Agradecekuyta ama qunqaychu

“Munasqa Raquel:

Mayta ñuqarayku ruwasqaykimanta agradeceyki. Ichapis mana reparankichu, chaywanpis ñuqawan kasqayki, parlasqayki ima, mayta kallpachawan. Munakuywan, Jennifer.”

¿MAYKʼAQLLAPIS pillapis agradecesqa kasqanta rikuchisurqachu? Chiqamantachá mayta kusikurqanki, imaraykuchus tukuypis, ruwasqanchikta jatunpaq qhawanankuta munanchik (Mateo 25:19-23).

Agradecesqa kasqankuta rikuchiyta yachaqkunaqa, aswan allinta runa masinkuwan kawsakunku. Astawanpis, Jesucristop ruwasqanta ruwanku, pichus runaspa allin ruwayninkuta jatunpaq qhawan (Marcos 14:3-9; Lucas 21:1-4).

Llakikunapaqjina, sapa kuti aswan achkha runas, manaña agradecesqa kasqankuta rikuchinkuchu. Bibliallataq, ‘qhipa saqra pʼunchaykunapi’ mana pachis niyta yachaq runas kananta nirqa (2 Timoteo 3:1-4). Chayrayku, sumaqta kallpakunanchik tiyan mana kay pachamanta runasjina kanapaq, imaraykuchus rumi sunqus, mana wakkunamanta nanachikuq runasman tukusunman.

Ajina kaptin, ¿imaynatá tatas wawasninkuta, pachis niyta yachanankupaq yachachinkuman? ¿Pikunamantaq agradecesqa kasqanchikta rikuchinanchik tiyan? ¿Imaptintaq wakkuna chayta mana rikuchiptinkupis, rikuchinanchik tiyan?

Wasipi agradeceyta rikuchina

Achkha tatas, wawasninkuman necesitasqankuta jaywanankupaq mayta llamkʼanku. Chaywanpis, mana rikunkuchu wawasninku paykunap ruwasqanta jatunpaq qhawasqankuta. ¿Imatá kay chʼampayta allinchanapaq ruwankuman?

1) Ruwasqaykiwan rikuchiy. Wawasqa, wakkunap ruwasqankuta rikuspa astawan yachakunku. Ñawpa tiempomanta Israel suyupi sumaq warmimanta parlaspa, Biblia nin: “Wawasnenqa, kʼacha mama ninku”, nispa. ¿Maypí chayta ninankupaq yachakurqanku? Chay pʼitillataq kay tapuyman kutichin, kayta nichkaspa: ‘Qusanpis alaban’, nispa (Proverbios 31:28, Qheshwa Biblia). Arí, wawasqa tatamamanta agradecesqa kasqankuta rikuchinakuptiku, paykunapis yachakunku, agradecesqa kay, wakkunata kusichisqanta, familiata yanapasqanta, chantapis, kʼacha ruway kasqanta.

Juk tata, Stephen sutiyuq nin: “Iskay warmi wawasniyman yachachinaypaq, warmiyman mikhunata waykʼusqanmanta pachis ninipuni. Paykunaqa, reparanku chayta, chayrayku kunanqa paykunapis agradecesqa kasqankuta rikuchinku”, nispa. Qamrí, warmiyki chayri qusayki tukuy ruwasqanmanta, ¿agradecenkichu juchʼuysitupis kaptin? Wawasniykiman, ¿pachis ninkichu ruwanankuta juntʼaptinku?

2) Yachachiy. Pachis niyqa, juk tʼikajina: wiñananpaqqa, sumaqta qarpana tiyan. Chaywanpis, ¿imaynatá tatas pachis niyta yachachinkuman? May yachayniyuq rey  Salomonqa, kayta sutʼinchawanchik: “Cheqan runaqa kutichinampaj sumajtaraj yuyaychakun”, nispa (Proverbios 15:28).

