“O se tasi o mea e sili ona faigatā na ou fesagaʻia a o tuputupu aʻe, o loʻu tosina atu lea i isi foʻi tama. Na ou manatu e pau lava o faalogona masani o talavou, ae na faaauau pea ona aafia ai oʻu faalogona.”​—Tavita, 23.

 O Tavita o se Kerisiano e manaʻo e faafiafia le Atua. Pe e mafai ona ia faafiafia le Atua ae i le taimi e tasi e tosina atu i isi foʻi tama? O ā faalogona o le Atua e faatatau i le tauatane ma le tauafafine?

•  O le ā le manatu o le Tusi Paia?

•  Po o lona uiga . . . ?

•  Ae faapefea pe afai . . . ?

 Atonu e tofu lava aganuu ma o latou manatu e faatatau i le tauatane ma le tauafafine. E fesuisuiaʻi foʻi manatu o tagata e faatatau i lenei mataupu mai i lea vaitaimi i lea vaitaimi. Ae o Kerisiano, e lē mulimuli i ni manatu taatele pe “fetosoaʻiina i matagi o aʻoaʻoga eseese.” (Efeso 4:14) Nai lo o lea, e faavae manatu o Kerisiano e faatatau i lenei mataupu tauamio (ma isi amioga) i tapulaa a le Tusi Paia.

 E manino tapulaa a le Tusi Paia e faatatau i le tauatane ma le tauafafine. Ua faapea mai le Afioga a le Atua:

•  “Aua lava neʻi lua momoe ma se tane e pei ona lua momoe ma se fafine.”​—Levitiko 18:22.

•  “Ona o tuʻinanauga o o latou loto, . . . ua tuu ai pea i latou e le Atua i o latou tuʻinanauga i feusuaʻiga e māsiasi ai, auā ua fesuiaʻi e fafine tū e masani ai, i tū e lē masani ai.”​—Roma 1:24, 26.

•  “Aua neʻi faasesēina outou. O ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane, o ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.”​—1 Korinito 6:​9, 10.

 O le mea moni lava ia, o tapulaa a le Atua e mo tagata uma, e aofia ai tagata tauatane ma tauafafine, ma tagata foʻi e lē faia na amioga. E tatau ona pulea e tagata uma o latou faalogona pe a oso aʻe ni tuʻinanauga e faia amioga e lē fiafia i ai le Atua.​—Kolose 3:5.

 Po o lona uiga la ua uunaʻia i tatou e le Tusi Paia e ʻinoʻino i tagata tauatane ma tauafafine?

 E leai. E lē o uunaʻia i tatou e le Tusi Paia e ʻinoʻino i so o se tagata, e aofia ai tagata tauatane ma tauafafine po o i latou foʻi e lē faia na amioga. Nai lo o lea, ua faapea mai le Tusi Paia ia “tausisi i le filemu ma tagata uma,” e tusa lava po o le ā le olaga e ola ai. (Eperu 12:14) E sesē la le faia o gaoioiga fia malosi ma sauāga e māfua ona o le faailoga tagata, po o nisi lava faiga e faileagaina ai tagata tauatane ma tauafafine.

 Po o lona uiga la e tatau ona teena e Kerisiano tulafono e faataga ai le faaipoipo o le tama i le tama po o le teine i le teine?

 O loo faailoa mai i le Tusi Paia le faatulagaga a le Atua mo le faaipoipoga, o le tuufaatasia lea o le tamāloa e toʻatasi ma le fafine e toʻatasi. (Mataio 19:4-6) Peitaʻi, o le talanoaina o tulafono a tagata e faatatau i le faaipoipo o le itupā e tasi o se mataupu faapolotiki, ae lē o se mataupu mo tapulaa tauamio. Ua faatonuina e le Tusi Paia Kerisiano ina ia tumau pea ona solitū i mataupu faapolotiki. (Ioane 18:36) O lea, e lē lagolagoina pe tetee foʻi Kerisiano i tulafono a le malo e faatatau i le faaipoipo o le itupā e tasi, po o amioga faatauatane ma tauafafine.

 Ae faapefea pe afai o loo faia e se tasi amioga faatauatane po o le tauafafine? Pe e mafai ona suia le olaga o lenā tagata?

 Ioe. Na faapena foʻi nisi i le uluaʻi senituri. Ua taʻua i le Tusi Paia o i latou e faia amioga faatauatane ma tauafafine e lē fai le Malo o le Atua mo latou tofi, ona faapea atili mai lea: “Sa faapena foʻi nisi o outou.”​—1 Korinito 6:11.

 Po o lona uiga la e lē mafai ona toe aafia i latou ua lē toe faia amioga faatauatane ma tauafafine, i so o se tuʻinanauga i o latou olaga na iai muamua? E leai. Ua faapea mai le Tusi Paia: “Ia oofu outou i le tagata fou ua faafouina i le poto saʻo.” (Kolose 3:10) O le faia o suiga o se gaoioiga e faaauau pea.

 Ae faapefea pe afai e manaʻo se tasi e mulimuli i tapulaa a le Atua ae o loo iai pea ona tuʻinanauga faatauatane ma tauafafine?

 E mafai lava ona ʻalofia le atiaʻe po o le lolo atu i na tuʻinanauga, e pei foʻi o isi tuʻinanauga. E faapefea? Ua faapea mai le Tusi Paia: “Ia outou savavali pea i la le agaga, ona outou lē faia lea o tuʻinanauga o le tino.”​—Kalatia 5:16.

 Ia mātau, e lē o faapea mai le mau o le a leai ni tuʻinanauga o le tino. Nai lo lea, o le iai o se faasologa lelei faaleagaga o le suʻesuʻeina o le Tusi Paia ma le tatalo, o le a maua ai le malosi e teena ai na tuʻinanauga.

 Na iloa e Tavita lea na taʻua i le amataga le moni o lenā manatu, aemaise lava ina ua uma ona talanoa i ona mātua Kerisiano e faatatau i le faafitauli na la tauivi. Na ia faapea mai: “Na pei e matuu ese atu se avega mamafa sa iā te aʻu, ma atonu na mafai ona ou maua se olaga e sili ona fiafia a o oʻu talavou, pe ana vave ona ou talanoa i oʻu mātua.”

 O lea la, o le a sili atu ona tatou fiafia pe a faatatau tapulaa a Ieova i o tatou olaga. Ua tatou mautinoa “e tonu [tapulaa] mai iā Ieova, e olioli ai le loto,” ma “e tele foʻi le taui pe a tausi i ai.”​—Salamo 19:8, 11.