Pe e Moni Seoli? O le ā le uiga o Seoli i le Tusi Paia?

PLAY

Tali a le Tusi Paia

I faaliliuga tuai o le Tusi Paia faa-Peretania e pei o le King James Version, o loo faaaogā ai le upu “Seoli” i nisi fuaiupu. (Salamo 16:10; Galuega 2:27 a) E pei ona faailoa mai e ata faalelotu o loo i lenei mataupu, e toʻatele tagata e talitonu o Seoli o se nofoaga e faasalaina ai tagata i le afi e faavavau. Ae po o le aʻoaʻoga lenā a le Tusi Paia?

I lenei mataupu

Po o Seoli o se nofoaga e faapuapuagatia ai e faavavau?

Leai. O uluaʻi upu na faaliliuina ai “Seoli” i nisi faaliliuga tuai o le Tusi Paia (gagana Eperu, “Seoli”; gagana Eleni, “Heitisi”) e faasino atu i le “Tuugamau” po o se nofoaga faafaatusa ua momoe ai le toʻatele ua feoti. Ua faailoa mai i le Tusi Paia o tagata o loo i le “Tuugamau” ua lē o toe feola.

E lē toe iloa e tagata ua maliliu se mea ma e latou te lē toe lagonaina se tigā. “Auā e leai se galuega, po o se mafaufau, po o se iloa, po o se poto i le tuugamau.” (Failauga 9:10, Tusi Paia Samoa—Lomiga 1969) E leai nisi o feʻei mai i le tuugamau. Nai lo o lea, ua faapea mai le Tusi Paia: “Tau ina ia māsiasi o ē e amioleaga; tau ina ia punitia foʻi o latou gutu i le Tuugamau [Seoli].”—Salamo 31:17, fpl.; 115:17.
Ua faapea mai le Atua, o le oti o le totogi lea o le agasala, ae e lē o le faapuapuagatia e faavavau i le afi i Seoli. Na fetalai atu le Atua iā Atamu, o le faasalaga mo le solia o ana tulafono, o le oti. (Kenese 2:17) E na te leʻi taʻua le faapuapuagatia e faavavau i Seoli. Mulimuli ane, na fetalai atu le Atua ina ua agasala Atamu, o lona faasalaga lenei: “O le efuefu oe, e te toe foʻi atu lava i le efuefu.” (Kenese 3:19) O lona uiga, o le a lē toe iai o ia. Pe ana faapea na auina atu Atamu e le Atua i se afi i Seoli, semanū e na te faailoa mai. E leʻi suia e le Atua le faasalaga mo le lē usiusitaʻi i ana tulafono. Ina ua mavae se taimi umi talu ona maliu Atamu, na faagaeeina e le Atua se tusitala o le Tusi Paia e tusi: “O le totogi o le agasala o le oti lea.” (Roma 6:23) E na o le pau lenā o le agasala “auā o lē ua oti ua magalo o ia mai i lana agasala.”—Roma 6:7.
E ʻinoʻino le Atua i le aʻoaʻoga o le faapuapuagatia e faavavau o se tasi. (Ieremia 32:35) O lenā aʻoaʻoga e matuā tuufaafeagai ma le aʻoaʻoga a le Tusi Paia o loo faapea mai, “o le Atua o le alofa lava ia.” (1 Ioane 4:8) E finagalo le Atua tatou te tapuaʻi atu iā te ia ona o le alofa mo ia, ae e lē ona o le fefe ina neʻi faapuapuagatia e faavavau.—Mataio 22:36-38.
Na ō tagata lelei i Seoli. O loo taʻua i le Tusi Paia na faatalitalia e tane faamaoni e pei o Iakopo ma Iopu, pe a maliliu o le a latou ō i Seoli. (Kenese 37:35; Iopu 14:13) O loo faamatala mai i le Tusi Paia, e oo foʻi iā Iesu Keriso na iai i Seoli ina ua maliu ma a o leʻi toe faatūina mai. (Galuega 2:31, 32) E manino mai, pe a taʻua le upu “Seoli” i le Tusi Paia, e faasino atu i le Tuugamau. b

O le ā le uiga o le talafaatusa a Iesu i le tagata mauʻoa ma Lasalo?

Na faamatala e Iesu lenei talafaatusa lea o loo faamauina i le Luka 16:19-31. O talafaatusa, e aʻoaʻoina atu ai tapulaa tauamio ma upu moni. O le talafaatusa i le tagata mauʻoa ma Lasalo, e lē o se mea moni na tupu. (Mataio 13:34) Ina ia aʻoaʻoina atili e faatatau i lenei talafaatusa, tagaʻi i le mataupu “O Ai Lasalo ma le Tagata Mauʻoa?”