Wawaykiman imatapis quriptinku, ¿jatunpaqchu chay regalota qhawan? ¿Tʼukurinchu imastachus chay regalota quq, jaywananpaq ruwasqanpi? Kay tapuykunapi tʼukuriyta yachachinki chayqa, sunqumantapacha agradecekuyta yachanqa. María, pichus kimsa wawasninta uywan nin: “Juk regalomanta wawasniywan parlariyqa, —imaptinchus chay regalota quwanchik, imastachus quwananchikpaq ruwarqanku ima— tiempopaq, chaywanpis chayta ruwayqa may sumaq”, nispa. Chay parlariykunaqa, wawasta pachis niyta yachanankupaq yachachin, astawanpis, imaraykuchus agradecesqa kanankuta yachachin.

Sumaq tatasqa, wawasninkuman yachachinanku tiyan, pillapis munakuspa regalota qusqanta, manataq imata ruwasqanraykuchu. * Ñawpa tiempopi kamachista qhawanamanta yuyaychayqa, wawasta uywanapaq yanapallawanchiktaq, kay yuyaychayqa Proverbios 29:21 tarikun, nintaq: “Juchʼuymantapacha lulusqa kamacheqa qhepamanqa patronninta llakichenqa”, nispa.

Juchʼuy wawitaspis, pachis niyta yachankuman. ¿Imaynamantá? Linda, pichus kimsa wawasniyuq, imatachus qusanwan ruwasqankumanta parlan: “Pachis ninapaq tarjetata ruwachkaptiykuqa, wawasniykuta chaypi juk dibujota chayri sutinkuta qillqanankuta niyku”, nispa. Wawaspa dibujasqanku, chayri qillqasqanku mana kʼachitu kaptinpis, paykunaqa, juk sumaq yachayta japʼikunkuman.

3) Ama saykʼuychu. Runaqa, juchasapa kasqanchikrayku, tukuy imatapis ñuqallanchikpaq munanchik, chayrayku wakin kuti mana pachis niyta atillanchikchu (Génesis 8:21; Mateo 15:19). Chaywanpis, Biblia kamachiwanchik: “Qankunaqa mosojman tukuychej sonqoykichejpa yuyaynimpi. Chay mosoj runa kaywan pʼachawan jina pʼachallikuychej, mayqenchus Diosman jina ruwasqa”, nispa (Efesios 4:23, 24).

Chaywanpis, achkha tatas yachankujina, wawasta ‘chay musuq runa kaywan pʼachawanjina pʼachalliyqa’, mana atikullanchu. Ñawpaqtaña Stephenmanta parlarqanchik, pay nin: “Wawasniyku sapallankumanta pachis niyta yachanankupaq, rikchʼawarqayku achkha tiempopaq kasqanta”, nispa. Chaymanta nin: “Chaywanpis mana saykʼuspa yachachillarqaykupuni, ajinamanta runaman pachis niyta yachakurqanku. Chaytaq, mayta kusichiwayku”, nispa.

¿Imatá amigosninchikmanta, runa masinchikmanta ima, nisunman?

Wakin kutiqa, mana munaspalla, pachis niyta qunqarparinchik. Chaywanpis, ¿imaraykutaq agradecesqa kasqanchikta rikuchinanchikpuni tiyan? ¿Manachu sunqullanchikpi pachis nisunman? Kay tapuykunaman kutichinapaq, imatachus Jesús yachachisqanta qhawarina.

Jesús, Jerusalenman richkaspa, chunka leprososwan tinkurqa. Biblia nisqanmanjinataq, chay runasqa, “qhaparerqanku: Yachachej Jesus, khuyariwayku ari, nispa. Paykunata rikuspa, Jesusqa nerqa: Riychej, sacerdotesman rikuchikamuychej, nispa. Paykunataj rishaspallaraj, chay lepra onqoymanta sanoyachisqa rikhurerqanku. Paykunamanta ujnin kajtaj lepra onqoymanta sano rikhurispa, kutirimorqa, Diostataj jatunmanta jatunchasharqa. Jinapi Jesuspa ñawpaqenman wijchʼuykukuspa, graciasta qorqa. Chay runataj samaritano karqa” (Lucas 17:11-16).

Jesús, lepra unquyniyuq runas agradecesqa kasqankuta mana rikuchisqankuta, ¿allinpaqchu qhawarqa? Biblia willasqanmanjinaqa, Jesús nirqa: “Manachu chunka karqanku sanoyachisqasqa? Maypitaj chay jisqʼon kashankuri? Manachu pipis kutimorqa Diosta jatunchaj, manachayri kay forasterollachu?”, nispa (Lucas 17:17, 18).

