Faamaumauga a Luka 16:1-31
16 Ua ia fetalai atu foʻi i ona soo: “Na iai se tagata mauʻoa e iai sana auauna pule, na tuuaʻia i le faatalalē i le tausiaina o ʻoa a lona matai.
2 Ona ia aami atu lea iā te ia ma faapea atu, ‘O le ā lenei mea ua ou faalogo ai iā te oe? Ia aumai faamaumauga o mea na e pule ai, auā e te lē toe pule i le aiga.’
3 Ona faapea ifo lea o lenā auauna iā te ia lava, ‘O le ā se mea ou te faia, auā o le a faateʻa aʻu e loʻu matai mai i le avea ma auauna pule? E lē lava loʻu malosi e eli ai le palapala, ou te mā foʻi e ʻaisi.
4 Ia! O lea la ua ou iloa le mea ou te faia ina ia talia ai aʻu e tagata i o latou fale, pe a faateʻa aʻu mai i le avea ma auauna pule.’
5 Ona valaau atu lea o ia i tagata o loo nofo aitalafu i lona matai, ma faapea atu i lē na muamua, ‘E fia mea o e aitalafu ai i loʻu matai?’
6 Ua fai ane le tagata aitalafu, ‘E 100 paita* o suāuu olive.’ Ona fai atu lea o le auauna iā te ia, ‘Ia e tago i le maliega tusitusia lea o lau aitalafu, ma e nofo i lalo ma tusi vave ai, e 50.’
7 Ua fai atu o ia i le isi tagata, ‘Ae ā oe, e fia mea o e aitalafu ai?’ Ua fai mai o ia, ‘E 100 kori* o saito.’ Ona fai atu lea o le auauna iā te ia, ‘Tago i lau maliega tusitusia ma tusi ai, e 80.’
8 Ona faamālō atu lea o le matai i le auauna pule, auā e ui e lē amiotonu, ae ua ia gaoioi ma le atamai aogā;* auā e sili atu le atamamai o tagata o lenei faiga o mea* nai lo o tagata o le malamalama,+ e tusa ai o le auala e feagai ai ma o latou lava tupulaga.
9 “Ou te fai atu foʻi iā te outou: Ia outou faia ni uō mo outou e faaaogā ai ʻoa o le amiolētonu,+ auā pe a lē toe aogā ia mea, o le a latou taliaina ai outou i nofoaga e tumau e faavavau.+
10 O le tagata e faamaoni i nai mea itiiti, e faamaoni foʻi o ia i mea e tele, a o le tagata e amiolētonu i nai mea itiiti, e amiolētonu foʻi o ia i mea e tele.
11 O lea, pe afai e tou te lē faamaoni e tusa ai ma ʻoa o le amiolētonu, o ai la o le a tuuina atu iā te outou le ʻoa moni e vaavaaia?
12 Afai foʻi e tou te lē faamaoni i le vaaia o mea a isi, o ai la e na te avatua iā te outou mea ua tatau mo outou?+
13 E lē mafai ona pologa se tasi i ni matai se toʻalua; auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona outou pologa i le Atua atoa ma ʻOa.”+
14 Ina ua faalogo ane le ʻau Faresaio o ē e naunau i tupe i nei mea uma, ona latou aamu ai lea iā te ia.+
15 Ona ia fetalai atu lea iā i latou: “Ua outou taʻuamiotonuina outou lava i luma o tagata,+ ae ua silafia e le Atua o outou loto.+ Auā o le mea e faasilisilia i manatu o tagata, o le mea lenā e inosia i le silafaga a le Atua.+
16 “Na iai le Tulafono ma Perofeta seʻia oo mai iā Ioane. Na amata mai i lenā taimi ona folafola atu le tala lelei o le Malo o le Atua, ma ua tausinio tagata eseese uma ina ia sao atu i ai.+
17 E moni, e faigofie ona mavae atu le lagi ma le lalolagi, ae e faigatā ona mavae atu se vaega o se mataʻitusi o le Tulafono e aunoa ma le faataunuuina.+
18 “O sē e faateʻa i lana avā ma faaipoipo i se isi, ua mulilua o ia, ma o sē e faaipoipo atu i le fafine ua faateʻaina e lana tane, ua mulilua foʻi o ia.+
19 “Na iai se tagata mauʻoa e masani ona ofu i ofu violē ma le ʻie lino, ua olioli o ia i aso uma i se olaga tamaoaiga.
20 Ae e masani ona faanofo i le faitotoʻa o lona pā, se tagata ʻaisi e igoa iā Lasalo, ua lilofia i papala,
21 ma ua manaʻo o ia e ʻai i mea e toʻulu ifo mai i le laulau a le tagata mauʻoa. E ō ane foʻi taʻifau ma etoeto i ona papala.
22 O lea, a o faagasolo aso, ona oti ai lea o le tagata ʻaisi, ma ua ave o ia e agelu ma tuu i autafa o Aperaamo.*
“Ua oti foʻi le mauʻoa ma ua tanu o ia.
23 Ua tepa aʻe o ia i luga mai i le Tuugamau* o loo faapuapuagatia ai, ua ia iloa mamao atu Aperaamo ma Lasalo o loo i ona autafa.*
24 O lea, ua ia valaau atu ai ma faapea atu, ‘Loʻu tamā e Aperaamo, ia e alofa mutimutivale mai iā te aʻu, ma ia auina mai Lasalo e fufui le tumutumu o lona tamatamaʻilima i le vai, ma faamālū ai loʻu laulaufaiva. Auā ua ou pagatia i le mumū o lenei afi.’
25 Ae ua faapea mai Aperaamo, ‘Loʻu atalii e, ia e manatua foʻi, na e maua le tele o mea lelei a o e ola, a o Lasalo na ia maua mea leaga. Peitaʻi, o lea ua ia maua se olaga lelei i inei, a o lenā ua e pagatia.
26 E lē gata i nei mea uma, ae ua iai foʻi se vanu tele i lo tatou vā. E lē mafai la ona sao atu i latou o i inei e fia ō atu i inā, e lē mafai foʻi ona sao mai outou i inā iā i matou.’
27 Ona fai atu lea o le tagata mauʻoa, ‘Afai la o lenā, ou te talosaga atu iā te oe le tamā e, ina ia auina atu o ia i le aiga o loʻu tamā,
28 ina ia avatu se molimau māeʻaeʻa i oʻu uso e toʻalima, ina neʻi o latou ō mai foʻi i lenei nofoaga e puapuagatia ai.’
29 Ae ua fai mai Aperaamo, ‘O loo iā i latou Mose ma le ʻau Perofeta; e tatau ona latou faalogo i ai.’+
30 Ona ia fai atu lea, ‘Loʻu tamā e, Aperaamo, e leai. Afai e alu atu se tasi mai i ē ua oti iā i latou, o le a latou salamō.’
31 Ae ua fai mai o ia iā te ia, ‘Afai latou te lē faalogo iā Mose+ ma le ʻau Perofeta, e latou te lē talitonu foʻi la pe a toetū mai se tasi mai le oti.’”
Faamatalaga Pito i Lalo
^ Po o le “gaoioi ma le faautauta.”
^ Tagaʻi i le Uiga o Upu.
^ Ele., “i le fatafata o Aperaamo.”
^ Po o “Heitisi.” Tagaʻi i le Uiga o Upu.
^ Ele., “o loo i lona fatafata.”
