O le Tusi Lona Lua o Tupu 13:1-25
13 O le tausaga lona 23 o le nofoaiga a Ioasa+ le atalii o Aasaia+ le tupu o Iuta, na avea ai Ioasasa le atalii o Ieʻu+ ma tupu i Isaraelu mai i Samaria, ma na pule o ia mo tausaga e 17.
2 Na ia faia pea mea leaga i le silafaga a Ieova, ma savali i le agasala a Ierepoamo le atalii o Nepata, lea na faapogaia ai Isaraelu e agasala.+ E leʻi liliuese ai foʻi o ia.
3 Ona matuā toʻasā lea o Ieova+ iā Isaraelu,+ ma ua ia tuuina atu i latou i le lima o Asaeli+ le tupu o Suria, ma le lima o Peniata+ le atalii o Asaeli i aso uma lava.
4 Mulimuli ane, ua ʻaiʻoi atu Ioasasa mo le finagalo malie o Ieova, ma ua faafofoga mai Ieova iā te ia, auā ua ia silasila mai i le sauāina o Isaraelu e le tupu o Suria.+
5 Ona tuuina mai lea e Ieova iā Isaraelu o sē e faaola,+ e faasaoina i latou mai i lima o Suria, ona nonofo lea o le fanauga a Isaraelu i o latou fale e pei ona iai muamua.*
6 (Ae e leʻi teʻa ese i latou mai i le agasala a le aiga o Ierepoamo, lea na faapogaia ai Isaraelu e agasala.+ Na latou faia pea lenei agasala,*+ ma na tū ai pea le pou paia* i Samaria.)
7 Na totoe iā Ioasasa se ‘autau e na o le toʻa 50 tagata tiʻetiʻe solofanua, 10 kariota, ma fitafita savavali e toʻa 10,000, auā na faaumatia i latou e le tupu o Suria,+ ma ua ia solia i latou e pei o le efuefu i le taimi e solia ai saito.+
8 A o le olaga uma o Ioasasa, o mea uma na ia faia ma lona malosi, po ua lē o tusia ea i le tusi o le talafaasolopito o tupu o Isaraelu?
9 Ona taoto lea o Ioasasa faatasi ma ona augātamā, ma na latou tanuina o ia i Samaria;+ ua avea foʻi Ioasa lona atalii ma tupu e sui iā te ia.
10 O le tausaga lona 37 o le nofoaiga a Ioasa le tupu o Iuta, na fai ai Ioasa+ le atalii o Ioasasa ma tupu o Isaraelu mai i Samaria, ma na pule o ia mo tausaga e 16.
11 Na ia faia pea mea leaga i le silafaga a Ieova. E leʻi liliuese o ia mai i agasala uma a Ierepoamo le atalii o Nepata, lea na faapogaia ai Isaraelu e agasala.+ Na ia faia pea nei agasala.*
12 A o le olaga uma o Ioasa, o mea uma na ia faia, o lona malosi, ma la laʻua taua ma Amasia le tupu o Iuta,+ po ua lē o tusia ea i le tusi o le talafaasolopito o tupu o Isaraelu?
13 Ona taoto lea o Ioasa faatasi ma ona augātamā, ae ua nofo Ierepoamo*+ i lona nofoālii. Ona tanu lea o Ioasa i Samaria faatasi ma tupu o Isaraelu.+
14 Ua maʻi Elisaia,+ ma o le a maliu o ia ona o lona maʻi. Ona alu ifo lea o Ioasa le tupu o Isaraelu iā te ia ma ua tagi i ona luga, ua faapea mai: “Loʻu tamā e, loʻu tamā e! O le kariota tau a Isaraelu ma ona tagata tiʻetiʻe solofanua!”+
15 Ona fai atu lea o Elisaia iā te ia: “Inā tago ia i le ʻaufana ma aū.” Ona ia tago lea i le ʻaufana ma aū.
16 Ua ia faapea atu i le tupu o Isaraelu: “Inā sauni ia e fana.” Ona nofosauni lea o ia e fana, ma ua faaee e Elisaia ona lima i lima o le tupu.
17 Ua ia faapea atu: “Ia tatala le faamalama i sasaʻe.” Ona ia tatalaina lea. Ua fai atu Elisaia: “Fana loa!” Ona ia fana loa lea. Ua toe fai atu Elisaia: “O le aū o le manumalo* mai iā Ieova, o le aū o le manumalo* e faasaga iā Suria! O le a e faaumatia* aʻiaʻi Suria i Afeka.”+
18 Ua ia toe fai atu: “Inā tago ia i aū,” ona ia tago lea i ai. Ua ia fai atu i le tupu o Isaraelu: “Inā sasa ia o aū i le eleele.” Ona ia sasa faatolu lea, ma ua taofi.
19 Ona tigā ai lea o le loto o le tagata o le Atua moni iā te ia, ma faapea atu: “Sa tatau ona sasa faalima pe faaono! Ana e faia faapea, semanū e te faaumatia aʻiaʻi Suria, a o lenei, e na o le faatolu ona e faaumatia Suria.”+
20 Mulimuli ane, ua maliu Elisaia ma ua latou tanu iā te ia. E masani ona ō mai i Isaraelu o ʻau e faoa mea+ mai i Moapi i le amataga o le tausaga.*
21 I le tasi aso a o tanuina e ni tagata se tamāloa ua oti, ua latou iloa atu le ʻau e faoa mea, ona latou lafo loa lea o le tamāloa ua oti i le tuugamau o Elisaia, ae ō. Ina ua papaʻi le tino o le tamāloa ua oti i ponaivi o Elisaia, ona toe ola loa lea+ o le tamāloa ma ua tū i luga.
22 A o Asaeli+ le tupu o Suria, ua ia sauāina pea Isaraelu+ i aso uma o Ioasasa.
23 Ae ua manatu mai Ieova iā i latou, ma ua alofa mutimutivale iā i latou,+ ua liuliualo mai ona o lana feagaiga ma Aperaamo,+ ma Isaako,+ ma Iakopo.+ E leʻi finagalo o ia e faaumatia i latou, e na te leʻi lafoaʻia foʻi i latou mai i ona luma seʻia oo mai i le aso nei.
24 Ina ua oti Asaeli le tupu o Suria, ona avea lea o Peniata lona atalii ma tupu e sui iā te ia.
25 Ua toe fao mai e Ioasa le atalii o Ioasasa mai iā Peniata le atalii o Asaeli, o aai na faoa e Asaeli mai iā Ioasasa lona tamā, i le taua. E faatolu ona fasia*+ Peniata e Ioasa, ma ua ia toe maua mai aai o Isaraelu.
Faamatalaga Pito i Lalo
^ E faasino atu i le filemu ma le saogalemu.
^ Tagaʻi i le Uiga o Upu.
^ Epe., “Na savali ai o ia.”
^ Epe., “savali i na mea.”
^ E faasino atu iā Ierepoamo II.
^ Po o le “faaolataga.”
^ Po o le “faaolataga.”
^ Po o le “faatoʻilaloina.”
^ Atonu o le tau e totogo ai mea.
^ Po o le “faatoʻilaloina.”
