagona o nisi pe a latou faia ni tatalo. E latou te faapea mai e sili atu le tatalo i se tasi o sagato nai lo o le Atua, auā e mamalu tele le Atua. O lo latou taofi, o sagato sa oo iai faigatā ma faafitauli o le olaga, ma e latou te lagona foʻi le tigā alofa. O se faataʻitaʻiga, o se tagata ua leiloa ni ana mea totino, atonu e na te faatoga atu i le sagato o Anthony of Padua, ona e manatu e mafai ona fesoasoani mai i lona faafitauli. Ae a maʻi se manu, ona ia tatalo atu lea i le sagato o Francis of Assisi po o Jude Thaddeus, pe afai ua matuā leai se faamoemoe, po o se vaifofō mo le manu.

Faamata e talafeagai le tatalo i sagato, pe a fua i le Tusi Paia? Pe a tatou tatalo i le Atua, o le mea moni e tatou te fia iloa pe faamata o ia faafofogaina i tatou, ma po o ā foʻi ni ona faalogona pe a tatou tatalo atu i sagato.

O le masaniga o le tatalo atu i sagato, na afua mai i aʻoaʻoga a le Lotu Katoliko e faapea, ia tatalo atu i sagato, ina ia latou talosaga i le Atua mo i latou. Ua taʻua foʻi i le New Catholic Encyclopedia, “i le silafaga a le Atua, e na o sagato e iai le aiā e talosaga atu ai iā te ia mo lona alofa mutimutivale i tagata.” O lea, e manatu tagata e latou te maua faamanuiaga pe a tatalo i sagato, auā e iai o latou tulaga mamalu i luma o le Atua.

Po o taʻua i le Tusi Paia na aʻoaʻoga? Ua faapea mai nisi, e faavae mai i tusitusiga a le aposetolo o Paulo le talitonuga o le tatalo i sagato. O se faataʻitaʻiga, na tusi atu Paulo i Kerisiano i Roma e faapea: “Uso e, ou te apoapoaʻi atu iā te outou i lo tatou Alii o Iesu Keriso ma le alofa o le agaga, ia tatou finafinau faatasi e tatalo i le Atua mo aʻu.” (Roma 15:30) Pe na faapea atu Paulo i uso Kerisiano ina ia latou faatoga atu mo ia? E mautinoa e leai. Afai e saʻo lenā talitonuga, sa tatau la ona latou tatalo atu iā Paulo ina ia faatoga mo i latou, ona o ia o le aposetolo o Keriso. Sa faamautinoa mai e Paulo, e talafeagai ona talosaga atu i uso Kerisiano e tatalo mo i tatou, ae e lē talafeagai le talosaga atu i sē e manatu o loo i le lagi ina ia tatalo i le Atua mo i tatou. Aiseā?

I le Evagelia a le aposetolo o Ioane, na fetalai ai Iesu: “O aʻu o le ala, o le upu moni ma le ola. E leai se tasi e alu atu i le Tamā pe a lē ui  mai iā te aʻu.” (Ioane 14:6) Na ia faapea mai foʻi: ʻE foaʻi mai iā te outou e le Tamā so o se mea tou te talosaga atu ai i loʻu igoa.’ (Ioane 15:16) E leʻi uiga atu Iesu, ia tatalo atu iā te ia, ona ia faaoo atu lea o a tatou talosaga i le Atua. Peitaʻi, ina ia faafofogaina i tatou, e manaʻomia ona tuusaʻo a tatou tatalo i le Atua, e ala atu iā Iesu ae lē o se isi.

Ina ua talosaga le ʻausoo iā Iesu e aʻoaʻo atu le auala e tatalo ai, na faapea atu Iesu: “Pe a outou tatalo, ia faapea atu, ʻLo matou Tamā e, ia faapaiaina lou suafa.’” (Luka 11:2) O lea, ina ua fetalai Iesu “pe a,” o lona uiga po o le ā lava le taimi e tatou te tatalo ai, e manaʻomia ona tuusaʻo atu i le Atua. E tusa ai ma lenei aʻoaʻoga manino, pe lē tatau ai ea la ona tuusaʻo atu a tatou tatalo i le Atua, e ala atu iā Iesu, ae lē o se “sagato”?

O le tatalo o se vala tāua o la tatou tapuaʻiga, ma o le tapuaʻi atu i isi e ese mai le Atua, e lē o se aʻoaʻoga a le Tusi Paia. (Ioane 4:23, 24; Faaaliga 19:9, 10) O le māfuaaga lenā e tatau ai ona tatou tatalo tuusaʻo atu i le Atua.

I lana Lauga i le Mauga, na taʻua ai e Iesu se talafaatusa i se tamaitiiti o loo talosaga atu i lona tamā mo se meaʻai. Pe e tatau i se tamā ona avatu i lona atalii se maa pe a ōle mai mo se falaoa? Po o se gata pe a ōle mai mo se iʻa? (Mataio 7:9, 10) E mautinoa e lē mafai e se matua alofa ona faia na gaoioiga!

Seʻi faapea o oe o se matua, ma o loo iai se mataupu tāua o loo fia talanoa atu ai lou alo iā te oe. E māfana le lua faiā, ma e faigofie foʻi ona ia talanoa atu iā te oe. Peitaʻi, o lona fefe i se auala e te ono tali atu ai, ua ia talanoa atu ai i se isi ina ia faaoo mai lana talosaga iā te oe. O ā ni ou faalogona? Pe e te fiafia pe a fai lava ma ana masani lenā mea? E mautinoa e leai! O se matua alofa, e manaʻo i lana fanau e talanoa tuusaʻo atu iā te ia, ma ia saʻoloto le fesili atu i mea e mananaʻo i ai.

E tusa ai ma le talafaatusa a Iesu, na ia faapea atu ai i le motu o tagata: “E ui o outou o tagata leaga, ae e mafai lava ona outou avatu meaalofa lelei i a outou fanau. E sili atu la ona foaʻi mai e lo outou Tamā o i le lagi mea lelei i ē e ōle atu iā te ia!” (Mataio 7:11) O le mea moni, o le faanaunauga masani o mātua o le faia o mea lelei mo ā latou fanau. Peitaʻi, e sili atu le faanaunauga o lo tatou Tama o i le lagi, ina ia faafofogaina a tatou tatalo.

Po o ā lava o tatou faalogona mafatia ona o mea sesē na tatou faia, ae e finagalo pea le Atua ina ia tatou talanoa tuusaʻo atu iā te ia. E na te lē tofia se tasi e faafofogaina a tatou tatalo. Ua faapea mai le Tusi Paia: “Ia tuuina atu iā Ieova ou popolega uma, o ia lava e na te tausia oe.” (Salamo 55:22) Nai lo o le faalagolago atu i talosaga e faia e sagato po o isi, e tatau ona atiaʻe se faiā lelei ma Ieova le Atua.

E manatu mamafa mai lo tatou Tamā i le lagi iā i tatou taʻitoʻatasi. E na te fia fesoasoani mai i o tatou faafitauli, ma talosaga mai ina ia mafuta vavalalata atu iā te ia. (Iakopo 4:8) O se fiafiaga le mauaina o le avanoa e tatalo atu ai i lo tatou Atua ma lo tatou Tamā, “le Faafofoga tatalo.”​—Salamo 65:2.