මලාකි 3:1-18
3 “මම මාගේ පණිවිඩකරුව මා ඉදිරියෙන් යවන්නෙමි.+ ඔහු මට කලින් ගොස් මාර්ගය සූදානම් කරනු ඇත.+ සැබෑ ස්වාමීන්*+ තම ගෘහයට පැමිණෙනු ඇත.+ ඔබ මඟ පෙන්වීම් පතන ඒ තැනැත්තා ඔබ නොසිතන වේලාවක පැමිණෙන්නේය. ඔබ ආශාවෙන් බලා සිටින තැනැත්තා+ වන ගිවිසුමට+ සම්බන්ධ දූතයාද+ ඔහු සමඟ පැමිණෙන්නේය. ඔහු නිසැකවම පැමිණෙනු ඇත.” ඒ දේ දන්වන්නේ ස්වර්ගයේ සේනාවල අධිපති වන යෙහෝවා දෙවිය.+
2 “ඔහු පැමිණෙන දවසේදී+ විඳදරාගනිමින් ස්ථිරව සිටිය හැක්කේ කාටද?+ මන්ද ඔහු ලෝහ පිරිසිදු කරන ගින්නක් මෙන්ද+ රෙදි සේදීමට+ භාවිත කරන සබන්*+ මෙන්ද ක්‍රියා කරනු ඇත.
3 රිදී උණු කර පවිත්‍ර තත්වයකට පත් වන තුරු ඒ දෙස බලා සිටින රන්කරුවෙකු මෙන්+ ඔහු ලෙවීගේ පුත්‍රයන්ව පවිත්‍ර කරන්නේය.+ රන්+ හා රිදීවල තිබෙන බොර ඉවත් කරන්නාක් මෙන් ඔහු ඔවුන් තුළ ඇති අපවිත්‍ර දේ ඉවත් කරනු ඇත. ඉන්පසු ඔවුහු යෙහෝවා දෙවිට ධර්මිෂ්ඨ සිතකින් පූජා ඔප්පු කරන්නෝය.+
4 එවිට යූදා දේශයේ වැසියන් හා යෙරුසලමේ වැසියන් ඔප්පු කරන පූජා යෙහෝවා දෙවිට ඉතා ප්‍රසන්න වනු ඇත.+ ඔවුන් ඈත අතීතයේදී ඔප්පු කළ පූජා මෙන් දෙවි ඒවාද පිළිගනු ඇත.”+
5 “පමා නොවී මම ඔබව විනිශ්චය කරන්නෙමි.+ මන්ත්‍ර ගුරුකම් කරන්නන්ට,+ අනාචාරයේ යෙදෙන්නන්ට,+ බොරුවට දිවුරන්නන්ට,+ සේවකයන්ට දිය යුතු වැටුප නොගෙවා වංචා කරන්නන්ට,+ වැන්දඹුවන්ව+ හා පියා නැති දරුවන්ව රවටන්නන්ට+ සහ විදේශිකයන්ගේ අයිතිවාසිකම් පැහැරගන්නන්ට+ විරුද්ධව මට සාක්ෂි තිබේ.+ ඉන් එක් කෙනෙක්ටවත් මා කෙරෙහි කිසිම ගරුබියක් නැත”+ කියා ස්වර්ගයේ සේනාවල අධිපති වන යෙහෝවා දෙවි පවසන්නේය.
6 “මා යෙහෝවා දෙවිය. මම කිසිදාක වෙනස් නොවෙමි.+ ඔබ යාකොබ්ගේ පුත්‍රයන්ය. මා ඔබව විනාශ නොකළේ ඒ නිසාය.+
7 නමුත් ඔබේ මුතුන්මිත්තන්ගේ කාලයේ සිට මේ දක්වාම ඔබ මාගේ නියෝග පිළිපැද්දේ නැත.+ දැන්වත් ඔබේ වැරදි නිවැරදි කරගෙන මා ළඟට එන්න. එවිට මමත් ඔබට ළං වන්නෙමි”+ කියා ස්වර්ගයේ සේනාවල අධිපති වන යෙහෝවා දෙවි පවසන්නේය.
එවිට ඔබ මෙසේ අසන්නහුය. “අපිට හදාගන්න තියෙන වැරදි මොනවාද?”
8 “දෙවිට අයිති දේ සොරකම් කරන්න මනුෂ්‍යයෙකුට පුළුවන්ද? නමුත් ඔබ මගෙන් සොරකම් කරන්නහුය.”
එවිට ඔබ, “අපි මොනවාද ඔබෙන් සොරකම් කළේ” කියා අසන්නහුය.
“මට ලැබිය යුතු දසයෙන් කොටසත් මගේ පූජාත් ඔබ සොරකම් කළේ නැද්ද?
