O IONATANA o se Korea na fanau i Amerika, ma sa mafatia ona o le faailogalanu. A o tuputupu aʻe o ia, na ia saʻilia ai se nofoaga e lē faamasinoina ai o ia i ona foliga vaaia ma lona ituaiga. Na avea o ia o se fomaʻi i se aai i le itu i mātū o Alaska, lea e talitutusa ai ona foliga vaaia ma le tele o tagata. Na ia manatu o le nofo i lenā vaipanoa sili ona mālūlū, o le a lē toe feagai ai ma tagata e faaalia uiga lē alofa.

Peitaʻi, e lē o le tulaga lenā ina ua ia avatu le fesoasoani faafomaʻi i se tamaʻitaʻi e 25 tausaga. Ina ua teʻi mai o ia mai le koma ma vaai iā Ionatana, na ia fai atu loa faaupuga e faaalia ai lona ʻinoʻino i tagata Korea. O lenei mea na toe faamanatu ai iā Ionatana, po o ā lava ana taumafaiga, e faileagaina lava o ia ona o le faailogatagata.

Ua faaalia i le mea na tupu iā Ionatana le tulaga moni o loo iai le taimi lenei. Po o fea lava e iai tagata, e iai lava le uiga faailogatagata.

 E ui e taatele le uiga faailogatagata, ae e toʻatele e faapea mai e lē fiafia i lenei uiga, o se manatu e matuā feteenaʻi. E faapefea ona lē fiafia tagata i lenei uiga, ae i le taimi e tasi o loo latou faaalia? O le mea moni, o le toʻatele e faapea mai e lē faailogatagata, e faigatā ona iloa ua latou aafia i lea uiga. Pe e faapena foʻi ou manatu?

E faigatā ona iloa ua tatou aafia i uiga faailogatagata, auā ua faapea mai le Tusi Paia: “E sili ona faaʻoleʻole le loto nai lo o mea uma.” (Ieremia 17:9) O lea, atonu e tatou te ʻolegia i tatou e manatu, e mafai ona tatou talia so o se ituaiga tagata. E tatou te ono faia foʻi ni faamolemolega e taʻutonuina ai lo tatou lē fiafia i tagata o le isi ituaiga.

Seʻi manatu i le faataʻitaʻiga lenei e iloa ai po o e teulotoina ni uiga faailogatagata. O loo e savali i le auala i se pō pogisa, ma faafuaseʻi ona e vaaia ai ni alii talavou malolosi se toʻalua. Ua la faalatalata atu iā te oe, ma e foliga mai o loo iai se mea o loo uuina e se tasi alii.

Pe faamata o alii talavou uma e taufaamataʻu? Atonu e iai ni mea na tutupu i le taimi ua mavae e tatau ai ona oo iā te oe na lagona. Ae pe e taʻutonuina ai lou manatu e faapea e taufaamataʻu na alii e pei ona taʻua muamua? Peitaʻi, o se fesili faatupu manatu, o lē fea atunuu na e manatu e ō mai ai na alii talavou? O lau tali ua mafai ona iloa ai ou faalogona moni. E ono iloa ai foʻi, ua e aafia i le uiga faailogatagata.

Pe a faia se iloiloga faamaoni o i tatou lava, o le a iloa ai o i tatou uma e aafia i le faailogatagata. O loo taʻua i le Tusi Paia se vala masani o le faailogatagata e faapea: “E faamasinoina e tagata isi tagata i o latou foliga vaaia.” (1 Samuelu 16:7, Contemporary English Version) O i tatou uma lava e aafia i lea uiga faaletagata, ma e masani ona iai āuga leaga. Ae faamata e mafai ona aveesea atoatoa lenei uiga mai tagata? Po o le a iai se taimi o le a lē toe iai se faailogatagata i le lalolagi?