E fesoasoani iā te oe le iloa o auala e fesagaʻia ai!

•  O le ā e te faia?

•  Ae faapefea pe afai o se faafitauli tau i le soifua mālōlōina?

•  Mea e mafai ona e faia

•  Mau o le Tusi Paia e mafai ona fesoasoani iā te oe

 Iloilo tulaga nei:

 Ua lē toe maua e Jennifer le fiafia, ma e tagi i aso uma e aunoa ma se māfuaaga. Ua ia faaesea o ia mai i tagata ma ua lē toe fia ʻai. Ua faigatā ona moe pe uaʻi atu i se mea. Ua taumānatu Jennifer: ʻO le ā le mea ua tupu iā te aʻu? Pe e iai se taimi o le a toe faaleleia ai oʻu faalogona?’

 Na avea Mark ma faaaʻoaʻoga lelei i isi tamaiti. Ae ua lē toe fia aʻoga, ma ua paʻū ona togi i vasega. Ua lē toe fiafia i taaloga na fiafia ai. Ua lē mautonu ana uō, ma ua popole ona mātua. Pe ua na o se suiga lē tumau, po o se mea e matuiā atu?

 Pe e masani ona pei ou faalogona o Jennifer po o Mark? Afai o lea, o le ā e mafai ona e faia? E mafai ona e faataʻitaʻi auala nei e lua:

1.  A. Taumafai e taulima e oe lava

2.  E. Talanoa i se tagata matua maufaatuatuaina

 Atonu e te ono manatu e faigofie le auala A, aemaise lava pe afai e te lē o fia talanoa i se isi. Ae pe e atamai lenā filifiliga? Ua faapea mai le Tusi Paia: “E sili ona lelei o le toʻalua nai lo o le toʻatasi . . . auā afai e paʻū le tasi, e mafai e le isi ona fesoasoani e toe faatūina o ia. Ae o le ā e tupu i lē e paʻū ae e leai se isi e fesoasoani e toe faatūina o ia?”​—Failauga 4:​9, 10.

 O se faataʻitaʻiga: “Seʻi faapea ua e fesēaʻi i se nofoaga e toʻatele ai tagata solitulafono. Ua pogisa, ma e leai ma se isi e te masani ai. O le ā o le a e faia? E mafai ona fai au lava taumafaiga ina ia alu ese mai i lenā nofoaga. Ae pe e lē atamai le fesili atu i se tasi e te maufaatuatuaina mo se fesoasoani?

 E mafai ona faatusa le lotomafatia i lenā nofoaga lamatia. E moni e iai taimi e te lagona ai le faanoanoa ma toe mou atu. Ae pe afai e umi se taimi o lagona le lotomafatia, e tatau la ona saʻili se fesoasoani.

 MATAUPU SILISILI O LE TUSI PAIA: “O lē e na te faaesea o ia lava . . . e tetee o ia i le atamai aogā uma.”​—Faataoto 18:1.

 Pe a e faatatauina le auala E, o le talanoa atu i se matua po o se isi tagata matua maufaatuatuaina, o le a e maua ai aogā mai i se tasi na fesagaʻia foʻi ni faalogona faapena.

 Atonu e te faapea mai: “E lē malamalama oʻu mātua i oʻu faalogona!” Ae e te mautinoa e moni lenā manatu? E tusa lava pe e ese tulaga na la fesagaʻia a o talavou mai i lou tulaga, ae atonu e tutusa ou faalogona ma la faalogona na iai i lenā taimi. Atonu la o loo la iloa se auala e taulima ai!

 MATAUPU SILISILI O LE TUSI PAIA: “Po ua lē iai ea le atamai i ē ua toeaina, ma le malamalama i ē ua faafualoa o latou soifua?”​—Iopu 12:12.

 O le manatu autū: Pe a e talanoa atu i se matua po o se isi tagata matua maufaatuatuaina, e mautinoa o le a e maua se fautuaga aogā.

 Afai e te lagona le lotomafatia i aso uma, atonu la o loo e aafia i se faafitauli tau i le soifua mālōlōina e manaʻomia ona togafitia, e pei o le mafatia o le mafaufau.

 E ono manatu talavou o le mafatia o le mafaufau o se faalogona masani, ae e mafai ona faasolo ina matuiā ma aafia ai mo se taimi umi. Afai la ua umi se taimi o e matuā faanoanoa, aiseā e te lē talanoa atu ai i ou mātua e te alu e vaai le fomaʻi?

 MATAUPU SILISILI O LE TUSI PAIA: “E lē manaʻomia e tagata malolosi se fomaʻi, ae na o ē mamaʻi.”​—Mataio 9:​12.

 E lē tatau ona e matamuli pe afai o loo e aafia i le lotomafatia. O le lotomafatia o talavou o se faalogona masani, ma e mafai ona foʻia! O uō moni, o le a latou lē faaesea oe.

 Fesoasoani: Ia onosaʻi. E umi se taimi e alu i le faaleleia o le lotomafatia, ma e tatau ona e faatalitalia e iai aso lelei ma aso leaga. a

 E tusa pe e te manaʻomia se togafitiga faafomaʻi pe e leai, ae e iai mea e mafai ona e faia pe afai ua umi se taimi o e faanoanoa. Mo se faataʻitaʻiga, e mafai ona fesoasoani iā te oe le faamalositino, taumafa i meaʻai paleni, ma ia lava le moe. (Failauga 4:6; 1 Timoteo 4:8, faaopoopoga pito i lalo) E ono fesoasoani foʻi le iai o se api e faamaumau ai ou faalogona, o ou sini i le faaleleia o ou faalogona, o taimi e te toe lagona ai le lotomafatia, ma taimi e te taulau ai.

 Pe afai o loo e matuā mafatia po o e aafia i faalogona mafatia mo sina taimi, ia manatua le manatu lenei: O le talia o le fesoasoani a isi, ma faia taumafaiga ina ia toe faaleleia ou faalogona, o le a mafai ai ona e fesagaʻia le lotomafatia.

•  “E latalata mai Ieova iā i latou o ē e loto momomo; ma e faaola e ia i latou o ē ua lotonutimomoia.”​—Salamo 34:18.

•  “Ia lafo atu ou popolega uma iā Ieova, o ia e na te tausia oe. E na te lē tuua lava le tagata amiotonu ia tautevateva.”​—Salamo 55:22.

•  “Auā o aʻu o Ieova lou Atua, o loo uuina lou lima taumatau, o Lē e fai atu iā te oe, ‘Aua e te fefe. O le a ou fesoasoani iā te oe.’”​—Isaia 41:13.

•  “Aua neʻi outou popole mo le aso a taeao.”​—Mataio 6:​34.

•  “Ia faailoa atu o outou manaʻoga i mea uma lava i le Atua . . . ona leoleoina ai lea o o outou loto . . . i le filemu mai i le Atua, lea e silisili i mea uma lava e tatou te malamalama i ai.”​—Filipi 4:​6, 7.