Pe e uiga atu Seoli i le faaesea o le tagata mai i le Atua?

Leai. O le aʻoaʻoga e iloa e i latou ua feoti ua faaesea i latou mai i le Atua, e feteenaʻi ma le Tusi Paia. O loo aʻoaʻoina i le Tusi Paia o lē ua oti ua lē o toe iloa se mea.—Salamo 146:3, 4; Failauga 9:5.

Pe e iai se tasi na faasaʻoloto mai i Seoli?

Ioe. Na faamatala auʻiliʻili i le Tusi Paia ni tagata se toʻaiva o ē na maliliu ma na iai i le Tuugamau (Seoli), ae na toe faatutūina mai. c Pe afai na latou iloa le taimi na iai i Seoli, semanū la na mafai ona latou faamatala mai mea na tutupu ai. Peitaʻi, e leai ma se isi o i latou na taʻua le faapuapuagatia e faavavau po o se isi lava mea. Aiseā? Talu ai ua faamatilatila mai e le Tusi Paia, o ē ua oti e latou te lē iloa se mea, ma e tai pei o loo latou “moe” gase.—Ioane 11:11-14; 1 Korinito 15:3-6.

a O le tele o Tusi Paia faa-Peretania i aso nei, e lē o faaaogāina le upu “Seoli” i le Galuega 2:27. Nai lo o lea, e faaaogā e isi faaliliuga faaupuga e pei “o le tuugamau, (New Century Version); “le nofoaga o ē ua oti,” (New International Version); “o ē ua feoti” (The Passion Translation).

b Tagaʻi i le pusa “ O upu na faaaogā i uluaʻi gagana na tusia ai le Tusi Paia.”

c Tagaʻi i le 1 Tupu 17:17-24; 2 Tupu 4:32-37; 13:20, 21; Mataio 28:5, 6; Luka 7:11-17; 8:40-56; Ioane 11:38-44; Galuega 9:36-42; Galuega 20:7-12.

Mau o le Tusi Paia o loo taʻua ai Seoli po o le Tuugamau

Iopu 14:13: “E! ia e natia aʻu i le Tuugamau, ia e faaliloina ai aʻu, . . . ia e atofaina mai se taimi mo aʻu ma manatua mai ai aʻu!”

Le uiga: Na iloa e le tane faamaoni o Iopu, o le a leai ni ona tigā i le Tuugamau (Seoli), ma e mafai ona toe faatūina o ia e le Atua mai i le Tuugamau.

Salamo 145:20: “E leoleoina e Ieova i latou uma o ē e alolofa iā te ia, ae e na te faaumatia i latou uma o ē e amioleaga.”

Le uiga: O le a faaumatia atoatoa e le Atua tagata amioleaga. E na te lē faapuapuagatia i latou i Seoli.

Failauga 9:10: “E leai se galuega, po o ni fuafuaga, po o le poto, po o le atamai i le Tuugamau [Seoli, fpl.] o loo e alu atu i ai.”

Le uiga: O i latou o loo i le Tuugamau po o Seoli, e lē toe iloa se mea ma e lē o faapuapuagatia i latou. E lē gata i lea, e oo foʻi i tagata lelei na faatatau i ai upu atamai a le tusitala.

Galuega 2:31: “Na muaʻi iloa e ia, ma na faapea mai e faatatau i le toetū o le Keriso, e lē tuua o ia i le Tuugamau.”

Le uiga: Na alu Iesu i Seoli (le Tuugamau) ina ua maliu.

Roma 6:23: “O le totogi o le agasala o le oti lea.”

Le uiga: O le oti o le totogi lea o le agasala, ae e lē o le faapuapuagatia i Seoli.

Faaaliga 20:13: “Ua ave aʻe foʻi e le oti ma Tuugamau i latou na oti o iai.”

Le uiga: Ua feoti i latou o loo i Seoli. O le a toe ola mai i latou e ala i le toetū.

Faaaliga 20:14: “Ona lafo ai lea o le oti ma Tuugamau i le lepa afi.”

Le uiga: Talu ai o le a faatutūina tagata mai i le oti, o le a peiseaʻī ai ua gaogao Seoli (le Tuugamau) ma faaumatia e faavavau. Ona lē toe iai lea o le oti na māfua mai i le agasala a Atamu.—Roma 5:12.

