E lua māfuaaga autū o loo taʻua i le Tusi Paia. (1) E ui i le tele o mea ua faia e tagata, ae e leʻi foafoaina i latou ma le tomai e taʻitaʻia ai o latou lava ala. (2) E lē o taulau taumafaiga a tagata, ona “o le lalolagi atoa o loo nofo toʻilalo i le pule a lē o loo leaga,” o Satani le Tiapolo. O lea, e lē mafai e tagata ona aumaia le filemu i le lalolagi.​—Faitau le Ieremia 10:23; 1 Ioane 5:19.

Ua faigatā foʻi ona maua se filemu, ona o faanaunauga manatu faapito o tagata. E pau le faigāmalo e mafai ona aumaia le filemu, o se faigāmalo e aʻoaʻoina tagata e faia le mea tonu ma ia fealofani.​—Faitau le Isaia 32:17; 48:18, 22.

Ua folafola mai e le Atua e ona le malosi uma lava, o le a ia faatūina se faigāmalo e pulea tagata uma, ae aveesea malo uma faaletagata. (Tanielu 2:44) O le a pule Iesu, le Alo o le Atua, o se Perenise o le Filemu. O le a ia aveesea le amioleaga mai le lalolagi, ma aʻoaʻoina tagata i ala o le filemu.​—Faitau le Isaia 9:6, 7; 11:4, 9.

I lalo o le taʻitaʻiga a Iesu, o loo faaaogāina pea e le toʻatele le Afioga a le Atua, e aʻoaʻoina ai tagata i le auala e maua ai le nofo fealofani ma isi. Ua toe o se aga, ona iai lea o le filemu i le lalolagi.​—Faitau le Isaia 2:3, 4; 54:13.