Chay runasqa, Jesuspi iñisqankuta nirqanku, chayrayku mana saqra runas kasqankuta nisunmanchu, chantapis Jesuspa kamachisqanmanjina, Jerusalenpi sacerdotesman rirqanku. Chiqamantachá, Jesús paykunarayku  ruwasqanta jatunpaq qhawarqanku. Chaywanpis, mana kutimurqankuchu, chaytaq, Jesuspa sunqunta pʼakirqa. ¿Imatá chaymanta yachakusunman? Pillapis ñuqanchikpaq imallatapis ruwaptin, ¿imatá ruwanchik? Usqhayta, ¿pachis ninchikchu? May sumaq kanman, agradecesqa kasqanchikta, juk qillqaniqta chayri wakjinamanta rikuchinanchik.

Biblia nin: “Munakuyniyoj runaqa mana ruwanchu mana allin kajtaqa, nitaj payllapajchu imatapis maskʼan” (1 Corintios 13:5, 6). Chayrayku, sunqumantapacha agradecesqa kasqanchikta rikuchinapaq, mana allin kaqllatachu ruwana, manaqa sutʼimanta munakuyninchikta rikuchina. ¿Imatá kay chunka leprososmanta yachakunchik? Cristop qhipanta puriyta munaqkuna, agradecesqa kasqankuta tukuy laya runasman, wak religionmanta, wak suyumanta kaqkunaman ima, rikuchinanku tiyan.

Ajina kaptin, tapurikuy: “¿Maykʼaqtaq juk vecinoyman, yachay wasimanta compañeroyman, llamkʼaymasiyman, doctorman, ranqhaqman, chayri pi runallamanpis yanapawaptin, pachis nispa nirqani?” Kay ruwaypi astawanchus llamkʼanayki kasqanta yachanaykipaq, kayta ruwawaq: iskay pʼunchayta, yupay machkha kutitachus agradecesqa kasqaykita rikuchinki, “pachis” nispa chayri wakjinamanta.

Astawanpis, Jehovaman aswan agradecesqa kananchik tiyan, imaraykuchus “tukuy ima allin kaj, kʼacha kaj imaqa” Paymanta jamun (Santiago 1:17). Chayrayku, imastachus Pay ñuqanchikraykupuni ruwasqanpi tʼukurispa, tapurikuy: “¿chaymanta graciasta qunichu?”, nispa (1 Tesalonicenses 5:17, 18.)

¿Imaraykú adradeceyta yachananchik tiyan, wakkuna mana chayta ruwaptinkupis?

Ichapis, kay pachapi kaq runasqa, mana pachis niyta yachankuchu. Chaywanpis, ¿imaraykutaq ñuqanchik mana paykunajinachu kananchik tiyan? Kayta qhawarina.

Mana agradecesqa kayta yachaq runaswan, kʼacha kasunchik chayqa, khuyakuq Jehová Diosninchikjina ruwasun. Achkha runas, Jehovap ruwasqanmanta mana agradecekuptinkupis, payqa munakuyninta rikuchillanpuni (Romanos 5:8; 1 Juan 4:9, 10). “Payqa sajra runaspaj, kʼacha runaspajpis intinta llojsichimu[llanpuni]”, chantapis, “parachimu[llapuni] tukuypaj, allin runaspaj, sajra runaspaj ima”. Chayrayku, agradecesqa kasqanchikta rikuchinapaq kallpakusun chayqa, kay saqra pachamanta runas mana jina kaptinkupis, “janaj pachapi kashaj Tata[nchik]pa wawasnin” kasqanchikta rikuchisun (Mateo 5:45).

[Sutʼinchaynin]

[25 paginapi sutʼinchaynin]

Iskay pʼunchayta, yupay machkha kutitachus agradecesqa kasqaykita rikuchinki, “pachis” nispa chayri wakjinamanta

[25 paginapi dibujo/foto]

Wawasniyki yachakunankupaq, qamraq agradecesqa kasqaykita rikuchiy

[25 paginapi dibujo/foto]

Juchʼuy wawitaspis agradecesqa kayta yachakunkuman