O upu na faaaogā i uluaʻi gagana na tusia ai le Tusi Paia

I le lisi o loo mulimuli mai, o loo taʻua ai upu na faaaogā i uluaʻi gagana na tusia ai le Tusi Paia. E ui e eseese o latou uiga, ae na faaaogā e tagata na faaliliuina le Tusi Paia le upu “Seoli” e faaliliuina ai upu uma nei, lea ua māfua ai ona fenuminumiaʻi tagata. I nisi tulaga, e foliga mai na mananaʻo na tagata faaliliu ia talitonu tagata e lē faaumatia tagata amioleaga, ae o le a faapuapuagatia e faavavau.

Seoli (Gagana Eperu שְׁאוֹל), Heitisi (Gagana Eleni ᾅδης)

Le uiga: Se nofoaga faafaatusa ua momoe ai le toʻatele ua feoti.—Salamo 16:10; Galuega 2:31

Faaliliuga: Tuugamau (Tusi Paia Samoa—Lomiga 1969); nofoaga o ē ua oti (New International Version)
Kena (Gagana Eleni γέεννα)

Le uiga: Faaumatiaga e faavavau.—Mataio 5:30

Faaliliuga: Kena; Seoli (Tusi Paia Samoa—Lomiga 1969, New International Version)
Tatara (Gagana Eleni ταρταρόω)

Le uiga: O le tulaga maulalo o le faalumaina o temoni, o agaga leaga ia.—2 Peteru 2:4

Faaliliuga: Seoli (Tusi Paia Samoa—Lomiga 1969); Seoli maulalo (Douay-Rheims Version)

O le amataga mai o le aʻoaʻoga o le afi i Seoli

Amataga faapaupau: Na talitonu tagata Aikupito anamua i le afi i Seoli. Ua faamatalaina e le tusi Book Ȧm-Ṭuat (Amduat) lea e talitonu le ʻau faitofā na tusia i le 16 senituri T.L.M, e faapea, o i latou “o le a lafoina i le lua e iai le afi; ma . . . e lē mafai ona sola ese mai le afi.”—The Egyptian Heaven and Hell.

E leʻi aʻoaʻoina e uluaʻi Kerisiano: “I le Feagaiga Fou tatou te lē o maua ai le afi i Seoli o se vaega o le talaʻiga a [uluaʻi Kerisiano].”—A Dictionary of Christian Theology.

Amata ona taaʻina talitonuga faalelotu i filosofia Eleni: “Mai le ogatotonu o le senituri lona 2 [T.A.], na mananaʻo ai nisi Kerisiano o ē na iai so latou malamalama i filosofia faa-Eleni, e faamatala o latou talitonuga i faaupuga o nei filosofia . . . Na sili ona latou fiafia i filosofia a Palato.” (Encyclopædia Britannica) Na aofia i na filosofia le talitonuga o le faapuapuagatia i se afi pe a oti. “I le ʻaufaifilosofia Eleni e sili ona lauiloa, o lē sa sili ana taaʻiga i manatu faaanamua e faatatau i Seoli, o Palato.”—Histoire des enfers (The History of Hell).

Na faaaogā le talitonuga o le afi i Seoli e taʻutonuina ai le faapuapuagatia o isi: I le vaitaimi e masani ona taʻua o le Faamasinoga o le Lotu i Sepania, o i latou na tetee i le lotu na faasalaina ma susunu i laau. Na talitonu i latou na faia le faasalaga “o se faataʻitaʻiga lenā o le afi i Seoli,” ma na latou faamoemoe e salamō i latou na faasalaina a o leʻi feoti. (The Spanish Inquisition, na tusia e Jean Plaidy) I se tulaga talitutusa, na susunuina e le tupu tamaʻitaʻi o Egelani o Maria I le pe ā ma le 300 tagata Porotesano i laau, ona o lona talitonuga e faapea, talu ai “o lea e susunuina e faavavau i seoli tagata e tetee i le lotu, e tatau foʻi la ona faaaʻoaʻo i ai le toʻasā o le Atua, e ala i le susunu o i latou i le lalolagi.”—Universal History, na tusia e Alexander Tytler.

Suiga i aso nei: Ua lē faamamafa naʻuā e nisi lotu o latou talitonuga e faatatau i Seoli, ona o lo latou naunau e faafiafia le ʻaulotu nai lo o le teena o talitonuga sesē. (2 Timoteo 4:3) “E mananaʻo tagata i se Atua māfana ma e alofa . . . E lē o se mea e taatele i aso nei le talanoa e faatatau i le agasala ma faalogona nofosala.”—Polofesa Jackson W. Carroll.