9 මුළු ජාතියම මට අයිති දේ සොරකම් කරමින් මට අපහාස කරන්නෝය.”+
10 ස්වර්ගයේ සේනාවල අධිපති වන යෙහෝවා දෙවි තවදුරටත් මෙසේ පවසන්නේය. “ඔබේ මුළු ආදායමෙන් දසයෙන් කොටසක්+ මගේ ගබඩාවට ගෙනෙන්න. මාගේ ගෘහය පුරවන පිණිස ඒ සියල්ල නොමසුරුව රැගෙන එන්න.+ එවිට මා ඔබට ආශීර්වාද කරන්නේ නැද්ද කියා බලන්න.+ මම අහසේ කවුළු විවර කර+ ඔබේ ගබඩා පිරී ඉතිරී යන තරමට ඔබට ආශීර්වාද කරන්නෙමි.”+
11 “ඔබේ වගාව කා දමන සියලු පළඟැටියන්ව*+ මම පන්නා දමන්නෙමි. කෙතේ ඇති අස්වැන්න විනාශ කර දමන්නවත් මිදිවැලේ පලදාව නාස්ති කරන්නවත් මම උන්ට ඉඩ නොතබන්නෙමි”+ කියාද ස්වර්ගයේ සේනාවල අධිපති වන යෙහෝවා දෙවි පවසන්නේය.
12 “ඔබේ මුළු දේශයටම මා ආශීර්වාද කරන නිසා+ ඔබ සන්තෝෂවත් සෙනඟක් බව සියලු ජාතීහු පවසනු ඇත.”+ එසේ පවසන්නේ ස්වර්ගයේ සේනාවල අධිපති වන යෙහෝවා දෙවිය.
13 යෙහෝවා දෙවි තවදුරටත් මෙසේ පවසන්නේය. “ඔබ මගේ සිත වේදනාවට පත් වන අයුරින් කතා කළහුය.”+
නමුත් ඔබ මෙසේ අසන්නහුය. “ඔබේ සිත වේදනාවට පත් වෙන්න අපි මොනවාද කිව්වේ?”+
14 “‘දෙවිට සේවය කිරීමෙන් කිසි පලක් තියෙනවාද?+ අපි ස්වර්ගයේ සේනාවල අධිපති වන යෙහෝවා දෙවි ඉදිරියේ හඬා වැලපුණා.+ ඔහුගේ ආඥා පිළිපැද්දා. නමුත් එයින් අපිට කිසි ප්‍රයෝජනයක් වුණේ නැහැ’ කියා ඔබ පැවසුවා නොවෙයිද?
15 එමෙන්ම, ‘සන්තෝෂයෙන් කල් ගෙවන්නේ අප අතරේ සිටින උඩඟු අයයි.+ හොඳින් දියුණු වන්නේ දුෂ්ටකම් කරන අයයි.+ ඔවුන් දෙවිට විරුද්ධව කොපමණ දේවල් කළත් කිසි කරදරයක් නැතුව හොඳින් කල් ගෙවනවා’ කියාත් ඔබ පැවසුවහුය.”+
16 එවිට යෙහෝවා දෙවිට ගරුබිය ඇති අය+ එකිනෙකා සමඟ කතා කළෝය. යෙහෝවා දෙවි ඔවුන් කතා කළ දේවලට හොඳින් අවධානය දුන්නේය.+ ඉන්පසු දෙවි තම මතකයේ සිටින අයගේ නම් ලියවිල්ලක සටහන් කිරීමට අණ කළේය.+ යෙහෝවා දෙවිගේ නාමය සිහි කරමින්+ ඔහුට ගරුබිය පෙන්වන අයගේ නම් එහි ලියන ලදි.
17 ස්වර්ගයේ සේනාවල අධිපති වන යෙහෝවා දෙවි මෙසේ පවසන්නේය. “ඒ කාලයේදී මම ඔවුන්ව අගනා වස්තුවක් ලෙස පිළිගන්නෙමි.+ ඔවුහු මාගේ සෙනඟ වන්නෝය.+ පියෙක් තමාට කීකරු වන පුත්‍රයෙකුට දයාව පෙන්වන්නාක් මෙන් මමත් ඔවුන්ට දයාව පෙන්වන්නෙමි.+
18 ඒ කාලයේදී ධර්මිෂ්ඨයා කවුද කියාත් දුෂ්ටයා කවුද කියාත්+ දෙවිට සේවය කරන්නේ කවුද කියාත් නොකරන්නේ කවුද කියාත් පැහැදිලිව දැකගැනීමට හැකි වනු ඇත.”+
පාදසටහන්
^ එනම්, ස්වර්ගයේ සේනාවල අධිපති වන යෙහෝවා දෙවි.
^ සෝඩියම් කාබනේට්වලින් සාදාගත් පිරිසිදු කරන ද්‍රව්‍යයක්.
^ සියලු කෘමීන්ව.
